haumeya (bauna grah)

haumeya aur uske upagrahon (hiiaaka aur naamaaka) ka kaalpanik chitran

haumeya hamaare saur mandal ke kaaipar ghere mein sthit ek bauna grah hai. antarraashtreeya khagoleeya sangh dvaara rakha gaya iska aupachaarik naam "136108 haumeya" hai. yeh hamaare saur mandal ka chautha sab se bada bauna grah hai aur iska dravyamaan yam (plooto) ka ek-tihaai hai. haumeya ka ausat vyaas (daayaameetar) lagbhag 1,436 kimi hai. iski khoj 2004 mein ki gayi thi. haumeya ka aakaar saare gyaat baune grahon mein anootha hai - jahaaain baaki sab gol hain yeh ek pichka hua gola hai. haumeya ki chaudaai usaki lambaai se do guna zyaada hai. iske is ajeeb aakaar ke saath-saath ismein kuchh aur bhi bhinnataaeain hain - yeh bahut teji se apne ghoornan aksh (aiksis) par ghoomta hai aur iska ghanatv baahari saur mandal ke anya baune grahon se adhik hai. in visheshataaon ko dekhkar lagta hai ke haumeya ateet mein kisi bhayankar takaraav ka nateeja hai.

anukram

roop-rang

haumeya ki satah ka elbeedo (safedapan ya chamakeelaapan) 0.7 se 0.8 ke beech hai. yeh kaafi ooncha maana jaata hai aur vaigyaaniko ki soch hai ke yeh haumeya ki satah par jami paani ki barf ki vajah se hai. baune grahon mein andar ek patthareela kendra hota hai aur uske oopar barf ki moti tah hoti hai jismein paani, methane, naaitrojan ki barfein milti hain. lekin haumeya par oopari barf ki chaadar bahut patali hai, jis se usaka ghanatv anya baune grahon ki tulana mein adhik hai. haumeya ka ghoornan bahut tej hai - jahaaain pruthvi ko ek dafa ghoomane mein lagbhag 24 ghante lagte hain, vahaaain haumeya 4 ghante se jra kam mein ek dafa poora ghoom jaata hai. khagolashaastri samajhte hain ke haumeya ka pichka aakaar isi tej ghoornan ka nateeja hai. haumeya ke itihaas ke baare mein andaaja lagte hue ve samajhte hain ke ek bahut bada takaraav hua hoga jismein haumeya ke oopar ki baraf ka hissa ud gaya aur jyaadaatar patthar-hi-patthar bacha. usi takaraav ne shaayad haumeya ko teji se ghoomta hua chhod diya.

haumeya ki satah vaise to safed hai, lekin usapar ek laal rang ka kshetr dekha gaya hai. sambhav hai ke is kshetr mein plooto ki tarah anya laalima pradaan karne vaale padaarth hon.

upagrah

haumeya ki parikrama karte hue do chhote se upagrah bhi milein hain jinke naam hiiaaka aur naamaaka hain.

naam ka srot

jis doorabeenashaala (obajravatori) se haumeya, hiiaaka aur naamaaka paae gaye, ve havaai mein sthit hain, isliye unke naam praacheen havaaiyan dharm par rakhe gaye. ismein haumeya bachchon ki janmane ki devi maani jaati theen aur hiiaaka aur naamaaka unki do betiyaaain theen. angreji mein haumeya ko "Haumea", hiiaaka ko "Hi'iaka" aur naamaaka ko "Namaka" likha jaata hai.

inhein bhi dekhein