kachhavaaha

Jaipur mein praathamik rup se jaageeradaaron ka vibhaajan 'baarah kotadi 'se aadhaarit tha, saradaaron mein sabse mukhya rajput kachhavaaha the, jo raaja ke nikat sambandhi hote the. Jaipur ke sameep sthit aamer ka kila kachhavaaha raajapooton ke gauravashaali itihaas ka gavaah hai. aamer ki ghaati mein meenaaon ko fatah kar unhonne jab aamer nagari basaai to vaheen ek pahaadi par unhonne bhavya kile ka nirmaan karaaya tha. vahi kila aaj aamer fort ke naam se vikhyaat hai.

aamer ghaati ko foolon ki ghaati kaha jaata hai. ghaati mein pravesh karte hi door se vishaal durg ki praacheer, uske gunbad, burj aur praveshadvaar najar aane lagte hain. jis pahaadi par aamer durg sthit hai uske saamane ek sundar jheel hai. ise maavatha sarovar kehte hain. jheel ke ek chhor par hi kile mein jaane ka maarg hai. jahaan ek sundar vaatika bani hai. ise raaja jayasinh ke samay mein banavaaya gaya tha. iska naam doolaaraam baag hai. baag mein kuchh chhatareenuma kaksh bane hain. vahaan ek chhota sa sangrahaalaya bhi hai. jismein dhoondhaadh kshetr ki dharoharein pradarshit hain. inmein praacheen moortiyaan, shilaalekh, shilaapatt aur sikke aadi shaamil hain. kila kareeb 150 meter ki oonchaai par sthit hai. yahaan se aage paidal dhalaan par badhate hue 10-15 minute mein kile tak pahuncha ja sakta hai. yaheen kuchh guide paryatakon ko gher lete hain. itihaas aur sthaapatya mein ruchi rakhane vaale sailaani yahaan guide jaroor karte hain. unase unhein imaarat se judi tamaam gaathaaon ki jaankaari ho jaati hai. maarg mein guide kile ke nirmaan aur kachhavaaha raajapooton ka itihaas bataane lagte hain.


aamer ke ateet par drushti daalein to pata chalta hai ki chh: shataabdiyon tak yeh nagari dhoondhaadh kshetr ke sooryavanshi kachhavaahon ki rajdhani rahi hai. baluaa patthar se bane aamer ke kile ka nirmaan 1558 mein raaja bhaaramal ne shuroo karavaaya tha. nirmaan ki prakriya baad mein raaja Mansingh aur raaja jayasinh ke samay mein bhi jaari rahi. kareeb sau varsh ke antaraal ke baad raaja jayasinh savaai ke kaal mein yeh kila ban kar poora hua. usi daur mein kachhavaaha rajput aur mugalon ke beech madhur sambandh bhi bane, jab raaja bhaaramal ki putri ka vivaah Akbar se hua tha. baad mein raaja Mansingh Akbar ke navarat‍aa‌aanon mein shaamil hue aur unke senaapati bane. vahi aamer ghaati aur is kile ka svarnim kaal tha.

kachhavaahon dvaara apni rajdhani Jaipur sthaanaantarit karne ke baad aamer ka vaibhav lupt hone laga. lekin yeh gauravashaali kila aaj bhi usi shaan se khada hai. baahari paridrushya mein yeh kila mugal shaili se prabhaavit dikhaai padata hai. jabki andar se yeh poornataya rajput sthaapatya shaili mein hai. paryatak aamer kile ke oonche meharaabadaar poorvi dwaar se pravesh karte hain. yeh dwaar soorajapol kahalaata hai. iske saamane ek bada sa chauk sthit hai. ise jaleb chauk kehte hain. aamer fort pahaadi ke dhalaan par vibhinn sopaanon par bana hai. jaleb chauk inmein sabse nichle sopaan par sthit hai. vishaal chauk ke teen or kuchh kaksh bane hain. bataate hain ki us samay yahaan sainya aavaas tatha ghudasaal aadi hote the. aaj inmein haindeektraaft aadi ki dukaanein hain. iske pashchim disha mein chaandapol naamak ek anya dwaar hai.

mahalon ki or

jaleb chauk se sailaani mahalon ki or badhate hain to vahaan do seedhiyaan najar aati hain. inmein ek seedhi shila devi mandir ki or jaati hai. maanyata hai ki shila devi raajaaon ki kuladevi theen. mandir ke garbhagruh mein sthaapit pratima raaja Mansingh dvaara 1605 mein sthaapit ki gayi thi. mandir ke dwaar par chaandi ke kalaatmak darvaaje lage hain. mandir mein darshan karne ke baad paryatak doosari seedhiyon se sinhapol mein pravesh karte hain. yeh ek dohara dwaar hai. isse andar jaate hi saamane deevaan-A-aam hai. yeh ek vishaal aayataakaar bhavan hai. iske madhya darbaar lagta tha aur raaja janta se milte the. is haal ka nirmaan raaja jayasinh pratham ke kaal mein hua tha. teen or se khule is bhavan ke chaaron or laal patthar ke khanbon ki do paktiyaan hain. deevaan-A-aam mein kul chaalees khanbe hain. inmein kuchh sangamaramar ke khambe hain. iske dakshin disha mein aaleeshaan ganesh pol najar aata hai. yeh is kile ka sundaratam dwaar hai. jiska nirmaan jayasinh savaai ne karavaaya tha. meharaabanuma is shaanadaar dwaar ke teen or bhavya nakkaashi aur chitrakaari dekhne ko milti hai. dwaar mein peetal ke sundar darvaaje jade hain. dwaar ke oopari hisse mein ganesh ji ki chhoti si pratima viraajamaan hai. ganeshapol se andar jaate hi shaanadaar mahalon ka silsila shuroo ho jaata hai. inmein sarvapramukh sheesh mahal hai. yeh vaastav mein deevaan-A-khaas hai. ise jayamandir bhi kehte hain. iski deevaaron par sheeshe ki aaleeshaan pachcheekaari aur manamohak nakkaashi dekhne laayak hai. iski chhat mein bhi sheeshe jade hain. deepak ya momabati ka jara sa prakaash karte hi yeh sheeshamahal jagamaga uthata hai. pratyek sheeshe mein jab prakaash ka pratibinb dikhta hai to aisa lagta hai jaise aasmaan mein asankhya taare timtima uthe hon. deevaan A khaas mein do vishaal kamre hain. aage vaale kamre mein teen taraf sundar baraamade bane hain.

raajaaon ka niji mahal

aage badhein to sukhanivaas hai. yeh aamer ke raajaaon ka niji mahal tha. iske aage ek hara-bhara udyaan hai. yeh udyaan mugal udyaanon ki chaarabaag shaili mein banaaya gaya tha. madhya mein lage favvaare aur jal pravaah ke liye bani naaliyon mein jab paani bahata to vaataavaran sheetal ho jaata tha. greeshm ritu mein yeh unka priya aavaas hota tha. sukhanivaas ke chandan ke darvaajon par pachcheekaari bhi is udyaan ke design ke anuroop ki gayi hai. yeh kaareegari haathi daant se ki gayi hai.

yash mandir naamak mahal deevaan-A-khaas ke oopar bana hai. yahaan peechhe ki or bani sangamaramar ki jaaliyaan aur jharokhe bahut shaanadaar lagte hain. inse maavatha jheel aur aamer ghaati ka vihangam drushya dikhaai padata hai. iske paas hi suhaag mandir hai. yeh ganeshapol ke oopari bhaag mein bana hai. yahaan bhi sangamaramar ke baareek design waali jaaliyaan lagi hain. jinmein chhote-chhote jharokhe bhi bane hain. ranivaas ki striyaan yahaan se deevaan-A-aam mein hone waali gatividhiyaan dekha karateen theen. aamer fort ke teesare sopaan par janaana mahal hai. yeh yahaan ka sabse praacheen mahal bataaya jaata hai. jise raaja Mansingh ne banavaaya tha. ismein rangeen taails lagi theen. jo ab kshatigrast ho chuki hain. iske nikat hi parichaarikaaon ke pravaas ke alaava rasoighar aur bhaadaaragruh aadi bane hain.

kaise pahunchein

aamer ka kila gulaabi nagari Jaipur se keval 11 kilometer door hai. kile tak jaane ke liye haathi ki savaari bhi ki ja sakti hai. haalaanki yeh chhota sa trip kaafi mahanga hota hai. aamer aane vaale sailaani yahaan ki galiyon mein bhi ghoomane nikal padate hain. jagat shiromani mandir unhein bahut prabhaavit karta hai. ise meeraabaai mandir bhi kehte hain. iske alaava praacheen narasinh mandir, panna miyaan ki baavadi tatha kuchh haveliyon ke bhagnaavashesh bhi yahaan dekhe ja sakte hain. yahaan se oopar pahaadi par aage jaakar jayagadh fort bhi dekha ja sakta hai. jyaadaatar sailaani Jaipur se aakar yeh kila dekh jaate hain. yahaan ghoomane ka upayukt mausam August se April tak hai. aamer bhraman vaise to Jaipur yaatra ka hissa hi hai. lekin kile ko achhi tarah dekhna ho to adhik samay lekar aana chaahiye. aamer ke bhavya kile ko dekhne ke baad hamein madhyakaaleen raajaaon ke vaibhav ka anumaan lagta hai.