pithora chitrakala
pithora chitrakala ek prakaar ki chitrakala hai. madhya pradesh ke pithora kshetr me is kala ka udgam sthal maana jaata hai. is kala ke vikaas mein bheel janajaati ke logon ka yogadaan ullekhaneeya hai. is kala mein paaramparik rangon ka prayog kiya jaata tha. praay: gharon ki deevaaron par yeh chitrakaari ki jaati thi parantu adyatan samay mein yeh kaagajon, kenvas, kapadon aadi par ki jaane lagi hai. yeh chitrakala badoda se 90 kilometer par sthit tejagadh gram (madhya Gujarat) mein rahane waali raathava, bheel va naayak janajaati ke logon dvaara deevaaron par banaai jaati hai.
iske atirikt badoda jile ke tejagadh va chhota Nagpur taalluk ke aaspaas bhi pithora chitrakala gharon ki teen bheetari deevaaron mein kaafi sankhya mein vahaan rahane vaale janajaateeya logon ke gharon mein dekhi ja sakti hain. pithora chitrakala ka in janajaateeya logon ke jeevan mein vishesh mahatva hai tatha unka yeh maanana hai ki is chitrakala ko gharon ki deevaaron par chitrit karne se ghar mein shaanti, khushahaali va sauhaard ka vikaas hota hai.
pithora chitrakala ka chitran raathava jaati ke log hi sabse adhik karte hain tatha atyant hi saadhaaran star ke kintu dhaarmik log hote hain. inke liye pithora Baba ati vishishth va poojaneeya hote hain. is chitrakala ke chitran mein ye log bahut dhan lagaate hain tatha jo apne ghar mein adhikaadhik pithora chitr rakhate hain ve samaaj mein ati sammaananeeya hote hain. pithora chitrakaar ko lakhaada kaha jaata hai tatha jo in chitrakalaaon ka khaata rakhate hain unhein jhokhara kaha jaata hai. sarvochch pad par aaseen jo pujaari dhaarmik anushthaan karavaata hai use badava ya adhyaksh pujaari kehte hain. saamaanyat: lakhaada kisaan hote hain. is chitrakala ka chitran keval purush hi kar sakte hain. khaaton ki dekharekh ke atirikt lakhaada saamaanya chitran jaise rang bharne ka kaarya hi pithora chitrakaaron mein shaamil hokar kar sakte hain. varishth kalaakaaron ke maargadarshan mein lakhaada achhe chitrakaar ban jaate hain. mahilaaon ke liye pithora chitran nishedh hai.
saamaajik mahatva
pithora chitrakala dhaarmik anushthaanon se adhik prabhaavit rahati hai. is janajaati ke dhaarmik anushthaanon ka aayojan ishvar ko dhanyavaad svaroop ya kisi ki ichhaapoorti aadi pradaan karne hetu kiye jaate hain. is prakriya mein badava ya sheersh pujaari ko hi bulaaya jaata hai jo unki samasyaaon ka niraakaran in anushthaanon dvaara karavaate hain. yeh samasyaaen chaahe kisi pashu-gaaya, ghoda, hiran, bail, haathi aadi ki apraakrutik mrutyu athva ghar ke bachchon ki beemaari se sambandhit ho sakti hain jiska samaadhaan badava dvaara de diya jaata hai va pooja paath va pithora chitrakala banaane ka paraamarsh svaroop unhein badava dvaara de diya jaata hai. pithora Baba ki upasthiti ko hi sabki samasyaaon ka ekamaatr samaadhaan maana jaata hai. pithora chitrakala sadaiv ghar ke pravesh ya osari jo ki pratham kaksh ke saamane ki deevaar ya usaki bheetari deevaar par ki jaati hai. in deevaaron ko vibhinn aakrutiyon dvaara poori tarah chitrit kar diya jaata hai.
takaneek
-
pithora chitrakaar, chitr banaate hue
-
pithora chitrakala ke charan
-
pithora chitrakaar
rang banaane ke liye rangeen paaudar ko doodh va mahuaa (ek prakaar ki sharaab) ka prayog kiya jaata hai jo ki mahuaa ke divya vruksh se taiyaar ki jaati hai tatha foolon dvaara kinvit karke yeh madira banaai jaati hai va iske beejon dvaara khaadya tel nikaala jaata hai. kintu aajkal choonki kapadon ke rang (fabrik kalar) sthaaneeya dukaanon mein upalabdh hain at: inka hi prayog logon dvaara kiya jaata hai. chitran hetu mukhyat: peele, naarangi, hare, neele, sindoori, laal, aasamaani, kaale va chaandani rangon ka prayog kiya jaata hai. brush banaane ke liye beint ya tahani ke kinaaron ko koota jaata hai parantu aaj inka sthaan baajaar mein upalabdh brushon ne le liya hai.
chitran hetu saamane ki deevaar bagal ki do deevaaron ko taiyaar kiya jaata hai tatha saamane ki deevaar saath waali deevaaron se lagbhag dugani hoti hai. in deevaaron ko pehle gaaya ke gobaar ke ghol se do baar leepa jaata hai va iske oopar safed chauk paaudar se leepakar chitran ki satah taiyaar ki jaati hai. is prakriya ko leepana kaha jaata hai. mukhya deevaar ya baraamade va rasoighar ka sthaan bahut hi pavitra maana jaata hai. is baraamade ki bagal ki do deevaaron ka chitran bhi saamaanya devataaon, bhoot-pret va poorvajon ki aakrutiyaan banaakar kiya jaata hai.
lakhaada jab chitrakaari karta hai, badva va uske saathi paaramparik geet gaate rahate hain. pithora chitrakala mein adhiktar chitran inke dvaara kiye jaane vaale dhaarmik anushthaanon ke samay ka hota hai. ismein beech mein ek chhota aayaataakaar banaaya jaata hai jismein naarangi bindu anguliyon se banaae jaate hain jise teepana kaha jaata hai tatha yeh dhaarmik anushthaan ke ant mein chitrakala ke poorn hone par kiya jaata hai. teepana ke bagal mein pithora Baba va pithori (pithora ki patni) ka chitr banaaya jaata hai. sabse oopar chandrama, soorya, bandaron aadi pashuon ke chitr banaae jaate hain.
-
pithora chitrakala kenvas par
-
pithora chitrakala
 |
Bhaarat se sambandhit yeh lekh ek aadhaar hai. aap ise badhaakar vikipeediya ki sahaayata kar sakte hain. |