janamejaya

janamejaya mahaabhaarat ke anusaar kuruvansh ka raaja tha. mahaabhaarat yuddh mein arjunaputr abhimnyu jis samay maara gaya, usaki patni uttara garbhavati thi. uske garbh se raaja pareekshit ka janm hua jo mahaabhaarat yuddh ke baad hastinaapur ki gaddi par baitha. janamejaya isi pareekshit tatha madraavati ka putr tha. mahaabhaarat ke anusaar (1.95.85) madraavati unki janani theen, kintu bhagavat puraan ke anusaar (1.16.2), unki maata iraavati theen, jo ki uttar ki putri theen.[1]

mahaabhaarat ke sandarbh mein

janamejaya aur unke bhaai

mahaabhaarat mein janamejaya ke chh: aur bhaai bataaye gaye hain. yeh bhaai hain kakshasen, ugrasen, chitrasen, indrasen, sushen tatha nakhyasen.[2] mahaakaavya ke aarambh ke parvon mein janamejaya ki takshashila tatha sarparaaj takshak ke oopar vijay ke prasang hain. samraat janamejaya apne pita pareekshit ki mrutyu ke pashchaat hastinaapur ki raajagaddi par viraajamaan huye. pauraanik katha ke anusaar pareekshit paandu ke ekamaatr vanshaj the. unako kisi rishi ne shaap diya tha ki vah sarpadansh se mrutyu ko praapt honge. aisa hi hua aur sarparaaj takshak ke hi kaaran yeh sambhav hua. janamejaya is prakaran se bahut aahat huye. unhonne saare sarpavansh ka samool naash karne ka nishchaya kiya. isi uddeshya se unhonne sarp satr ya sarp yagya ke aayojan ka nishchaya kiya. yeh yagya itna bhayankar tha ki vishv ke saare sarpon ka mahaavinaash hone laga. us samay ek baal rishi astik us yagya parisar mein aaye. unki maata maanasa ek naag theen tatha unke pita ek braahman the.
is sandarbh mein yeh bataana uchit hoga ki kuchh jaatiyon ne to unke reeti-rivaaj sveekaar kar liye kintu kuchh ne isse saaf inkaar kar diya. in jan-jaatiyon ko aarya pruthak-pruthak naam de dete the aur kyonki us yug mein unki prabhuta thi, is kaaran se unke dvaara likhe ya bole gaye granthon mein yahi naam aaj bhi ujaagar hote hain. aaryon ne aisi jan-jaatiyon ko, jo unke vash mein na aa sake aise naam de daale jinse vah swayam bhayabheet hote hon. udaaharan ke liye naag, asur, daanav ityaadi. to yadi janamejaya naag vansh ka samool naash karne ja rahe the, to usaka abhipraaya yeh hai ki aaryon ki drushti mein Bhaarat ki koi jan-jaati, jo unke vash mein naheen thi ya jisne unka dharm sveekaara naheen tha aur jiska unhonne naag se naamakaran kar diya tha, us jan-jaati ka vinaash hone ja raha tha. astik ke aagrah ke kaaran janamejaya ne sarp satr ya yagya samaapt kar diya.
tab ved vyaas ke sabse priya shishya vaishampaayan vahaaain padhaare. janamejaya ne unase apne poorvajon ke baare mein jaankaari leni chaahi. tab rishi vaishampaayan ne janamejaya ko bharat se lekar kurukshetr yuddh tak kuru vansh ka saara vruttaant sunaaya. aur ise ugrashrav sauti ne bhi suna aur naimishaaranya mein jaakar saare rishi samooh, jinke pramukh shaunak rishi the, ko sunaaya.

inhein bhi dekhein

sandarbh

  1. Raychaudhuri, H.C. (1972). Political History of Ancient India: From the Accession of Parikshit to the Extinction of the Gupta Dynasty. University of Calcutta.
  2. University of Calcutta (Dept. of Letters), san (1923). Journal of the Department of Letters.