paablo pikaaso

paablo pikaaso
Signatur Pablo Picasso

paablo pikaaso (1881-1973) Spain ke mahaan chitrakaar the. ve beesaveen shataabdi ke sabse adhik charchit, vivaadaaspad aur samruddh kalaakaar the. unhonne teekshn rekhaaon ka prayog karke ghanavaad ko janm diya. pikaaso ki kalaakrutiyaan maanav vedana ka jeevit dastaavej hain.

jeevani

25 October 1881 ko malaaga, Spain mein paida hue pikaaso janmajaat kalaakaar the. bachapan mein vah apne saathiyon ko naana prakaar ki aakrutiyaan banaakar acharaj mein daal dete the. pikaaso ke pita kala ke adhyaapak the. isliye kala ki praarambhik shiksha unhein apne pita se mili, kintu 14-15 varsh ki avastha mein hi vah itne utkrusht chitr banaane lage the ki unke pita ne chitrakaari ka apna saara saamaan unhein dekar bhavishya mein kabhi koochi na uthaane ka sankalp le liya. fir chitrakaari mein uchch shiksha ke liye unhein medrid academy mein bheja gaya. kintu pikaaso vahaan ke vaataavaran se jaldi hi oob gaye aur unhonne padhaai chhod di.

varsh 1900 mein kuchh samay ke liye vah peris gaye. peris tab kala ka kendra samjha jaata tha. peris mein pikaaso anek samakaaleen kalaakaaron ke sampark mein aae. unki kala par iska gahra prabhaav pada. fir Spain lautakar unhonne unmukt hokar chitr banaane shuroo kiye. unke us kaal ke chitron mein gahre neele rang aur gulaab ke foolon ki bahutaayat hai. inmein se adhikaansh ki kathaavastu padadalit maanavata aur samaaj se upekshit evam shoshit vargon se sambandhit hai.

varsh 1904 mein unki kala mein doosra mod aaya. is kaal mein unhonne kalaabaajon, bhaandon, masakharon, sitaaravaadakon ke chitr banaae. varsh 1906 mein unhonne apni suprasiddh kalaakruti 'evignan ki mahilaaen' banaani shuroo ki. unhonne is chitr ko lagbhag ek varsh mein poora kiya.

varsh 1909 mein pikaaso ne kala ke kshetr mein 'ghanavaad' ka pravartan kiya. unki yeh shaili 60-65 varshon tak aalochna ka vishay rahi hai aur vishv ke sabhi deshon mein isne yuva kalaakaaron ko prabhaavit kiya. in chitron mein har tarah ke rangon aur rekhaaon ka prayog hua hai. lagbhag isi samay unhonne ingres ki kalaakrutiyon mein ruchi li aur mahilaaon ke anek chitr banaae. in chitron ki tulana praacheen yoonaani moortiyon se ki jaati hai. pikaaso kisi roop mein atyaachaar aur anyaaya ko sveekaar naheen kar sakte the. 1957 mein jab naaji bamavarshakon ne Spain ki Republican faujon par bamabaari ki, to unhonne naaji hamlaavaron ke viruddh apna rosh jataane ke liye din-raat mehnat kar vishaalakaaya chitr 'guernika' banaaya. iske baad unhonne svechha se desh nikaala sveekaar kiya. unhonne kasam khaai ki jab tak Spain mein fir se ripblik ki sthaapana naheen ho jaati, vah Spain naheen lauteinge. pikaaso ne chitrakala se athaah daulat kamaai. sambhavat: aaj tak kisi bhi kalaakaar ya saahityakaar ko apni rachanaakrutiyon se itni aay naheen hui hogi. jahaan vah niji vyaktiyon se apne chitron ka adhik-se-adhik moolya vasool karte the, vaheen unhonne anek sangrahaalayon ko apne chitr ni:shulk bheint kar diye.

baahari kadiyaan