Chhattisgarh ki hori
Chhattisgarh mein holi ko hori ke naam se jaana jaata hai aur is parv par lokageeton ki adbhut parampara hai. rituraaj basant ke aate hi Chhattisgarh ke gali gali mein nagaade ki thaap ke saath raadha Krishna ke prem prasang bhare geet jan-jan ke muh se barabas footane lagte hain. basant panchami ko gaanv ke baiga (gaanv ka maantrik jo devi mandir mein pooja karta hai) dvaara holavaar (vah saathaan holi jahaan jalati hai) mein kukari (murgi) ke ande ko pooj kar kunaari babool (babool ka naya chhota ped) ki lakadi mein jhanda baandhakar gadaane se shuroo faag geet pratham poojya ganesh ke aavaahan se saath praarambh hota hai. kisaanon ke gharon mein niyamit roop se har din pakavaan banane ki parampara shuroo ho jaati hai, jise telai chadhana kehte hain. airasa (anarase), deharauri (ek pakavaan) va bhajiya (pakaude) nit naye pakavaan, banane lagte hain. chhatteesagadh mein ladakiyaan vivaah ke baad pehli holi apne maata pita ke gaanv mein hi manaati hai evam holi ke baad apne pati ke gaanv mein jaati hai iske kaaran holi ke samay gaanv mein navavivaahit yuvatiyon ki bheed rahati hai. sararara... re bhaai sunale mor kabeer ... ke saath chadhaav mein bajate maadar (maadal ya mrudang) mein kuchh palo ke liye khaamoshi chha jaati hai gaayak-vaadak ke saath hi shrotaaon ka dhyaan kabeer padhane vaale par kendrit ho jaati hai. vah ek do laain ka pad sureele va teevr svar mein gaata hai. yeh kabeer ya saakhi faag ke beech mein faag ke utsaah ko badhaane ke liye kisi ek vaayakti ke dvaara gaaya jaata hai evam baaki log pad ke antim shavaadon ko duharaate hue saath dete hai. iske saath hi kabeer ke dohe ya anya prachalit dohe, chhand ki samaapti ke baad padhe jaate hai pun: vahi faag apne poore urja ke saath apne charamotkarsh par pahuch jaata hai. gaanv ke chauk-chaupaal mein faag ke geet holi ke din subah se der shaam tak nirantar chalte hain. rang bhari pichkaariyon se barasate rangon evam udate gulaal mein madamast chhatteesagadh apne faagun maharaaj ko agale varsh fir se aane ki nyauta deta hai.