raashtrapati shaasan

raashtrapati shaasan (ya kendreeya shaasan) Bhaarat mein shaasan ke sandarbh mein us samay prayog kiya jaane wala ek paaribhaashik shabd hai, jab kisi raajya sarkaar ko bhang ya nilambit kar diya jaata hai aur raajya pratyaksh sangheeya shaasan ke adheen aa jaata hai. Bhaarat ke samvidhaan ka anuchhed-356, kendra ki sangheeya sarkaar ko raajya mein samvaidhaanik tantr ki vifalta ya samvidhaan ke spasht ullanghan ki dasha mein us raajya sarkaar ko barkhaast kar us raajya mein raashtrapati shaasan laagoo karne ka adhikaar deta hai. raashtrapati shaasan us sthiti mein bhi laagoo hota hai, jab raajya vidhaanasabha mein kisi bhi dal ya gathabandhan ko spasht bahumat naheen ho.

sattaaroodh party ya keindreeya (sangheeya) sarkaar ki salaah par, raajyapaal apne vivek par sadan ko bhang kar sakte hain, yadi sadan mein kisi party ya gathabandhan ke paas spasht bahumat na ho. raajyapaal sadan ko chhah maheene ki avadhi ke liye 'nilambit avastha' me rakh sakte hain. chhah maheene ke baad, yadi fir koi spasht bahumat praapt na ho to us dasha mein pun: chunaav aayojit kiye jaate hain.

ise raashtrapati shaasan isliye kaha jaata hai kyonki, iske dvaara raajya ka niyantran bajaay ek nirvaachit mukhyamantri ke, seedhe Bhaarat ke raashtrapati ke adheen aa jaata hai, lekin prashaasanik drushti se raajya ke raajyapaal ko keindreeya sarkaar dvaara kaaryakaari adhikaar pradaan kiye jaate hain. prashaasan mein madad karne ke liye raajyapaal aam taur par salaahakaaron ki niyukti karta hai, jo aam taur par sevaanivrutt civil sevak hote hain. aamtaur par is sthiti me raajya mein kendra mein sattaaroodh party ki neetiyon ka anusaran hota hai.

anukram

anuchhed-356

anuchhed 356, kendra sarkaar ko kisi raajya sarkaar ko barkhaast karne aur raashtrapati shaasan lagaane ki anumati us avastha mein deta hai, jab raajya ka samvaidhaanik tantr poori tarah vifal ho gaya ho.

yeh anuchhed ek saadhan hai jo kendra sarkaar ko kisi naagrik ashaanti (jaise ki dange jinse nipatne mein raajya sarkaar vifal rahi ho) ki dasha mein kisi raajya sarkaar par apna adhikaar sthaapit karne mein saksham banaata hai (taaki vo naagrik ashaanti ke kaaranon ka nivaaran kar sake). raashtrapati shaasan ke aalochakon ka tark hai ki adhiktar samay, ise raajya mein raajanaitik virodhiyon ki sarkaar ko barkhaast karne ke liye ek bahaane ke taur par istemaal kiya jaata hai, isliye ise kuchh logon ke dvaara ise sangheeya raajya vyavastha ke liye ek khatre ke roop mein dekha jaata hai. 1950 mein bhaarateeya samvidhaan ke laagoo hone ke baad se kendra sarkaar dvaara iska prayog 100 se bhi adhik baar kiya gaya hai.

anuchhed ko pehli baar 31 July 1959 ko vimochan samaaram ke dauraan lokataantrik tareeke se chuni gayi Kerala ki communist sarkaar barkhaast karne ke liye kiya gaya tha. baabari masjid vidhvans ke baad uttar pradesh ki bhaajapa ki raajya sarkaar ko bhi barkhaast kiya gaya tha.

anuchhed-355

anuchhed 355 kendra sarkaar adhikrut karta hai taaki vo kisi baahari aakraman ya aantarik ashaanti ki dasha mein raajya ki suraksha sunishchit kar sake aur pratyek raajya ka shaasan samvidhaan ke praavadhaanon ke anusaar chalta rahe.

is anuchhed ka istemaal tab kiya gaya jab bhaajapa shaasit raajyon mein girijaagharon par hamle ho rahe the. tab ke sansadeeya kaarya mantri vaayalaar ravi ne anuchhed 355 mein sanshodhan kar, raajya ke kuchh bhaagon ya raajya ke kuchh khaas kshetron ko kendra dvaara niyantrit karne ka sujhaav diya tha.[1]

sandarbh aur baahari kadiyaan

yeh bhi dekhein