kashyap sanhita
 |
is lekh mein sandarbh ya sootr naheen diye gaye hain. krupaya vishvasaneeya sootron ke sandarbh jodkar is lekh mein sudhaar karein. bina sootron ki saamagri ko hataaya ja sakta hai. (September 2014) |
kaashyapasanhita kaumaarabhrutya ka aarsh va aadya granth hai. maharshi kaashyap ne kaumaarabhrutya ko aayurved ke aath angon mein pratham sthaan diya hai. kaashyapasanhita ki vishyavastu ko dekhne se maaloom hota hai ki iski yojana charakasanhita ke samaan hi hai. yeh nau 'sthaanon' mein varnit hai-
- sootrasthaan, nidaanasthaan, vimaanakhilsthaan, shareerakhilsthaan, indriykhilsthaan, chikitsaakhilsthaan, siddhikhilsthaan, kalpakhilsthaan evam khilsthaan.
inmein baalakon ki utpatti, rog-nidaan, chikitsa, grah aadi ka pratishedh, tatha shaareer, indriya va vimaanasthaan mein kaumaarabhrutya vishyak saamagri prachur maatra mein upalabdh hoti hai. sabhi sthaanon mein beech-beech mein kumaaron ke vishay mein jo prashnottar prastut kiye gaye hain isse sanhita ki vishishtata jhalakati hai.
kaashyapasanhita mein kumaarabhrutya ke sambandh mein naveen tathyon ko bataaya gaya hai, jaise dantotpatti, shishuon mein mrudusved ka ullekh, aayushmaan baalak ke lakshan, vedanaadhyaaya mein vaani ke dvaara apni vedana na prakat kane vaale baalakon ke liye vibhinn cheshtaaon ke dvaara vedana ka parijnyaaan, baalakon ke fakk rog mein teen pahiyon vaale rath ka varnan, lashun kalp ke vibhinn prayogon ka varnan, tatha revateekalpaadhyaaya mein jaatahaariniyon ka vishisht varnan.
anukram
sanskaran
kashyap ya kaashyap ke naam se teen sanhitaaeain milti hain :
- 1. kashyap sanhita ya vruddhajeevakeeya tantr - isko Nepal deshavaasi, raajaguru Hemraj sharma, ne 1938 E. mein prakaashit kiya tha. yeh praacheen vilupt sanhita hai; ismein sthaan-sthaan par paath khandit hain. iska sambandh baal-rog-chikitsa se hai. ismein deshon ke naam, bhoogol tatha bahut se nae shabd aae hain.
- 2. kashyap sanhita-yeh Madras praant se prakaashit hui hai, iska vishay vish se sambandhit hai; ismein gaarudi vidya, vishhar prayog hain.
- 3. kashyap sanhita-yeh uma-maheshvar-prashnottar ke roop mein hai aur chikitsa sambandhi hai. yeh chhoti si pustak hai; jo tanjaur pustakaalaya mein hai.
kaashyap shabd gotravaachi bhi hai; mool rishi ka naam kashyap prateet hota hai. matsya puraan mein mareech ke putr kashyap ko mool gotrapravartak kaha gaya hai; parantu aage chalakar kashyap maareech bhi kaha hai. charakasanhita mein kashyap pruthak likhkar 'maareechikaashpau' yeh likha hai (charak.soo.a. 1. 8). ismein maareech kashyap ka visheshan hai. isi prakaar charak ke ek paath mein 'kaashyapo bhrungu:' yeh paath aaya hai (charak, soo.a. 1. 8). ismein kaashyayap gotrotpann bhrugu ka ullekh hai. is prakaar kaashyap shabd jahaaain gotravaachi hai, vahaaain vyaktivaachi bhi milta hai.
upalabdh kashyapasanhita
vruddhajeevakeeya tantr mein 'iti h smaah kashyap:' ya 'ityaah kashyap:', 'iti kashyap:', 'kashyapoऽbraveet' aadi vachan milte hain, isse inka aachaarya hona spasht hain. kaheen par kashyap ke liye maareech shabd bhi aaya hai. (bhojan kalpaadhyaaya-3; prushth 168; shadakalpaadhyaaya-3; pooshth 148). isse spasht hota hai ki maareech kashyap shabd ke liye hi aaya hai. anumaan hota hai, maareech ka putr kashyap tha, jisse aage kashyap gotr chala.
gaalav rishi gurudakshina mein ghodon ko dene ke liye kaasheepati divaadaas ke paas gaye the; mark mein unako himaalaya ki taraai mein maareech kashyap ka aashram mila tha (maha. udyog. 107. 3-15). kashyap sanhita mein bhi kashyap ka sthaan gangaadvaar mein bataaya gaya hai. (hutaagni hotramaaseenan gangaadvaare prajaapatim-lashunakalpaadhyaaya-3; prushth 137).
kashyap ne aayurved ka adhyayan aayurved parampara mein Indra se kiya tha. kashyap sanhita mein vruddh kashyap ke mat ka bhi ullekh milta hai (vaman virechaneeyaadhyaaya; prushth 116). iske aage hi apna mat dikhaane ke liye 'kashyapoऽbraveet' paath hai. isse prateet hota hai ki vruddh kashyap aur sanhitaakaar kashyap bhinn vyakti hain. rik sarvaanukram mein kashyap aur kaashyap ke naam se bahut se sookt aae hain. inmein kashyap ko mareechiputr kaha hai (vedaarthadeepika, pru. 91).
is prakaar se kashyap ka kaashyap ka sambandh maareech se hai. sambhavat: isi maareech kashyap ne kashyapasanhita ki rachana ki hai.
mahaabhaarat mein takshak-dansh-upaakhyaan mein bhi kashyap ka ullekh aata hai. inhonne takshak se kaate ashvatth ko punarjeevit karke apni vidya ka parichay diya tha (aadi parv. 50. 34). dalhan ne kaashyap muni ke naam se unka ek vachan uddhrut kiya hai, jiske anusaar shira aadi mein agnikrm nishiddh hai. maadhavanidaan ki madhukosh teeka mein bhi vruddh kaashyap ke naam se ek vachan vish prakaran mein diya hai. ye donon kashyap poorv kashyap se bhinn hain. sambhavat: inko gotr ke kaaran kashyap kaha gaya hai. ashtaangahrudaya mein bhi kashyap aur kashyap naam se do yog diye gaye hain. ye donon yog upalabdh kashyapasanhita se milte hain (kashyap sanhita-upodghaat, prushth 37-38).