nannayya bhatt

nannayya bhatt Andhra saahitya ke 'aadikvi' kahalaate hain kyonki inke dvaara rachit aaaindhr mahaabhaarat ka aadi ansh (dhaai parv) telugu ke upalabdh saahitya mein sabse pehli kaavyarachana maana jaata hai. inke pehle ke jo futakar geet mile, ve bhaasha aur chhand ki drushti se 'deshi paddhati' ke anusaar hain jo sanskrut mein pratipaadit lakshan ke anusaar naheen hain aur is kaaran panditon ke aadar par paatr naheen hue. nannayya ne hi udaattavastuk mahaakaavya ki rachana ki jo mukhyat: 'maarg' paddhati ki hai.

jab jain dharm ka prachaar dakshin mein joron se ho raha tha chod raaja vaidik dharm ki raksha ke liye katibddh hue. tamil sanghon mein mahaabhaarat ka paaraayan hone laga. isi bhaav se prerit hokar Andhra ke prataapi raaja raajaraaj Narendra apne aasthaan ke kulaguru tatha mahaakavi nannayya se praarthana ki ki vyaasakrut mahaabhaarat ka Andhra bhaasha mein parivartan kiya jaae. tadanusaar nannayya ne sanskrut mahaabhaarat ke aadhaar par, bahush: anuvaad ke roop mein, Andhra mahaabhaarat ki rachana ka shreeganesh kiya.

nannayya ne apni rachana mein sanskrut shabdon ka prayog usi reeti se kiya jo us samay Andhra praant mein hota tha. janta ke vyavahaar mein jo tadbhav evam deshaj shabd the, unako bhi parimaarjit roop mein grahan kiya. kuchh sanskrut chhandon ko lekar yatimaitri tatha praasamaitri ke niyamon ke anusaar likha aur kannad kaavyon mein paae jaanevaale anek prashast chhandon ko bhi liya. mahaabhaarat ki rachana mein nannaya ko Narayan bhatt naamak mitr se badi sahaayata mili jiska ullekh nannayya ne swayam apne granth ki prastaavana mein kiya. chanpoo ki tarah chhote-chhote gadya ke ansh bhi inki rachanaaon mein milte hain jo praaya: neeras vishay ko hi jataate hain.

nannayya ne aadi parv tatha sabha parvon ka poora aur aranya parv ka kuchh ansh tak anuvaad kiya. yadyapi Andhra mahaabhaarat sthool roop se anuvaad hi hai, nannayya ne ras aur auchitya ki drushti se kuchh anshon ko sankshepat: aur kuchh anshon ko badhaakar likha jisse Andhra mahaabhaarat svatantr kaavya sa prateet hota hai. inki kavita mein 'prasannakathaakalitaarthayukti', 'akshararamyata', 'naanaaruchiraarth sooktisanpatti' ityaadi visheshataaeain pai jaati hain. inki shaili mein tatsam shabd aur sanskrut samaason ki bahulata hai arthaat‌ do tihaai sanskrut aur shesh tadbhav tatha deshya shabd yaani telugu shabd hain.

shabdon ke parimaarjan ke kaarya mein pravrutt hokar nannayya ne 'Andhra shabdachintaamani' naamak telugu bhaasha ke vyaakaran ki rachana ki. vyaakaran shaastr ki parampara ke anusaar vah pratham Andhra vyaakaran sanskrut sootron mein likha gaya. is kaaran nannayya Andhra ke aadikvi hi naheen, Andhra ke pratham vaiyaakaran bhi siddh hue aur 'vaaganushaasan' viruddh se vibhooshit hue.

aajatak jitne Andhra kavi hue un sabne nannayya ko aadikvi maankar unki prashansa ki. kehte hain, nannayya ke rachit anya granth 'indrasenavijya' tatha 'chaamundika vilaas' hain kintu in granthon ke kartrutv ke vishay mein matabhed hai. mahaakavi nannayya mahaabhaarat ka aandhreekaran poora na kar sake. kaviposhak raaja ka dehaant ho gaya. raaja ka putr kulauttungachod apne maama ke paas dakshin chala gaya. udhar veerashaiv dharm bhi apna sir uthaane laga jo vedon ki praamaanikta ko naheen maanata. doosari or veerashaiv ke pratikool vaishnavadharm ki shreevruddhi hone lagi. inheen ke beech vaidik dharm par janta ki shraddha kam hone lagi. aur is prakaar Andhra mahaabhaarat ki rachana mein vighn utpann hue. kadaachit‌ nannayya ka jeevan satr bhi kat gaya ho.

sandarbh