jaadopatiya chitrakala
jaadopatiya chitrakala shaili Jharkhand-Bihar ki seema par sadiyon nivaas karti aa rahe santaal janajaati ki vah lokashaili hai jo is samaaj ke itihaas aur darshan ko poornat: abhivyakt karne ki kshamata rakhati hai. yeh santaali samaaj se judi praacheen lokakala hai, jo is samaaj ke udbhav vikaas, rahan-sahan, dhaarmik vishvaas evam naitikta ko vyakt karti hai. is shaili ke kalaakaar vansh parampara ke aadhaar par is kala ko apnaate aae hain. inke naam ke saath jaadopatiya shabd juda rahata hai. jaado santaalon mein purohiton ko kaha jaata tha. ve is chitrakala ke sahaare apni jeevika chalaate the. ve is chitrakala ko lekar gaanv -gaanv mein ghoomate the aur ise dikhaate samay layabaddh svar mein chitrit vishay aur katha ko geet ke roop mein logon ke saamane rakhate the. jisse santaali apni saskruti ke baare jaan sake. apni is sangeetamaya prastuti ke baad ve logon se dakshina lete the. chitrakala ki is shaili ko kapade ya kaagaj par banaaya jaata hai. kapade par sooi-dhaage se si kar 5 se 20 feet lamba aur dedh ya do feet chauda pat taiyaar kiya jaata hai. isam jyaadaatar vaise chitron ka chayan kiya jaata hai jo is samaaj ke saanskrutik, naitik drushyo ko dikha sakein.[1]