laala amaranaath

laala amaranaath ya naanik amaranaath Bhaarat ke cricket ke khilaadi the. unhone antararaashtreeya cricket mein Bhaarat ki or se pehla shatak jamaaya tha. ve Bhaarat ke pehle all-rounder the jinhonne balle ke alaava geind se bhi apne virodhiyon ki naak mein dam kiya. unhein Bhaarat sarkaar dvaara san 1991 mein khel ke kshetr mein padm bhooshan se sammaanit kiya tha. ve Delhi ke moolanivaasi the.

laala amaranaath ka paanch August 2000 ko 88 baras ki umr mein Delhi mein nidhan hua. tab Bhaarat ke tatkaaleen pradhaanamantri atal bihaari Vajpayee ne apne shok sandesh mein unhein bhaarateeya cricket ka aaikan karaar diya tha.

khel jeevan

England aur Bhaarat ke beech 1933 mein Mumbai jimkhaana mein bhaarateeya sarjameen par pehle test mein padaarpan karte hue laala ne 118 run ki paari kheli jis par darshakon ne jhoomate hue maidaan mein ghuskar pitch par hi unhein fool maalaaon se laad diya. 11 September 1911 ko avibhaajit Bhaarat ke kapoorathala mein janmein laala bahumukhi pratibha ke dhani the aur unhonne geindabaaji aur ballebaaji se team ke liye aham bhoomika nibhaane ke alaava chayanakarta, manager, coach aur prastota ke roop mein bhi apni pratibha ka parichay diya. varsh 1947-48 mein Australia ke daure ke saath svatantr Bhaarat ke pehle kaptaan bane laala ne 24 test mein ek shatak aur chaar ardhashatak ki madad se 24.38 ki ausat se 878 run banaane ke alaava 32.91 ki ausat se 45 wicket bhi chatakaae. unhonne 186 pratham shreni maichon mein 10,000 se adhik run banaane ke alaava 22.98 ki behatareen ausat ke saath 463 wicket bhi apne naam kiye. daaen haath ke ballebaaj aur madhyam tej gati ke geindabaaj laala ko aise cricketer ke roop mein jaana chaahata hai jinhonne bhaarateeya cricket mein raajasi varchasv ko chunauti di.

is diggaj khilaadi ko haalaanki iska khaamiyaaja bhi bhugatna pada jab 1936 mein England daure ke dauraan kaptaan vijiyaanagaram ke mahaaraaj Kumar ne 'anushaasanaheenata' ke kaaran unhein vivaadaaspad tareeke se svadesh vaapas bhej diya. laala aur unke anya saathiyon ne haalaanki aarop lagaaya ki aisa raajaneetik kaaranon se kiya gaya. iske baad laala ko agala test khelne ke liye 12 baras ka intajaar karna pada lekin unhonne haar naheen maani aur ghareloo cricket mein ranon ka anbaar lagaate rahe. antat: chayanakartaaon ko bhi unke aage jhukna pada aur unhonne 1946 mein England daure ke saath ek baar fir raashtreeya team mein vaapasi ki. haalaanki tab unki ballebaaji se jyaada dhaar unki geindabaaji mein thi.

ek saal baad vijay marchet ke team se hatne par Australia ke pehle daur par unhein bhaarateeya team ki kamaan saunpi gayi lekin us samay mahaan ballebaaj daan Bradman shaanadaar firm mein the aur Australia ne bhaarateeya team ko raund diya. laala is series ke paanch test ke dauraan naakaam rahe aur 14 ki ausat se run banaane ke alaava keval 13 wicket hi haasil kar paae lekin abhyaas maichon mein unhonne Victoria ke khilaaf 228 run ki paari kheli. neel haarve ne is paari ki taareef karte hue kaha tha ki unhonne is paari ke dauraan sarvashreshth kavar drive dekha. Bradman ko hit wicket out karne vaale laala ekamaatr geindabaaj the aur Australia ke is diggaj ne bhi unki taareef karte hue unhein cricket ka 'behatareen doot' karaar diya tha. cricket laala ke khoon mein basa tha aur unki dharohar ko unke beton sureindr amaranaath, mohindar amaranaath aur raajeindr amaranaath ne aage badhaaya. sureindr ne bhi apne pita ki tarah padaarpan match mein shatak jamaaya jabki mohindar ne Bhaarat ke liye 69 test khele.

baahari kadiyaaain