antyeshti kriya

antim sanskaar ya antyeshti kriya hinduon ke pramukh sanskaaron mein se ek hai. sanskaar ka taatparya hinduon dvaara jeevan ke vibhinn charanon mein kiye jaanevaale dhaarmik karmakaand se hai. yeh hindu maanyata ke anusaar solah sanskaaron mein se ek sanskaar hai. antim sanskaar hinduon ke pruthvi par bitaaye gaye jeevan ka aakhiri sanskaar hota hai jise vyakti ki mrutyu ke pashchaat mrutak ke parijanon dvaara sampann kiya jaata hai. aamtaur par hinduon ko marne ke baad agni ki chita par jalaaya jaata hai jismein shav ko lakdi ke dher par rakhakar pehle mrutaatma ko mukhaagni di jaati hai aur tatpashchaat uske shareer ko agni ko samarpit kiya jaata hai. shavadaah ke baad mrutak ki asthiyaaain jama ki jaati hai aur use kisi jalastrot mein, aamtaur par ganga mein pravaahit ki jaati hai. jiske baad lagbhag terah dinon tak shraaddhakarm kiya jaata hai. mrutaatma ki shaanti ke liye daan diye jaate hain aur braamhan samudaaya ko bhojan karaaya jaata hai. baad mein log pindadaan ke liye kaashi ya gaya mein jaakar pindadaan ki prakriya poori karte hain.