aarti

adhik vikalpon ke liye yahaan jaaen - aarti (bahuviklpi)

mandir mein bhagavaan ki moorti ki aarti karta hua ek pujaari

aarti hindu upaasana ki ek vidhi hai. ismein jalati hui lau ya iske samaan kuchh khaas vastuon se aaraadhya ke saamaane ek vishesh vidhi se ghumaai jaati hai. ye lau ghi ya tel ke deeye ki ho sakti hai ya Kapoor ki. ismein vaikalpik roop se, ghi, dhoop tatha sugandhit padaarthon ko bhi milaaya jaata hai. kai baar iske saath sangeet (bhajan) tatha nrutya bhi hota hai. mandiron mein ise praat:, saanya evam raatri (shayan) mein dwaar ke band hone se pehle kiya jaata hai. praacheen kaal mein yeh vyaapak paimaane par prayog kiya jaata tha. tamil bhaasha mein ise deep aaraadhanai kehte hain.

saamaanyat: pooja ke ant mein aaraadhya Bhagwan ki aarti karte hain. aarti mein kai saamagriyon ka prayog kiya jaata hai. in sabka vishesh arth hota hai. aisi maanyata hai ki na keval aarti karne, balki ismein sammilit hone par bhi bahut punya milta hai. kisi bhi devata ki aarti karte samay unhein teen baar pushp arpit karne chaahiyein. is beech dhol, nagaade, ghadiyaal aadi bhi bajaaye jaate hain.[1]

anukram

vidhi

ganga maiya ki dhoop-lobaan se aarti, Varanasi ka uthata hua dhuaan

aarti karte hue bhakt ke maan mein aisi bhaavana honi chaahiye, maano vah panch-praanon ki sahaayata se ishvar ki aarti utaar raha ho. ghi ki jyoti jeev ke aatma ki jyoti ka prateek maani jaati hai. yadi bhakt antarman se ishvar ko pukaarate hain, to yeh panchaarati kahalaati hai. aarti praay: din mein ek se paanch baar ki jaati hai. ise har prakaar ke dhaamik samaaroh evam tyauhaaron mein pooja ke ant mein karte hain. ek paatr mein shuddh ghi lekar usamein visham sankhya (jaise 3, 5 ya 7) mein battiyaan jalaakar aarti ki jaati hai. iske alaava Kapoor se bhi aarti kar sakte hain. saamaanya taur par paanch battiyon se aarti ki jaati hai, jise panch pradeep bhi kehte hain.[2] aarti paanch prakaar se ki jaati hai. pehli deepamaala se, doosari jal se bhare shankh se, teesari dhule hue vastr se, chauthi aam aur peepal aadi ke patton se aur paanchaveen saashtaang arthaat shareer ke paanchon bhaag (mastishk, hrudaya, donon kandhe, haath va ghutne) se. panch-praanon ki prateek aarti maanav shareer ke panch-praanon ki prateek maani jaati hai.[1]

Varanasi mein dashaashvamedh ghaat par ganga maiya ki aarti

aarti ki thaali ya deepak (ya sahasr deep) ko isht Dave ki moorti ke samaksh oopar se neeche, golaakaar ghumaaya jaata hai. ise ghumaane ki ek nishchit sankhya bhi ho sakti hai, va gole ke vyaas bhi kai ho sakte hain. iske saath aarti gaan bhi samooh dvaara gaaya jaata hai jisko sangeet aadi ki sangat bhi di jaati hai. aarti hone ke baad pandit ya aarti karne wala, aarti ke deepak ko upasthit bhakt-samooh mein ghumaata hai, va log apne donon haathon ko neeche ko ulata kar jod lete hain va aarti par ghuma kar apne mastak ko lagaate hain. iske do kaaran bataaye jaate hain. ek maanyata anusaar ishvar ki shakti us aarti mein sama jaati hai, jiska ansh bhakt mil kar apne apne mastak par le lete hain. doosari maanayata anusa ishvar ki nazar utaari jaati hai, ya balaaen li jaati hain, va bhaktajan use is prakaar apne oopar lene ki bhaavana karte hain, jis praka ek maan apne bachchon ki balaaen le leti hai. ye maatr saanketik hota hai, asal mein jiska uddeshya ishvar ke prati apna samarpan va prem jataana hota hai.

thaal

aarti ka thaal dhaatu ka bana hota hai, jo praay: peetal, taanba, chaandi ya sona ka ho sakta hai. ismein ek gundhe hue aate ka, dhaatu ka, geeli mitti aadi ka deepak rakha hota hai. ye deepak gol, ya panchamukhi, sapt mukhi, adhik visham sankhya mukhi ho sakta hai. ise tel ya shuddh ghi dvaara rui ki batti se jalaaya gaya hota hai. praay: tel ka prayog raksha deepakon mein kiya jaata hai, va aarti deepakon mein ghi ka hi prayog karte hain. batti ke sthaan par Kapoor bhi prayog ki ja sakti hai. is thaali mein deepak ke alaava pooja ke fool, dhoop-agarabatti aadi bhi rakhe ho sakte hain. iske sthaan par saamaanya pooja ki thaali bhi prayog ki ja sakti hai. kai sthaanon par, visheshakar nadiyon ki aarti ke liye thaali ki jagah aarti deepak prayog hote hain. inmein battiyon ki sankhya 101 bhi ho sakti hai. inhein shat deepak ya sahasradeep bhi kaha jaata hai. ye vishesh dhyaanayogya baat hai, ki aarti kabhi sam sankhya deepakon se naheen ki jaati hai.

saamagri ka mahatva

aarti ke sahasradeep ki taiyaai karte hue pujaari

aarti ke samay kai saamagriyon ka prayog kiya jaata hai. pooja mein na keval kalash ka prayog karte hain, balki usamein kai prakaar ki saamagriyaan bhi daalte jaate hain. in sabhi ke peechhe dhaarmik evam vaigyaanik aadhaar bhi hain.[1][2][2][behtar srot vaanchhit]

  • kalash: kalash ek khaas aakaar ka bana hota hai. iske andar ka sthaan bilkul khaali hota hai. maanyataanusa is khaali sthaan mein Shiv basate hain. yadi aarti ke samay kalash ka prayog karte hain, to iska arth hai ki bhakt Shiv se ekaakaar ho rahe hain. samudra manthan ke samay vishnu Bhagwan ne amrut kalash dhaaran kiya tha. isliye kalash mein sabhi devataaon ka vaas maana jaata hai.
  • jal: jal se bhara kalash devataaon ka aasan maana jaata hai. jal ko shuddh tatv maana jaata hai, jisse ishvar aakrusht hote hain.
  • naariyl: aarti ke samay kalash par naariyl rakhate hain. naariyl ki shikhaaon mein sakaaraatmak oorja ka bhandaar paaya jaata hai. jab aarti gaate hain, to naariyl ki shikhaaon mein upasthit oorja tarangon ke maadhyam se kalash ke jal mein pahunchati hai. yeh tarangein kaafi sookshm hoti hain.
  • sona: aisi maanyata hai ki svarn dhaatu apne aas-paas ke vaataavaran mein sakaaraatmak oorja failaata hai. iseeliye sone ko shuddh kaha jaata hai. yahi kaaran hai ki ise bhakton ko Bhagwan se jodne ka maadhyam bhi maana jaata hai.
  • taanbe ki mudra: taanbe mein saatvik laharein utpann karne ki kshamata anya dhaatuon ki apeksha adhik hoti hai. kalash mein uthati hui laharein vaataavaran mein pravesh kar jaati hain. kalash mein paisa daalna tyaag ka prateek bhi maana jaata hai. yadi kalash mein taanbe ke paise daalte hain, to iska arth hai ki bhakt mein saatvik gunon ka samaavesh ho raha hai.
  • saptanadiyon ka jal: ganga, godaavari, yamuna, sindhu, sarasvati, kaaveri aur narmada nadi ka jal pooja ke kalash mein daala jaata hai. sapt nadiyon ke jal mein sakaaraatmak oorja ko aakrusht karne aur use vaataavaran mein pravaahit karne ki kshamata hoti hai. kyonki adhiktar yogi-muni ne ishvar se ekaakaar karne ke liye inheen nadiyon ke kinaare tapasya ki thi.
  • paan supaari: yadi jal mein supaari daalte hain, to isse utpann tarangein rajogun ko samaapt kar deti hain aur bheetar devata ke achhe gunon ko grahan karne ki kshamata badh jaati hai. paan ki bail ko naagabel bhi kehte hain. naagabelako bhoolok aur brahmalok ko jodne waali kadi maana jaata hai. ismein bhoomi tarangon ko aakrusht karne ki kshamata hoti hai. saath hi, ise saatvik bhi kaha gaya hai. devata ki moorti se utpann sakaaraatmak oorja paan ke danthal dvaara grahan ki jaati hai.
  • tulasi: aayurved mein tulasi ka prayog sadiyon se hota aa raha hai. anya vanaspatiyon ki tulana mein tulasi mein vaataavaran ko shuddh karne ki kshamata adhik hoti hai.

sandarbh

  1. a aa i aarti kyon aur kaise?. Yahoo jaagaran- dharm. meeta jindal
  2. a aa i aarti poojan . bruj diskavari

baahari kadiyaaain