nirdhanata rekha

gareebi rekha ya nirdhanata rekha (poverty line) aay ke us star ko kehte hai jisse kam aamdani hone pe insaan apni bhautik jrooraton ko poora karne me asamarth hota hai. gareebi rekha alag alag deshon me alag alag hoti hai. udahaaran ke liye amareeka me nirdhanata rekha Bhaarat me maanya nirdhanata rekha se kaafi oopar hai.

Europeeya tareeke ke roop mein paribhaashit vaikalpik vyavastha ka istemaal kiya ja sakta hai jismein gareebon ka aakalan 'saapekshik' gareebi ke aadhaar par kiya jaata hai. agar kisi vyakti ki aay raashtreeya ausat aay ke 60 feesadi se kam hai, to us vyakti ko gareebi rekha ke neeche jeevan bitaane wala maana ja sakta hai. ausat aay ka aakalan vibhinn tareekon se kiya ja sakta hai.

udaaharan ke liye maadhya nikaalne ka tareeka. yaani 101 logon mein 51vaan vyakti yaani ek arab logon mein 50 karodvein kram vaale vyakti ki aay ko ausat aay maana ja sakta hai. ye paaribhaashik badlaav na keval gareebon ki adhik sateek tareeke se pehchaan mein madadgaar saabit honge balki yeh bhi sunishchit kareinge ki koi bhi aisa vyakti jo gareeb naheen hai use gareebon ke liye nirdhaarit subsidy ka laabh na mile. paribhaasha ke aadhaar par dekhein to maadhya ke aadhaar par tay gareebi rekha ke aadhaar par jo gareeb aabaadi niklegi vah kul aabaadi ke 50 feesadi se kam rahegi.

yojana aayog ne 2004-05 mein 27.5 pratishat gareebi maanate hue yojanaaen banaai thi. fir isi aayog ne isi avadhi mein gareebi ki taadaad aankane ki vidhi ki punarsameeksha ke liye ek visheshagya samooh ka gathan kiya tha, jisne paaya ki gareebi to isse kaheen jyaada 37.2 pratishat thi. iska matlab yeh hua ki maatr aankadon ke daayein-baayein karne maatr se hi 100 million log gareebi rekha mein shumaar ho gaye.

agar ham gareebi ki paimaaish ke antararaashtreeya paimaanon ki baat karein, jiske tahat rojana 1.25 ameriki dollar (lagbhag 60 rupaye) kharch kar sakane wala vyakti gareeb hai to apne desh mein 456 million (lagbhag 45 karod 60 lakh) se jyaada log gareeb hain.

Bhaarat mein yojana aayog ne Supreme court ko bataaya tha ki khaanapaan par shaharon mein 965 rupaye aur gaanvon mein 781 rupaye prati maheena kharch karne vaale shakhs ko gareeb naheen maana ja sakta hai. gareebi rekha ki nai paribhaasha tay karte hue yojana aayog ne kaha ki is tarah shahar mein 32 rupaye aur gaanv mein har roj 26 rupaye kharch karne wala shakhs BPL parivaaron ko milne waali suvidha ko paane ka hakdaar naheen hai. apni yeh report yojana aayog ne Supreme court ko halafanaame ke taur par di. is report par khud pradhaanamantri ne hastaakshar kiye the. aayog ne gareebi rekha par naya kraaiteeriya sujhaate hue kaha ki Delhi, Mumbai, bangalor aur chennai mein chaar sadasyon wala parivaar yadi maheene mein 3860 rupaye kharch karta hai, to vah gareeb naheen kaha ja sakta.

baad mein jab is bayaan ki aalochna hui to yojana aayog ne fir se gareebi rekha ke liye sarve ki baat kahi.

inhein bhi dekhein

baahari kadiyaaain