bhoomadhya saagar

bhoomadhya saagar (Mediterrajean sea) pruthvi ka ek saagar jo uttari Africa, Europe, anaatoliya tatha madhya-poorv ke beech sthit hai. iska kshetrafal lagbhag 25 lakh vargakilomeetar hai jo Bhaarat ke kshetrafal ka lagbhag teen-chauthaai hai. praacheen kaal mein yoonaan, anaatoliya, kaarthej, Spain, rom, jerushalam, arab tatha misr jaise pradeshon tatha nagaron ke beech sthit hone ki vajah se ise bhoomadhya (dharati ke beech ka) saagar kehte the. yeh atalaantik mahaasaagar se jibraaltar dvaara juda hai jo keval 14 kilometer chauda ek jaladamaroomadhya hai.

bhoomadhya saagar ka maanachitr

parichay

bhoomadhya saagar ya room saagar sthal se ghire hue saagaron mein sabse mahatvapoorn evam sabse bada saagar hai. yeh dakshin mein Africa, uttar mein Europe evam poorv mein Asia mahaadveepon se ghira hua hai. iski lanbaai jibraultar se lekar siriya tat tak 2,200 meal tatha uttar se dakshin ki chaudaai 1,200 meal hai. yeh pashchim mein lagbhag nau meal chaude jibraultar, uttar-poorv mein ek meal chaude maaramara jaladamaroomadhyon se tatha dakshin-poorv mein 103 meal lambi svej nahar dvaara laal saagar se juda hai. aisa kaha jaata hai ki kisi samay mein morauko, Spain tatha Europe aur Asia mein sthit tarki ke donon bhaag aapas mein jude the, jo kisi kaaran se ab ek doosare se alag alag ho gaye hain. saagar ke pashchimi bhaag ki ausat gaharaai 4,692 foot hai. adhiktam gaharaai maulta evam kreet dveepon ke madhya 14,400 foot tatha kam se kam gaharaai aidriaitik saagar mein 794 foot hai.

bhoogarbh vidya ke visheshagyon ke anusaar yeh praacheen teetheej saagar ka hi ek ang hai. Bhaarat aur madhya poorv ki sabhyata isi saagar dvaara Europe mahaadveep mein faili. is saagar mein anek dweep hain, jinmein poorv se pashchim saaipras, rodj, kreet, kaarfoo, maulta, sisili, saardiniya, kaursika aur bailiyerik dweep pramukh hain. ismein dveepon evam praayadveepon ke madhya bhinn bhinn naam ke saagar saath hain jaise saardiniya aur Italy ke madhya tirheniyn saagar, Italy evam baulkan praayadveep ke madhya aidriaitik saagar evam yoonaan tatha tarki ke madhya ijiain saagar. isi prakaar ismein kai khadiyaaain bhi hain.

is saagar ki utpatti truteeya mahaakalp (Tertiary era) mein hui thi, jabki dakshin Europe ki naveen parvatashreniyon ka nirmaan hua. is kaaran samudratateeya bhaagon mein bhookamp aaya karte hain. jvaalaamukhi parvaton ki peti poorv se pashchim ko chali gayi hai. saagar ke pashchim ka jal poorv ke jal se kuchh thanda tatha svachh rahata hai, evam poorv ka jal pashchim ki apeksha adhik kshaareeya hai. pashchimi bhaag ke jal ki satah ka oopari taap lagbhag 11.7 degree sein0 tatha poorvi bhaag ke jal ki satah ka taap February mein 17 degree sein0 se August mein lagbhag 27 degree sein0 ke beech rahata hain. kaala saagar ke meethe paani ke kaaran niktavarti samudra ka khaaraapan kam hai. ismein girne waali nadiyon mein ebron, ron, son, dooraans, aarno, taaibar, beltoorni, po, vaaradaar, strooma evam neel aadi pramukh hain. iske sameepavarti bhaagon mein lanb, garam, shushk tatha svachh garamiyaaain evam chhoti, thandi tatha nam sardiyaaain rahati hain. yadyapi bhoopadhyasaagar praacheen kaal se hi vyaapaarik mahatva ka raha hai, tathaapi 1868 i0 mein svej nahar ke khul jaane ke kaaran yeh ek mahatvapoorn antararaashtreeya vyaapaarik maarg ban gaya hai.