bruhaspati (jyotish)

bruhaspati
Brihaspati.jpg
bruhaspati (grah) ke svaami evam shiksha ke svaami
devanaagari bruhaspati
tamil பaa்aaறaaுaaஹaaசaa்aaபaaதaaி
sahabaddhata grah evam devataaon ke guru
aavaas bruhaspati mandal ya lok
mantra Om brun bruhaspataye nam:.
patni taara
vaahan haathi/ aath ghodon vaale rath

bruhaspati, jinhein "praarthana ya bhakti ka svaami" maana gaya hai,[1] aur braahmanaspati tatha devaguru (devataaon ke guru) bhi kahalaate hain, ek hindu devata evam vaidik aaraadhya hain. inhein sheel aur dharm ka avataar maana jaata hai aur ye devataaon ke liye praarthana aur bali ya havi ke pramukh pradaata hain. is prakaar ye manushyon aur devataaon ke beech madhyasthata karte hain.

bruhaspati hindu devataaon ke guru hain aur daitya guru shukraachaarya ke kattar virodhi rahe hain. ye navagrahon ke samooh ke naayak bhi maane jaate hain tabhi inhein ganapati bhi kaha jaata hai. ye gyaan aur vaagmita ke devata maane jaate hain. inhonne hi baarhaspatya sootr ki rachana ki thi. inka varn suvarn ya peela maana jaata hai aur inke paas dand, kamal aur japamaala rahati hai. ye saptavaar mein bruhaspativaar ke svaami maane jaate hain.[2] jyotish mein inhein bruhaspati (grah) ka svaami maana jaata hai.

hindu dharm mein

rigved ke anusaar bruhaspati ko angirs rishi ka putr maana jaata hai[3] aur Shiv puraan ke anusaar inhein surup ka putr maana jaata hai. inke do bhraata hain: utathya evam samvartan. inki teen patniyaan hain. pratham patni shubha ne saat putriyon bhaanumati, raaka, archishmati, mahaamati, mahishmati, sinivli evam havishmati ko janm diya tha. doosari patni taara se inke saat putr evam ek putri hain tatha truteeya patni mamata se do putr hue kach aur bharadvaaj.

bruhaspati ne prabhaas teerth ke tat Bhagwan Shiv ki akhand tapasya kar devaguru ki padavi paayi. tabhi bhagavaan Shiv ne prasann hokar inhein navagrah mein ek sthaan bhi diya. kach bruhaspati ka putr tha ya bhraata, is vishay mein matabhed hain. kintu mahaabhaarat ke anusaar kach inka bhraata hi tha. Bhardwaj gotr ke sabhi braahman inke vanshaj maane jaate hain.

jyotish mein

bruhaspati taara ke sang

jyotish ke anusaar bruhaspati isi naan ke grah ke svaami maane jaate hain aur navagrahon mein gine jaate hain. inhein guru, chura ya devaguru bhi kaha jaata hai. inhein kisi bhi grah se atyadhik shubh grah maana jaata hai. guru ya bruhaspati dhanu raashi aur meen raashi ke svaami hain. bruhaspati grah kark raashi mein uchch bhaav mein rahata hai aur makar raashi mein neech banta hai. soorya chandrama aur mangal grah bruhaspati ke liye mitr grah hai, budh shatru hai aur shani tatasth hai. bruhaspati ke teen nakshatr punarvasu, vishaakha, poorva bhaadrapad hote hain.[4]

guru ko vaidik jyotish mein aakaash ka tattv maana gaya hai. iska gun vishaalata, vikaas aur vyakti ki kundali aur jeevan mein vistaar ka sanket hota hai. guru pichhle janmon ke karm, dharm, darshan, gyaan aur santaanon se sambandhit vishyon ke santulan ka pratinidhitv karta hai. yeh shikshan, shiksha aur gyaan ke prasaar se sambaddh hai. jinki kundali mein bruhaspati uchch hota hai, ve manushya jeevan ki pragati ke saath saath kuchh mote ya vasaayukt hote jaate hain, kintu unka saamraajya aur samruddhi badh jaati hai. madhumeh ka seedha sambandh kundali ke bruhaspati se maana jaata hai. paaramparik hindu jyotish ke anusaar guru ki pooja aaraadhan pet ko prabhaavit karne waali beemaariyon se chhutakaara dila sakta hai tatha paapon ka shaman karta hai.

nimn vastuen bruhaspati se judi hoti hain: peela rang, svarn dhaatu, peela ratn pukharaaj evam peela neelam, sheet ritu (him), poorv disha, antariksh evam aakaash tattv.[4] iski dasha (vishmottari dasha) solah varsh hoti hai.


sandarbh

  1. Monier-Williams, also "he is the chief offerer of prayers and sacrifices, and therefore represented as the type of the priestly order, and the Purohita of the gods with whom he intercedes for men"
  2. Coleman, Charles. Mythology of the Hindus, p. 133
  3. rigved 4.40.1
  4. a aa bruhaspati. abhigman tithi: 28 September 2012