premakatha

vishvaprasiddh premakathaaon mein raadha-Krishna, shakuntala-dushyant, saavitri-satyavaan jaisi pauraanik kathaaon ke alaava raani roopamati-baaj bahaadur, saleem-anaarkali, heer-raanjha, laila-majanoon, sohani-mahivaal, dhola-maaroo jaise prem charitron ki gaathaaen amar hain.

anukram

raadha-Krishna

sakha bhaav par aadhaarit raadha-Krishna ka prem amar hai. kala ki har vidha mein is prem ka chitran milta hai. asankhya gopiyon ke sang raas rachaane vaale, rukmani-satyabhaama ke pati aur meera baai ki bhakti mein rachi-pagi rachanaaon ke paatr the Krishna. khud se badi umr ki raadha se unke prem ko saamaajik maanyata mili, yahaan tak ki unka naam hi raadha ke saath liya gaya. vrushabhaanu ki putri raadha aur Krishna ke is prem ne kai maayanon mein paranparaaon ko toda tha. mahaakavi sooradaas ke prabhu, mahaabhaarat mein arjun ke maargadarshak, raadha ke shaashvat premi aur draupadi ki laaj bachaane vaale Krishna sambhavat: stri-purush samaanata ke prabal pakshadhar bhi the. govind das, chaitanya mahaaprabhu aur geet govind ke rachanaakaar jayadev ki rachanaaon mein raadha-Krishna ke is prem ka chitran bakhoobi

shakuntala-dushyant

mahaabhaarat kaal mein upaji yeh prem katha behad maarmik hai. mahaakavi kaalidaas ki amar rachana abhigyaan shaakuntalam mein iska ullekh kiya gaya hai. puru saamraajya ke raaja dushyant aakhet ke liye gaye the, tabhi unhonne apoorv sundari shakuntala ko dekha aur unke prati aakarshit ho gaye. donon ne gandharv vivaah kiya, apne mahal ko lautate hue dushyant ne shakuntala ko ek angoothi nishaani ke bataur di. ek baar jab shakuntala apne premi ke khayaalon mein khoi hui theen, rishi durvaasa unki kutiya par aae. khud mein doobi shakuntala ko rishi ke aane ki aahat na mil saki. ise apna apamaan samajh krodhit durvaasa ne unhein shaap diya- jiske khayaalon mein tum itni khoi ho, vah tumhein bhool jaaega... baad mein rishi se maafi maangate hue shakuntala bahut roi, tab unhonne kaha, jab tum premi ki di gayi nishaani use dikhaaogi, vah tumhein pehchaan lega. shakuntala garbhavati theen, lekin raaja dushyant ki koi soochana na thi. shakuntala ko unke pita ne shaahi darbaar mein bheja, taaki vah dushyant se mil sakein lekin raaste mein ek nadi mein dushyant dvaara di gayi angoothi kaheen gir gayi. rishi ke shaap ke prabhaav mein dushyant ne shakuntala ko na pahachaana. shakuntala ne angoothi dikhaani chaahi, kintu vah to pehle hi nadi mein gir chuki thi. angoothi ko ek machhali ne nigl liya tha. baad mein ek machhuaare ne machhali ke pet se vah angoothi nikaali aur vah use lekar darbaar mein gaya aur raaja ko angoothi dikhaai. angoothi dekhkar dushyant ko bhuli saari daastaan yaad aa gayi. is tarah yeh prem kahaani poornata tak pahunchi. unke putr ka naam bharat pada. kaha jaata hai ki bhaaratavarsh ka naam uske naam par hi rakha gaya.

saavitri-satyavaan

apratim saundarya ki dhani saavitri raajagharaane ki theen, unke saundarya ke charche door-door tak vikhyaat the. unhonne apne pita ke samaksh khud var dhoondhane ki ichha rakhi. unke pita ne saavitri ki ijd ke kaaran unhein deshaatan kar apna var khojane ki ijaajat di. ek din kisi ghane jungle mein unki bheint saamraajya kho chuke ek vruddh aur andhe raaja se hui. ek chhoti-si kutiya mein raaja-raani aur unka yuva putr jeevan vyateet kar rahe the. Rajkumar lakadi kaatkar use haat mein bechata aur maata-pita ke liye bhojan jutaata. saavitri ko aise hi var ki talaash thi, lekin unke pita gareeb Rajkumar se beti ki shaadi ke paksh mein taiyaar na hue. raaja ko pata chala ki Rajkumar ki aayu maatr ek varsh aur hai, is par bhi jab saavitri, satyavaan se vivaah ke faisale par adi raheen to antat: bhaari man se raaja ne haami bhar di. vivaah ke baad saavitri pati ki kutiya mein rahane lageen. varsh ke antim din saavitri jaldi utheen, satyavaan se saath jungle jaane ki praarthana ki. dopahar ke samay satyavaan ko kuchh thakaan mahasoos hui to vah saavitri ki god mein sir rakhakar achetaavastha mein chale gaye. saavitri kuchh samajhateen, isse poorv hi yamaraaj prakat hue aur saavitri se satyavaan ko le jaane ki baat kahi. saavitri ne yamaraaj se vinti ki ki vah unhein bhi pati ke saath mrutyu varan karne dein. yamaraaj iske liye taiyaar na hue. saavitri ki ijd par unhonne satyavaan ke jeevan ke alaava koi doosra varadaan maangane ko kaha. saavitri ne putravati hone ka aasheervaad maanga. yamaraaj ne varadaan diya aur chalne ko hue, tabhi saavitri ne kaha, jab aap mere pati ko hi saath le ja rahe hain to main putravati kaise ho sakti hoon. ant mein yamaraaj ne satyavaan ke praan lauta diye aur atal nishchaya waali saavitri ke prem ki jeet hui, unhonne pati ka jeevan vaapas pa liya.

raani roopamati-baaj bahaadur

parichaarikaaon ke saath ghodon par baaj bahaadur aur roopamati

maalava ki gaayika theen roopamati, sultaan baaj bahaadur unase prem karte the. yeh antardhaarmik vivaah tha. yuddh, prem, sangeet aur kavita ka adbhut sammishran hai yeh jaadui prem kahaani. baaj bahaadur maandu ke antim svatantr shaasak the. roopamati kisaan putri aur gaayika theen. unki aavaaj ke mureed baaj bahaadur unhein darbaar mein le gaye. donon parinya sootr mein bandh gaye, lekin yeh prem kahaani jaldi hi khatm ho gayi, jab mugal samraat Akbar ne maandu par chadhaai karne ke liye adham Khan ko bheja. baaj bahaadur ne apni chhoti-si sena ke saath usaka mukaabala kiya kintu haar gaye. adham Khan raani roopamati ke saundarya par mar-mita, isse poorv ki vah maandu ke saath roopamati ko bhi apne kabje mein leta, raani roopamati ne vish sevan karke maut ko gale laga liya.

laila-majanoon

arabi sanskruti mein dukhaant prem kahaaniyon ki poori shrrunkhala hai, jinmein kais-lubana, maarava-al majanoon al faraansi, antara-abala, kuthair-aja, laila-majanoon ki kahaaniyaan pramukh hain. laila-majanoon ki prem kahaani nai naheen hai. arab ke baani Aamir janajaati ka tha yeh kavi yaani majanoon. laila bhi isi jaati se aati theen. laila ke pita ke virodh ke kaaran inka vivaah naheen ho saka aur laila kisi aur ki patni ho gayi. majanoon paagal ho gaye, isi paagalapan mein unhonne kai kavitaaen racheen. laila pati ke saath iraak chali gayi, jahaan kuchh hi samay baad beemaar hokar unki mrutyu ho gayi. majanoon bhi kuchh samay baad maut ki god mein chale gaye. arab aur habeeb lokasaahitya se lekar faarasi saahitya tak yeh prem katha kai roopon mein saamane I. aam log ise nijaami ke parsiyn sanskaran se hi jaante hain. kaha jaata hai ki romiyo-jooliyt ki kahaani laila-majanoon ka hi laitin sanskaran hai.

saleem-anaarkali

mugal samraat Akbar ke chahete aur Baba fareed ke aasheervaad se janme bete saleem ne anaarkali se prem kiya. anaarkali ek moortikaar ki beti thi aur behad sundar thi. Akbar is prem ke khilaaf the. anaarkali ke prem mein paagal shaahajaada saleem ne apne pita ke khilaaf bagaavat tak kar di. kaha jaata hai ki dariyaadil maane jaane vaale mugal samraat ne anaarkali ko jinda deevaar mein chinva diya gaya. mugale-aajam jaisi film ne is prem katha ko amar kar diya.

heer-raanjha

Punjab ki dharati par kai prem kathaaon ka janm hua, jinmein vaaris shaah rachit heer ko saahityik jagat ke log bakhoobi jaante hain. ameer parivaar ki khoobsoorat heer ne prem kiya raanjha se. raanjha apne chaar bhaaiyon mein sabse chhota tha, bhaaiyon se vivaad ke baad vah ghar chhodakar bhaag gaya aur heer ke gaanv tak aa pahuncha. heer ke ghar mein vah pashuon ki rakhavaali karne laga. donon ke beech prem hua aur kai varsho tak donon milte rahe, lekin heer ke ishryaalu chaacha kaido aur maata-pita ke kaaran donon ka vivaah naheen ho saka, heer ka vivaah anyatr kar diya gaya. raanjha jogi ho gaya aur alakh niranjan kehkar gaanv-gaanv firne laga. jogi roop mein ek baar fir vah heer se mila. donon bhaag gaye lekin police ne unhein pakad liya. lekin usi raat poore shahar mein aag lag gayi. ghabaraae hue mahaaraaja ne premiyon ko aajaad kar diya aur unhein vivaah ki ijaajat de di. donon heer ke gaanv vaapas aae, is baar maata-pita unke vivaah par raaji ho gaye. vivaah ke din heer ke ishryaalu chaacha kaido ne heer ko vish khila diya, raanjha ne use bachaane ki bahut koshish ki kintu heer na bach saki. heer ke dukh mein vyathit raanjha ki bhi baad mein maut ho gayi. ek daarun prem kahaani khatm ho gayi.

sohani-mahivaal

Punjab ki hi dharati par ugi ek anya prem katha hai sohani-mahivaal ki. sindhu nadi ke tat par rahane vaale kumhaar tula ki beti thi sohani. vah kumhaar dvaara banaae gaye bartanon par sundar chitrakaari karti thi. Uzbekistan sthit bukhaara ka dhani vyaapaari ijjat beg vyaapaar ke silsile mein Bhaarat aaya, sohani se milne par vah uske saundarya par aasakt ho utha. sohani ko dekhne ke liye vah roj sone ki muharein jeb mein bharakar kumhaar ke paas aata aur bartan khareedata. sohani bhi usaki taraf aakarshit ho gayi. vah sohani ke pita ke ghar mein naukri karne laga, usaka naam mahivaal pad gaya, kyonki vah bhainsein charaane laga. jab unke prem ke kisse aaspaas faile to tula ne sohani ko bina bataae usaki shaadi kisi kumhaar se kar di. mahivaal apna ghar, desh bhoolakar fakeer ho gaya. magar donon premiyon ne milna na chhoda. roj jab raat mein saari duniya soti, sohani nadi ke us paar mahivaal ka intajaar karti, jo tairakar uske paas aata. mahivaal beemaar hua to sohani ek pakke ghade ki madad se tairakar usase milne pahunchane lagi. usaki nanad ne ek baar unhein dekh liya to usanepakke ghade ki jagah kachcha ghada rakh diya. sohani ghade dvaara nadi paar karne lagi to doob gayi. mahivaal use bachaane ke liye nadi mein kooda, vah bhi doob gaya. is tarah yeh dukh bhari prem kahaani khatm ho gayi.

dhola-maaru

rajput prem ki gaatha hai dhola-maaru. poogal ka shaasak tha pingal. usane apni nanhi putri maaru ka baal vivaah naravaar ke raaja nal ke putr dhola se kar diya. bade hone par use vida kiya jaana tha. dhola bada hone laga lekin tabhi nal ki maut ho gayi aur dhola vivaah ki baat bhool gaya. usaka vivaah malavaani se ho gaya. maaru ne kai baar apne dooton ko dhola ke paas sandesh ke saath bheja, lekin har baar usaki patni ne unhein beech hi rok diya. ant mein maaru ne kuchh lok gaayakon ko dhola ke paas bheja, jinhonne dhola ko vivaah ki baat yaad dilaai. dhola maaru se milne ki cheshta karne laga lekin usaki ishryaalu patni ne usase kaha ki maaru mar chuki hai. dhola naheen ruka, chalta gaya. raaste mein hi dakaiton ke giroh se takaraaya aur giroh ke sardaar ne usase kaha ki maaru ka anyatr vivaah ho chuka hai. yeh dakait bhi maaru se ektarfa prem karta tha. dhola maaru se milne ke apne nishchaya par adig tha. antat: vah maaru se milne pahunch gaya. lekin kashton ka ant abhi na hua tha. lautate hue registaan ke saanp ne maaru ko das liya aur vah gahan moorhaavastha mein chali gayi. rajput itihaas mein pehli baar dhola ne patni ki chita ke saath khud sati hona chaaha. isi beech ek yogi-yogini ne kaha ki vah maaru ko jeevit kar sakte hain. unhonne maaru ko pun: jeevanadaan diya. donon fir mahal ko lautane lage, tabhi dakaiton ka sardaar unhein maarane aa gaya, lekin lok gaayakon ne unhein bacha liya. antat: ve apne mahal laut sake, anek dukhon ke baad ek sukhaant prem kahaani ban saki.

sheereen-farahaad

faaras ki prushthabhoomi mein janmi is kahaani ka paatr farahaad ek shilpkaar tha, jo Rajkumari sheereen se beintaha muhabbat karta tha, lekin Rajkumari is prem se anbhigya thi. niraash farahaad pahaadon mein jaakar rahane laga aur baansuri par Rajkumari ki prashansa mein dhunein bajaane laga. jab yeh baat sheereen ko maaloom hui to vah farahaad se mili aur uske prem mein giraft ho gayi. sheereen ke pita aur raaja naheen chaahate the ki unki beti ek aam aadmi se shaadi kare. aakhir unhonne apni beti ke saamane shart rakhi ki yadi farahaad pahaadon ke beech chattaanon mein nahar khod de to vah sheereen ka vivaah usase kar deinge. yeh behad mushkil kaarya tha, lekin farahaad ne nahar khodani shuroo ki. usaki athak mehnat dekhkar raaja ko laga ki kaheen farahaad apna lakshya praapt na kar le. nahar poori hone ko thi, ghabaraae hue raaja ne apne darabaariyon se beti ke vivaah ki khaatir mashavira karna chaaha. unke vajeer ne salaah di ki kisi boodhi stri ko farahaad ke paas bhejein aur yeh sandesh dein ki Rajkumari ki maut ho chuki hai. tab ek boodhi stri farahaad ke paas pahunchi aur jor-jor se rone lagi. farahaad ne usase rone ka kaaran poochha to budhiya ne kaha, tum jiske liye apne shareer ko khata rahe ho-vah to mar chuki hai. yeh sunakar farahaad ko sadama pahuncha aur usane apne aujaaron se khud ko maar liya, nahar ban chuki thi, magar paani ki jagah usamein farahaad ka lahoo bah raha tha. farahaad ki maut ki khabar sunakar sheereen ne bhi khud ko khatm kar liya. is tarah ek aur prem kahaani asamaya maut ki god mein so gayi.