gokaak

gokaak jalaprapaat

gokaak Karnataka ke belagaaainv janapad mein gokaak taaluke ka pradhaan nagar hai. yeh dakshini relamaarg (pehle ka dakshin maraatha relamaarg) par sthit gokaak station se 12 kimi door sthit hai aur raajamaarg dvaara usase juda hua hai. pehle yahaaain kapadon ki bunaai tatha raingaai ka vyavasaaya bahut unnat tha jo baad mein avanat ho gaya. halki lakdi tatha sthaaneeya kshetr mein praapya ek vishesh prakaar ki mitti se nirmit khilaune tatha chitraadi banaane ka vyavasaaya prasiddh hai.

gokaak praacheen kasba hai. iska pratham ullekh 1047 E. ke ek anulekh (Inscription) mein 'gokaage' naam se praapya hai. sambhavat: yeh hinduon ka pavitra sthal raha hai jo gaoo (go) se sambandhit hai. 1685 E. mein yeh 'sarkaar' (madhyakaaleen janapad) ka pradhaan kendra tha. 1717-1754 kaal mein yeh sabaanoor ke navaabon ke adheen raha jinhonne yahaaain masjid tatha ganjeekhaane ka nirmaan karaaya. pun: yeh hinduon ke adheen hua. san 1836 mein gokaak taaluka tatha nagar angarejon ke adheen ho gaye.

nagar se pashchimottar disha mein tatha dakshin relamaarg par sthit dhrupadal station se teen meal door sthit gokaak prapaat hai jahaaain ghaataprabha nadi baluaa patthar ke sheersh se 170 foot gaharaai mein girti hai. prapaat ke baad ek sundar khaddamaya ghaati (gorge) ka nirmaan karti hai. yahaaain prati varsh hajaaron paryatak aate hain. prapaat ke sameep hi nadi ke daaeain tat par 1887 E. mein sooti kapde ka kaarkhaana nirmit hua. kaarkhaane ko bijli dene tatha aaspaas ke kshetr mein sinchaai karne ke liye 'gokaak jalaashaya' ka nirmaan hua.