kushaan raajavansh

is lekh mein sandarbh ya sootr naheen diye gaye hain. krupaya vishvasaneeya sootron ke sandarbh jodkar is lekh mein sudhaar karein. bina sootron ki saamagri ko hataaya ja sakta hai. (May 2016)

kushaan praacheen Bhaarat ke raajavanshon mein se ek tha. kuchh itihaasakaar is vansh ko cheen se aae yuejhi logon ke mool ka maanate hai. kuchh vidvaano inka sambandh rabaatak shilaalekh par ankit shabd gusur ke jariye gurjaro se bhi bataate hai.

sarvaadhik pramaanikta ke aadhaar par kushaan vansh ko cheen se aaya hua maana gaya hai. lagbhag doosari shataabdi ipoo ke madhya mein seemaant cheen mein yuejhi naamak kabeelon ki ek jaati hua karti thi jo ki khaanaabadoshon ki tarah jeevan vyateet kiya karti thi. iska saamana hyuganu kabeelon se hua jisne inhein inke kshetr se khaded diya. hyuganu ke raaja ne hyoochi ke raaja ki hatya kar di. hyoochi raaja ki raani ke netrutv mein hyoochi vahaan se ye pashchim disha mein naye charaagaahon ki talaash mein chale. raaste mein ili nadi ke tat par inka saamana vhsun naamak kabeelon se hua. vhsun inke bhaari sankhya ke saamane tik na sake aur paraast hue. hyoochi ne unke charaagaahon par apna adhikaar kar liya. yahaan se hyoochi do bhaagon mein bant gaye, hyoochi ka jo bhaag yahaan ruk gaya vo laghu hyoochi kahalaaya aur jo bhaag yahaan se aur pashchim disha mein badha vo mahaan hyoochi kahalaaya. mahaan hyoochi ka saamana shakon se bhi hua. shakon ko inhonne paraast kar diya aur ve naye nivaason ki talaash mein uttar ke darron se Bhaarat aa gaye. hyoochi pashchim disha mein chalte hue akasaas nadi ki ghaati mein pahuainche aur vahaan ke shaantipriya nivaasion par apna adhikaar kar liya. sambhavat: inka adhikaar baiktriya par bhi raha hoga. is kshretr mein ve lagbhag 10 varsh ipoo tak shaanti se rahe. cheeni lekhak faan-ye ne likha hai ki yahaan par mahaan hyoochi 5 hisson mein vibhkt ho gaye - syoomi, kui-shuaang, suaagm, ,. baad mein kui-shuaang ne kyu-tisi-kyo ke netrutv mein anya chaar bhaagon par vijay pa liya aur kyu-tisi-kyo ko raaja bana diya gaya. kyu-tisi-kyo ne kareeb 80 saal tak shaasan kiya. uske baad uske putr yen-kaao-tchen ne shaasan sambhaala. usane bhaarateeya praant takshashila par vijay praapt kiya. cheeni saahitya mein aisa vivran milta hai ki, yen-kaao-tchen ne hyen-chaao (cheeni bhaasha mein jiska abhipraaya hai - badi nadi ke kinaare ka pradesh jo sambhavat: takshashila hi raha hoga). yahaan se kui-shuaang ki kshamata bahut badh gayi aur kaalaantar mein unhein kushaan kaha gaya.