ashvineekumaar (pauraanik paatr)

vaidik saahitya aur hindu dharm mein ashvinau yaani do ashvinon ka ullekh devata ke roop mein milta hai jinhein ashvineekumaar ke naam se jaana jaata hai . rigved (1.3, 1.22, 1.34) ke alaave mahaabhaarat mein bhi inka varnan hai . vaidik vyaakhya ke anusaar gunon se ye soorya se utpann maane jaate hain . pauraanik kathaaon mein ashvineekumaar tvashta ki putri prabha naam ki stri se uptann soorya ke do putr. ve aayurved ke aadi aachaarya maane jaate hain.

bhaarateeya darshan ke vidvaan udayaveer shaastri ne vaisheshik shaastr ki vyaakhya mein ashvinon ko vidyut-chumbakatv bataaya hai [1]jo aapas mein jude rahate hain aur soorya se utpann hue hain . iske alaave ye ashv (drut) gati se chalne vaale yaani aashu bhi hain - inke naam ka mool yahi hai .

pauraanik vivran

ek baar soorya tej ko sahan karne mein asamarth hokar prabha apni do santati yam aur yamuna tatha apni chhaaya chhodkar chupake se bhaag gayi aur ghodi bankar tap karne lagi. is chhaaya se bhi soorya ko do santati hui. shani aur taapti. jab chhaaya ne prabha ki santati ka anaadar aarambh kiya, tab yeh baat khul gayi ki prabha to bhaag gayi hai. iske uparaatan soorya ghoda bankar prabha ke paas, jo ashvini ke roop mein thi, gaye. is sanyog se donon ashvineekumaaron ki utpatti hui jo devataaon ke vaidya hain.

(2) do kalpit devata jo prabhaat ke samay ghodon ya pakshiyon se jute hue sone ke rath par chadhkar aakaash mein nikalte hain. vishesha—aakahate hai ki yeh logon ke sukh saubhaagya pradaan karte hain aur unke dukh tatha daridrata aadi harate hain. kaheen kaheen yahi ashvineekumaar bhi maane gaye hain. kehte hain ki dadheechi se madhu-vidya seekhane ke liye inhonne unka sir kaatkar alag rakh diya tha aur unke dhadpar ghode ka sir rakh diya tha; aur tab unase madhuvidya seekhi thi.

ashvineekumaar ashvedav, prabhaat ke judvein devata dyaus ke putr, yuva aur sundar. inke liye 'naasatyau' visheshan bhi prayukt hota hai. inke rath par patni soorya viraajati hai aur rath ki gati se soorya ki utpati hoti hai. ye devachikitsak aur rogamukt karanevaale hain. inki utpati nishchit naheen ki vah prabhaat aur sandhya ke taaron se hai ya godhooli ya ardh prakaash se. parantu unka sambandh raatri aur diwas ke sandhikaal se rigved ne kiya hai. unki stuti rigved ki anek richaaon mein ki gayi hai. ve kumaariyon ko pati, vruddhon ko taaroonya, andhon ko netr denevaale kahe gaye hain. mahaabhaarat ke anusaar nakul aur sahadev unheen ke putr the.

sandarbh

rigved mein 376 vaar inka varnan hai, jo 57 richaaon mein sangruheet hain: 1.3, 1.22, 1.34, 1.46-47, 1.112, 1.116-120 (c.f. Vishpala), 1.157-158, 1.180-184, 2.20, 3.58, 4.43-45, 5.73-78, 6.62-63, 7.67-74, 8.5, 8.8-10, 8.22, 8.26, 8.35, 8.57, 8.73, 8.85-87, 10.24, 10.39-41, 10.143.

srot

  1. vaisheshik darshanam, san 2012, prushth 413