kedaar sharma

kedaar sharma ( sanvat 1954 - sanvat 2023) chitrakaar evam hindi saahityakaar the.

jeevani

kedaar sharma ka janm maargasheersh shukl trayodashi san. 1954 mein Bhaagalpur jile ke saahabaganj mein hua tha. inki praarambhik shiksha vaheen hui kintu baad mein ye kaashi chale aae. inhonne prayaag ke Indian press mein jarman kalaakaar lui jomar ke saannidhya mein chitrakala ki saadhana ki. inka ghar ka naam Narayan tha kintu kalaajagat mein chitrakaar kedaar ke naam se prasiddh hue.

kalam aur koochi ke samaan roop se dhani the. banaaras, banaarasi rang aur jeevan inki kala aur saahitya mein vishesh: vyanjit hue. rang aur rekhaaon ke ankan mein bade siddh the. 1920 mein kedaar ji ne apni vyangya aur haasyamoolak anubhootiyon ko aakaar dena shuru kiya aur 1925 tak pauraanik, saahityik aur raajaneetik sandarbhon mein anek vyangya chitr prastut kiye. kalaakshetr mein ye pratham chitrakaar the jinhonne saanskrutik vishyon ka lekar haasya chitr banaae. inhonne vyangya chitron ki kai series chalaai thi. inmein vyangya karne ki adbhut kshamata thi. bihaari satasai ke dohon par anek vyangya chitr banaae jo prayaag ki prasiddh patrika "sarasvati" mein prakaashit hue. in chitron ki visheshata yeh rahi hai ki aakrutiyon mein mool prakruti aur bhaavana ka hanan naheen hua. inke raajaneetik kaartoonon mein bada teekhaapan tha. inhonne 'mandook mishr' ke naam se dainik "aaj" mein dhaaraavaahik roop se vyangya chitr prastut kiye. vyaktichitr, rekhaachitr aur vyangyachitron mein inki samaan gati thi. ye yathaarthavaadi shaili ke chitrakaar the. bhaarateindu aur niraala jaise saahityakaaron par inhonne prateekaatmak chitr banaae the. do yugon tak hindeejagat mein ekamaatr pustak-chitrakaar the. inke bhaavachitr bade maarmik hote the.

lekhak ke roop mein inke vyaktivyanjak nibandhon ko hindi sansaar mein maanyata mili. inke aaranbhik nibandh "khilauna", "baalasakha", "chaaaind" aur maadhuri" mein aur vyaktivyanjak nibandh "aaj" ke ravivaari ankon mein prakaashit hue jinke liye chitron ki design bhi ye svaya bana dete the. kuchh varshon tak "aaj" aur "tarangini" mein vyangya chitrakaar ke roop mein kaam kiya.

sangeet mein gahari abhiruchi thi. swayam sureele baaainsuri vaadak the aur haaramoniym bhi achha bajaate the. inke shishya kalaajagat mein bahuvidhi kalaakaar ke roop mein pratishthit hain. bhaadrapad shukl chaturthi san. 2023 vi. kaashi mein svargavaas hua.