Chunaav Aayog Ne Siddhoo Ko Aachaar Sanhita Ke Ullanghan Ke Liye Fatkaar Lagaai

Chunaav Aayog Ne Siddhoo Ko Aachaar Sanhita Ke Ullanghan Ke Liye Fatkaar Lagaai

Breaking »

Nai Delhi: Chunaav aayog ne bhaajapa saansad navajot Singh siddhoo ko Gujarat mein chunaav prachaar ke dauraan pradhaanamantri Manmohan Singh ke khilaaf vyaktigat tippani kar aachaar sanhita ka ullanghan karne ke liye fatkaar lagaai hai. Aayog ne Budhvaar ko jaari apne faisale mein siddhoo ko nirdesh diya ki vah bhavishya mein aur jyaada sachet rahein taaki aadarsh chunaav aachaar sanhita ke praavadhaanon ka poori tarah se paalan ho aur usaka ullanghan na ho. Gaurtalab hai ki siddhoo ne Gujarat vidhaanasabha chunaav ke dauraan Junagadh jile mein 29 November ko bhaajapa ke paksh mein chunaav prachaar karne ke dauraan pradhaanamantri Manmohan Singh aur Gujarat ke poorv mukhyamantri keshubhaai Patel ke khilaaf kuchh vyaktigat tippaniyaan ki thi. Aayog ne maana ki siddhoo ne saampradaayik dhaarmik bhaavana bhadka kar aur virodhi paksh ke netaaon ke niji jeevan par aapattijanak tippani karke aadarsh chunaav aachaar sanhita ka ullanghan kiya hai aur isliye aayog ne is maamale ke tamaam pahaluon par vichaar karne ke baad siddhoo ko fatkaar lagaane ka nirnaya kiya aur unhein nirdesh diya ki vah bhavishya mein saavdhaan rahein.


Saste Hone Lage Karj, State Bank Sahit 2 Anya Ne Ghataai Karj Par Byaaj Dar

Saste Hone Lage Karj, State Bank Sahit 2 Anya Ne Ghataai Karj Par Byaaj Dar

Breaking »

Mumbai: Reserve bank ki timaahi sameeksha mein neetigat daron mein katauti ke baad bankon ne karj par byaaj daron mein katauti karni shuroo kar di hai. Iske saath hi graahakon ko makaan aur vaahanon ke liye saste karj ki shuruaat ho gayi hai. Desh ke sabse bade bank bhaarateeya state bank ki aguvaai mein vibhinn bankon ne karj par byaaj daron mein aadha pratishat ank tak ki katauti ki ghoshana ki hai. State bank ne karj par jahaan byaaj dar mein 0.05 pratishat katauti ki ghoshana ki hai vaheen niji kshetr ke HDFC bank aur Federal bank ne vaahan tatha kuchh doosari shreniyon mein byaaj daron mein 0.25 se lekar 0.50 pratishat kami ki ghoshana ki hai. Reserve bank ki teesari timaahi maudrik sameeksha ghoshit hone ke baad kal saarvajanik kshetr ki IDBI bank aur royal bank Scotland (RBS) ne karj daron mein kramash: 0.25 pratishat aur 0.75 pratishat katauti kar di. Bhaarateeya state bank ne maudrik sameeksha ke ek din baad Budhvaar ko apni aadhaar dar 0.05 pratishat kam karke 9.70 prashtiaat kar di. Bank ki nai aadhaar dar 4 February se prabhaavi hogi. State bank ki sampatti evam dendaari samiti ki aaj hui baithak ke baad state bank ke ek varishth adhikaari ne kaha ''Is katauti ke jariye humne reserve bank ki neetigat daron mein katauti se jitna faayda mila usase kuchh jyaada laabh graahakon ka diya hai. '' Niji kshetr ke HDFC bank ne car rin par byaaj daron mein 0.25 pratishat aur dopahiya vaahanon ke karj par aadha pratishat kami ki hai. Bank ke ek adhikaari ne bataaya ki vaanijyik vaahanon ke karj par byaaj daron mein 0.25 pratishat katauti hogi. Nai darein ek February se prabhaavi hongi. Reserve bank ne mangalvaar ko ghoshit teesari timaahi ki maudrik sameeksha mein repo dar mein 0.25 pratishat aur nakad aarakshit anupaat mein bhi 0.25 pratishat katauti kar di. Repo dar mein katauti se jahaan bankon ke dhan ki laagat kam hogi vaheen CRR mein katauti se bankon ke paas atirikt dhan upalabdh hoga. Mumbai sthit HDFC bank vartamaan mein car rin 10.75 pratishat se lekar 11.75 pratishat ke beech upalabdh karaata hai. Byaaj daron mein katauti ke baad 36 maah se lekar 60 maah ki avadhi ka yah karj 10.5 se lekar 11.5 pratishat ke beech upalabdh karaaya jaayega. Dopahiya vaahanon ke maamale mein diye jaane vaale karj par ab byaaj ki dar 19.25 se lekar 22.25 pratishat ke daayare mein hoga. Vaanijyik vaahanon ke maamale mein karj par byaaj ki nai dar 11 pratishat ke aaspaas hogi. Halke vaanijyik vaahanon ke maamale mein ab 14 pratishat ke bajaay 13.75 pratishat ki dar se byaaj dena hoga. Bank ka vaahan rin is samay 33,000 karod rupaye hai. Bank ke auto karj mein 12 pratishat ki dar se vruddhi ho rahi hai. IDBI bank ne ek February se apni aadhaar par 0.25 pratishat kam kar 10.25 pratishat kar di hai. Bhaarateeya state bank ne aadhaar dar mein maamooli katauti ki hai lekin jama dar mein bank ne koi katauti naheen ki. Bank ke adhikaari ne bataaya ''Reserve bank ke kadam se hamein 275 karod rupaye mileinge lekin byaaj dar mein katauti se ham graahakon ko 350 karod rupaye ka faayda pahuncha rahe hain. ''


Raaj Thackeray Ke Prati Uddhav Ka Rukh Badla, Kya Saath Aaenge Donon Bhaai

Raaj Thackeray Ke Prati Uddhav Ka Rukh Badla, Kya Saath Aaenge Donon Bhaai

Breaking »

Mumbai: Shivsena ke paksh pramukh uddhav Thackeray ne shivsena ke mukhapatr 'Saamana' ko diye gaye ek interview mein kaha hai ki agar Maharashtra navanirmaan sena (MNS) pramukh raaj Thackeray shivsena mein vaapas aana chaahate hain, to vah unka svaagat kareinge. Uddhav ke mutaabik shivsena ke saath jo bhi dil se aaega, usaka svaagat kiya jaaega. Saath hi unhonne kaha ki taali ek haath se naheen bajti hai, mujhe aur raaj ko ek saath aana chaahiye, ye donon ko saath bithaakar poochha jaana chaahiye. Vaheen maraathi maanush ki baat karte hue uddhav ne kaha ki shivsena maraathi voteron mein seindhamaari ko hamesha ke liye khatm karna chaahati hai yaani saaf hai ki uddhav ne raaj Thackeray ko lekar apna rukh lacheela kar liya hai, kyonki isse pehle tak vah raaj ke khilaaf behad sakht bhaasha ka istemaal karte the. Ab dekhna hoga ki raaj Thackeray, uddhav ki in baaton par kya javaab dete hain.


Share Baajaaron Mein Maamooli Teji, Sensex 14 Ank Oopar

Share Baajaaron Mein Maamooli Teji, Sensex 14 Ank Oopar

Breaking »

Mumbai: Desh ke share baajaaron mein Budhvaar ko maamooli teji ka rukh raha. Pramukh soochakaank Sensex 14.10 ankon ki teji ke saath 20,005.00 par aur Nifty 5.85 ankon ki teji ke saath 6,055.75 par band huaa. Mumbai stock exchange (BSE) ka 30 sheyaron par aadhaarit samvedi soochakaank Sensex 23.90 ankon ki teji ke saath 20,014.80 par khula aur 14.10 ankon yaani 0.07 feesadi ki teji ke saath 20,005.00 par band huaa. Din ke kaarobaar mein Sensex ne 20,073.46 ke oopari aur 19,964.64 ke nichle star ko chhuaa. Sensex ke 30 mein se 12 sheyaron mein teji darj ki gayi. Cipla (2.69 feesadi), Hindustan Unilever (1.97 feesadi), RIL (1.87 feesadi), tata steel (1.75 feesadi) aur Wipro (1.72 feesadi) mein sarvaadhik teji rahi. Sensex ke giraavat vaale sheyaron mein pramukh rahe Gale India (3.35 feesadi), tata power (2.73 feesadi), L (1.92 feesadi), jidl steel (1.61 feesadi) aur tata motors (1.53 feesadi). National stock exchange (NSE) ka 50 sheyaron par aadhaarit samvedi soochakaank Nifty 15.10 ankon ki teji ke saath 6,065.00 par khula aur 5.85 ankon yaani 0.10 feesadi ki teji ke saath 6,055.75 par band huaa. Dinbhar ke kaarobaar mein Nifty ne 6,071.95 ke oopari aur 6,044.15 ke nichle star ko chhuaa. BSE ke midcap aur smallcap soochakaankon mein giraavat darj ki gayi. Midcap soochakaank 2.15 ankon ki giraavat ke saath 6,933.78 par aur smallcap 15.21 ankon ki giraavat ke saath 7,081.73 par band huaa. BSE ke 13 sectoron mein se 8 sectoron mein teji darj ki gayi. Realty (1.39 feesadi), upabhokta tikaaoo vastu (1.24 feesadi), tel evam gas (1.06 feesadi), banking (0.36 feesadi) aur svaasthya seva (0.36 feesadi) mein sarvaadhik teji darj ki gayi. Paanch sectoron poonjeegat vastu (1.24 feesadi), bijli (0.68 feesadi), vaahan (0.49 feesadi), praudyogiki (0.18 feesadi) aur saarvajavik companiyaan (0.07 feesadi) mein giraavat rahi. BSE mein kaarobaar ka rujhaan nakaaraatmak raha. Kul 969 sheyaron mein teji 1219 sheyaron mein giraavat ka rukh raha, jabki 828 sheyaron ke bhaav mein koi parivartan naheen huaa.


Telangaana Ke Saat Congressi Saansad Mileinge Soniya Se, Day Sakte Hain Isteefa

Telangaana Ke Saat Congressi Saansad Mileinge Soniya Se, Day Sakte Hain Isteefa

Breaking »

Nai Delhi / Hyderabad: Alag telangaana raajya ki maang ke samarthan mein isteefe ki ghoshana karne vaale Congress ke saat saansad aaj Delhi aa rahe hain. In saasandon ne ghoshana ki thi ki ye sabhi isteefa day deinge, lekin keindreeya mantri vyaalaar ravi ne inse phone par kaha ki isteefa dene se pehle ve sabhi Delhi aaen aur is masale par ek baar fir baat karein. Iske baad mangalvaar ko sabhi saansadon ne isteefe ka faisala taal diya aur ab aaj ve Delhi aakar is maamale par baatcheet kareinge. Is beech, sattaaroodh Congress aur Nehru-Gandhi parivaar ke khilaaf telangaana raashtra samiti ke adhyaksh ke chandrashekhar Rao ki tippani ko lekar Congress ne unki aalochna ki. Saaton saansadon ne mangalvaar ko ghoshana ki thi ki ve apna isteefa tatha usaka kaaran bataate hue ek patra soniya Gandhi ko bhejeinge. Isteefe ke faisale par matabhed ki khabaron ko unhonne khaarij kar diya. Saansadon ne mangalvaar ko Hyderabad mein samvaadadaataaon se kaha ki ve apne faisale par aage badheinge tatha Congress adhyaksh soniya Gandhi ko apna isteefa saunpane ke liye Budhvaar ko nai Delhi pahunch jaaenge.


Anna Ka Jantantra Morcha Banaane Ka Ailaan, Chunaav Se Raheinge Door

Anna Ka Jantantra Morcha Banaane Ka Ailaan, Chunaav Se Raheinge Door

Breaking »

Patna: Saamaajik kaaryakarta anna hajaare ne Patna ke Gandhi maidaan mein raashtreeya star ka jantantra morcha banaane ka ailaan kiya hai. Yah morcha chunaavon se door rahega. Anna ne deshbhar mein logon ko jaagruk karne ko lekar aaj se naya abhiyaan shuroo kiya hai. Patna ke Gandhi maidaan mein jantantra rally ke jariye anna ne vyavastha- parivartan ki muhim shuroo ki hai. Unhonein kaha ki ab vyavastha mein badlaav hi hamaara lakshya hai. Anna ne kaha hai ki yah badlaav Lokpal, chunaav mein ummeedavaaron ko reject karne aur graamasabhaao ko satta dene se aaega. Krushi kshetr ki upeksha par to anna dhyaan kheecheinge hi saath hi kisaan sangathanon ko bhi ekajut karne ki koshish kareinge. Anna Patna ke baad February mein chaar raajyon ka daura kareinge.


Lekhak Salman Rushdi, Filmkaar Deepa Mehta Ki Kolkata Yaatra Radd

Lekhak Salman Rushdi, Filmkaar Deepa Mehta Ki Kolkata Yaatra Radd

Breaking »

Kolkata: Lekhak Salman rushdi ki Kolkata yaatra antim kshanon mein radd ho gayi hai. Sootron ke mutaabik police aur raajya sarkaar ke dabaav ke chalte unki yaatra radd ki gayi hai. Rushdi apni prasiddh kitaab 'Midnights children' par film banaane waali nirdeshak deepa Mehta ke saath Bhaarat ke shaharon ki yaatra par hain. Yah film 1 February ko release hone ja rahi hai. Rushdi ne Mumbai aur Delhi ki yaatra poori kar li hai. Vah Kolkata ke ek five star hotel mein film vitrakon dvaara aayojit ek press conference ko deepa Mehta ke saath milkar sambodhit karne vaale the. Kolkata airport par aaj subah kareeb 200 muslim pradarshanakaariyon ne rushdi ke prastaavit aagaman ke khilaaf pradarshan kiya tha.


UP Tuition Padhne Se Mana Kiya To Chhaatra Ne Aag Lagaakar Di Jaan

UP Tuition Padhne Se Mana Kiya To Chhaatra Ne Aag Lagaakar Di Jaan

Breaking »

Meerut: Uttar pradesh ke Meerut shahar mein ek chhaatra ko parijanon dvaara tuition padhne se mana karna itna adhik akhara ki usane kathit roop se khud ko aag lagaakar aatmahatya kar li. Chhaatra ki laash ghar ke bathroom se mili hai. SP city Omprakash ne bataaya ki shahar ke thaana naunchadi kshetr ke panchasheel ilaake ke nivaasi vedaant ki putri vedika (18) shahar ke ek college mein BCom dviteeya ki chhaatra thi. Vah pichhle kuchh dinon se tuition padhne ki jid kar rahi thi. Aaj fir vedika ne parijanon ke samaksh tuition padhne ki jid ki. Parijanon ke mana karne par vah ghar ki oopari manjil par apne kamre mein gayi aur kamre se sate bathroom mein jaakar khud ko aag laga li. Shor sunakar jab tak parijan mauke par pahunchate tab tak vah 80 feesadi se jyaada jal chuki thi. Unhonne bataaya ki vedika ko aspataal le jaaya gaya jahaan usaki upachaar ke dauraan maut ho gayi. Police ne shav ko postmortem ke liye bhejkar maamale ki chhaanabeen shuroo kar di hai.


Delhi Truck Driver Par JCP, DCP Ki Hatya Ki Koshish Ka Maamala

Delhi Truck Driver Par JCP, DCP Ki Hatya Ki Koshish Ka Maamala

Breaking »

Nai Delhi: Delhi mein ek truck driver par traffic police ke sanyukt aayukt (JCP) Satyendra garg aur DCP traffic, south Delhi premanaath ki hatya ki koshish karne ka maamala darj kiya gaya hai. Maamala Delhi−noeda ko jodane vaale DND flyover ka hai, jahaan checking ke dauraan jab truck ko rokane ki koshish ki gayi, to usane donon police adhikaariyon ko kuchalane ki koshish ki. Filhaal truck driver faraar hai, jabki truck ke maalik ko hiraasat mein le liya gaya hai. Yah truck Haryana ke noonh ka hai.


Jab Mahaatma Gandhi Ne Desh Ko Alvida Kah Diya

Jab Mahaatma Gandhi Ne Desh Ko Alvida Kah Diya

Breaking »

Nai Delhi: Delhi ke '5, tees January maarg' par mahaatma Gandhi ne apni jindagi ke antim 144 din bitaae the aur isi jagah 30 January 1948 ko unki hatya kar di gayi, lekin yaataayaat ke halke shor ke baavajood aaj bhi yahaan ki shaanti bhang naheen hui hai. Vistrut ilaake mein faile is sthaan mein ek sangrahaalaya hai, jahaan raashtrapita Gandhi ke jeevan aur jeevanadarshan ko pradarshit kiya gaya hai. Shaanti ke pujaari is mahaapurush ke baare mein yah vishvaas karna mushkil tha ki ek din ek hindu kattarpanthi Nathuram Godse dvaara unki nrushans hatya kar di jaaegi. Unki hatya shaam ki praarthana ke liye jaate vakt kar di gayi thi, jis maarg se Gandhiji gujre the us par cement ke padachinh bana diye gaye hain aur us sthaan par sangamaramar bichhaakar us par 'He Ram' ankit kar diya gaya hai. Safed dhoti pahane Gandhiji par teen baar goliyaan daagi gain. Unhein goli lagne ka pata tab chala jab unki safed dhoti par khoon ke dhabbe najar aane lage. Us vakt shaam ke 5.17 baj rahe the. Unka aakhiri shabd 'He Ram' the. Prasiddh patrakaar Kuldeep Nair ne us din ko yaad karte hue kaha, main us vakt urdoo akhbaar 'Anjaam' ke liye kaam kar raha tha. Mainne news agency ke tikr par chetaavani suni. Main bhaagte hue teleprinter ke paas pahuncha aur mainne avishvaseenaya shabd 'Gandhi ko goli lagi' padhe. Unhonne kaha, main kursi par gir pada, lekin hosh sambhaalate hue Birla house ki taraf bhaaga. Vahaan kolaahal macha huaa tha. Gandhi safed kapde par lete the aur har koi ro raha tha. Jawahar laal Nehru bilkul stabdh aur dukhi najar aa rahe the. Hindustaniyon dvaara pyaar se Bapu ke naam se bulaae jaane vaale Gandhiji ki 65veen punya tithi Budhvaar ko manaai ja rahi hai.


'Vishvaroopam Vivaad Kamal Hassan Ne Kaha, Insaaf Naheen Mila To Desh Chhod Doonga

'Vishvaroopam Vivaad Kamal Hassan Ne Kaha, Insaaf Naheen Mila To Desh Chhod Doonga

Breaking »

Chennai: Apni mega bajat film 'Vishvaroopam' ko lekar jaari vivaad par aahat nirdeshak-abhineta kamal Hassan ne aaj kaha hai ki unke dil mein insaaf milne ki ummeed ab bhi kaayam hai, lekin agar ab is desh mein unhein koi dharmanirpeksh jagah naheen mil paai, to vah desh chhodne ke liye bhi taiyaar hain. Bhaavuk svar mein diye gaye vaktavya mein kamal Hassan ne kaha ki adaalat se unhein nyaaya milne ki aasha hai, lekin Tamil Nadu sarkaar unhein raajya se bhagaana chaahati hai. Unhonne yah bhi kaha ki vah sirf ek kalaakaar hain, aur vah jahaan bhi jaaenge, unki kala hamesha unke saath rahegi. Unhonne kaha ki unhein naheen maaloom ki yah khel kaun khel raha hai aur ab unhein is vivaad ke baad mahasoos ho raha hai ki Tamil Nadu sarkaar unhein yahaan naheen rahane dena chaahati hai, isliye unhein rahane ke liye ek dharmanirpeksh jagah ki jaroorat hai. Unhonne behad aahat svar mein kaha ki yadi unhein aisi jagah Bhaarat mein naheen milti hai, to vah videsh chale jaaenge. Vaise unhonne kaha ki Tamil Nadu ko chhodkar Kashmir se Kerala tak vah aisi jagah dhoondheinge, parantu agar kisi bhi raajya mein unhein sharan naheen milti to vah kisi na kisi dharmanirpeksh desh ko talaash leinge. Unhonne kaha ki makabool fida husain (mashahoor painter MF husain) ko bhi aisa karna pada tha, aur ab Hassan bhi aisa hi karega. Kamal Hassan ne saaf kiya ki yadi desh chhodne ki naubat aati hai, to bhi vah apne logon (prashansakon) se naaraaj naheen hain aur tamil mein hi filmein banaate raheinge. Unhonne kaha ki main sirf ek kalaakaar hoon aur kisi bhi dharm ko dosh naheen day raha hoon. Mujhe ummeed hai ki mere prashansak shaanti banaae rakheinge, jinmein bahut-se muslim bhi shaamil hain. Mainne muslimon ko apni film iseeliye dikhaai thi, kyonki ve mere bhaai hain. Hassan ne kaha, mainne is film ke liye apni saari jaayadaad girvi rakh di hai aur release mein deri ke kaaran apna ghar bhi ganva chuka hoon. Kamal ke mutaabik film ki kahaani Afghanistan par aadhaarit hai, isliye vah hairaan hain ki bhaarateeya muslimon ko kis cheej ne aahat kiya aur is baat se bhi unhein aashcharya hota hai ki sirf ek film poore desh ki ekta ko kaise bigaad sakti hai. Gaurtalab hai ki Madras High Court dvaara ban hataae jaane ke baavajood 'Vishvaroopam' ki mushkilein barkaraar hai, kyonki is faisale ke khilaaf Tamil Nadu sarkaar ki appeal par Madras High Court mein fir sunavaai hogi aur sambhavat: Dopahar baad faisala aaega.


Sashastr Badmaashon Ne California Gurudvaare Mein Ki Lootpaat

Sashastr Badmaashon Ne California Gurudvaare Mein Ki Lootpaat

Breaking »

California: California mein sashastr badmaashon ne ek gurudvaare mein ghuskar vahaan daanpaatr mein rakhi nakadi looti aur faraar ho gaye. California mein sthaaneeya Livington police ne bataaya ki teen sashastr dakait ravivaar ki subah aage ke darvaaje se gurudvaare mein ghuse. Inmein se ek ke paas bandook, doosare ke paas chaakoo tha. Teesara dakait nihattha tha. Teesare nihatthe badmaash ne ek daanpaatr se kuchh hajaar dollar liye aur baraabar ke darvaaje se faraar ho gaya. Uske baaki donon saathi gurudvaare ke baahar usaka intajaar kar rahe the. Sthaaneeya samaachaarapatr marsed sunstar ne police ke havaale se yah jaankaari di. North American punjabi association ke adhyaksh Satnam Singh chahal ne bhi bataaya ki teen log daanpaatr se raashi churaakar baraabar ke darvaaje se nikal gaye. Police pramukh rooben shaavej ne kaha hai ki teenon dakaiton ne hud waali jacket ya sweater pahane the aur unhonne apni pehchaan chhupa rakhi thi. Police in teenon agyaat logon ki talaash kar rahi hai. Shaavej ne bataaya ki pehle bhi daanpaatr se paisa churaaya gaya hai, lekin gurudvaare mein dakaiti ki yah pehli ghatna hai. Unhonne kaha, yah adhik bhayankar hai, kyonki ve hathiyaaron ke saath aae the. Nishchit roop se yah kisi aise vyakti ka kaam hai, jo mandir ke baare mein jaanta tha, kyonki unhein yah pata tha ki kahaan jaana hai.


'Stardom Mere Liye Maayane Naheen Rakhata Shahrukh Khan

'Stardom Mere Liye Maayane Naheen Rakhata Shahrukh Khan

Breaking »

Mumbai: Hindi cinema jagat mein pichhle do dashakon se 'King Khan' ka taaj pahane Bollywood 'Baadshah' Shahrukh Khan ka kehna hai ki stardom unke liye maayane naheen rakhata. Shahrukh ne kaha, yah (stardom) mere liye maayane naheen rakhata. Main keval subah se shaam tak kaam karna jaanta hoon. Mujhe naheen maaloom ki iske (stardom) mere liye kya maayane hain. Unhonne kaha, main rojaana lagbhag 18 ghante kaam karta hoon. Jeevan mein sabse badhi cheej apni safalta ki vajah ko paribhaashit karna hai, kyonki iske baare mein main naheen jaanta. Agar aap iski vyaakhya karte hain to main sochata hoon ki aap imaandaar naheen hain, kyonki main ise (apni safalta ko) apni beti aur bete ko viraasat mein naheen day sakta aur aisa koi naheen kar sakta. 2012 mein 'King' Khan ki keval ek film 'Jab tak hai jaan' pradarshit hui jo ki superhit rahi. Is saal bhi vah keval rohit Shetty ki film 'Chennai express' mein hi najar aaenge. Yah poochhe jaane par ki filmein karne ki raftaar kam karne ka faisala kya socha samjha hai, unhonne kaha, naheen, aisa naheen hai. Main ek samay mein keval ek film karta hoon. Ab main ek saal mein ek film karna chaahata hoon, khaali samay lekar bachchon ke saath baithna chaahata hoon.


Mahila Vishwacup Bhaarat Aur West Indies Ke Beech Hoga Pehla Mukaabala

Mahila Vishwacup Bhaarat Aur West Indies Ke Beech Hoga Pehla Mukaabala

Breaking »

Mumbai: Do saal pehle mumbai ne Bhaarat ki purush team ko 28 saal ke baad vishv vijeta bante dekha tha aur ab yahi mumbai guruvaar se aath mahila cricket teemon ke beech 50 over ke vishv cup khitaab ke liye shreshthata ki jang ka gavaah banegi. Vishwacup ki shuruaat Bhaarat aur West Indies ki teemon ke beech hone vaale mukaabale se hogi. Yah mukaabala Brabourne stadium mein khela jaaega. Vishwacup ke adhikaansh match mumbai mein honge, lekin kai match Orissa ke shahar Cuttack mein bhi khele jaaenge. Cuttack mein mukhya taur par Pakistani team se jude mukaabale honge, jiske kootaneetik virodh ke kaaran mumbai naheen balki Orissa mein khelna pad raha hai. Final mukaabala 17 February ko bhi mumbai mein cricket ka gadh rahe Brabourne stadium mein hoga. Vishv cup 10vein sanskaran mein kul aath teemein shirkat kareingi. Mejabaan Bhaarat ke alaava Pakistan, Sri Lanka, maujooda champion England, West Indies, dakshin Africa aur New Zealand ki teemein khitaabi jeet ke liye prayaas kareingi. England maujooda champion hone ke lihaaj se khitaab ki raksha ka prayaas karega jabki Australiaee team chhathi baar is khitaab par kabja karne ka prayaas karegi. England aur Australia ke alaava New Zealand ne 2000 mein yah khitaab jeeta tha. England ne 2008 mein Australia mein aayojit tournament ke nauvein sanskaran mein vijeta banane ka gaurav haasil kiya tha. Usase pehle 2004 mein Australiaee team champion rahi thi. Aath teemon ko chaar-chaar ke do group mein vibhaajit kiya gaya hai. Group-A mein England, Bhaarat, West Indies aur Sri Lanka ki teemein hain jabki group-bi mein Australia, New Zealand, Pakistan aur dakshin afreeki teemon ko rakha gaya hai. Is tournament ke match Brabourne stadium ke alaava Cuttack ke Barabaati stadium, Bandra kurla complex, dreams ground aur middle income ground par khele jaaenge. Vishv cup ka prasaaran star cricket aur ESPN jaise pramukh channelon par kiya jaaega.


Kabhi Boxing Mein Naam Kamaane Vaala Kamal Kumar Aaj Utha Raha Hai Kooda

Kabhi Boxing Mein Naam Kamaane Vaala Kamal Kumar Aaj Utha Raha Hai Kooda

Breaking »

Kanpur: Boxing ke raajyastareeya khilaadi kamal Kumar kai medal jeet chuke hain, lekin gareebi se tang aakar vah aajkal kooda uthaane ka kaam kar rahe hain. Kanpur ke gvaalatoli ilaake mein vah rikshe par ghar-ghar jaakar kooda uthaate hain aur bache hue samay mein paan ki dukaan lagaate hain. Vaise, kamal aise naujavaanon ke liye misaal hain, jo snaatak ki padhaai ke baad mile chhote-mote kaamon ko chhod dete hain. Unke anusaar, koi kaam chhota naheen hota. Gaurtalab hai ki bachapan se hi boxing ka shauk rakhane vaale kamal ne poori mehnat se kiye abhyaas se 1991 mein jilaastareeya pratiyogita mein svarn padak jeeta aur 1993 mein UP olympic mein kaansya padak aur usi saal junior national championship Ahmedabad mein uttar pradesh ka pratinidhitv kiya. Iske baad 2004 mein jilaastareeya pratiyogita mein rajat aur 2006 ke raajya khelon mein kaansya padak jeeta. In sabhi upalabdhiyon ke baad bhi soobe ke is boxer ko apne parivaar ka pet paalne ke liye ek adad naukri ki darkaar thi, lekin sarkaar ne is khilaadi ki taraf koi dhyaan naheen diya. Aakhirkaar use kooda uthaane ka kaam karna pada. Kamal ko tatkaaleen raajyapaal Motilal vora aur raajya khelon mein poorv mantri kalaraaj mishra ne kaansya padak se sammaanit kiya tha, lekin gareebi ke chalte khel peechhe chhoot gaya aur kaheen sarkaari naukri bhi na mili. Iske baad jab parivaar par bhookhe marne ki naubat I to kamal ne saare medal ghar mein taang diye aur snaatak ki degree bhi dhari ki dhari rah gayi. Vaise, aaj kamal ke teen bete hain aur unamein se do bete kamal ke padachinhon par chalte hue boxing seekh rahe hain. Kamal ka sapana hai ki vah apne bachchon ko achha boxer banaae taaki bachche desh ka naam roshan kar sakein. Kamal ka doosra beta aaditya dhanaraaj kaksha aath ka chhaatr hai aur national boxing khel chuka hai. Bete ka kehna hai ki vah pita ke sapanon ko poora karna chaahata hai.


Raashtrapati Ki Daud Mein Shaamil Hone Ki Yojana Naheen Hillary Clinton

Raashtrapati Ki Daud Mein Shaamil Hone Ki Yojana Naheen Hillary Clinton

Breaking »

Washington: America ki videsheemantri Hillary Clinton ki raashtrapati ki daud mein shaamil hone ki abhi koi yojana naheen hai. Videshamantri pad chhodne se pehle Clinton ne kaha, main bhaagyashaali hoon ki main svasthya hoon. Mujhe kaafi achha lag raha hai. Mere paas kaafi oorja hai, jiska upayog kiya jaana hai. Isliye main kismat waali hoon. Yah baat visheshataur par poochhe jaane par ki kya unhonne raashtrapati chunaav ki daur mein shaamil naheen hone ka faisala kar liya hai, unhonne kaha, daud mein shaamil hone ki mere paas koi yojana naheen hai. Unke havaale se kaha gaya, mujhe vo saari cheejein abhi pata naheen jo main karoongi. Main mahilaaon aur baalikaaon ki or se kaam karti rahoongi. Unki or se likhti aur bolti rahoongi. Abhi mainne yahi soch rakha hai. Unhonne is baat se bhi anbhigyata prakat ki ki ek super raajaneetik kaaryasamiti (PAC) 'Ready for Hillary' ka gathan sambhaavit daur ke liye haal mein hi kiya gaya tha. Clinton ne poochha, kya sachmuch aisa hai? Unhonne kaha ki abhi vah aaraam karne ke baare mein soch rahi hain. Unhonne kaha, mujhe pata hai ki yah kuchh atpata lag raha hai, kyonki mainne yah pehle kabhi naheen kiya hai. Apne pati aur poorv raashtrapati bill Clinton aur putri Chelsea ke saath rahane ki yojana ke baare mein Clinton ne kaha ki unhein pata naheen ki aane vaale saalon mein kya hoga.


Justice Varma Ko PM Ka Khat, Kaha, Report Par Jald Kaarravaai Hogi

Justice Varma Ko PM Ka Khat, Kaha, Report Par Jald Kaarravaai Hogi

Breaking »

Nai Delhi: Delhi gang-rape ke baad desh mein mahilaaon ki suraksha aur unke khilaaf hone vaale aparaadhon ke liye sajaaon ki sifaarish karne vaale Justice JS varma ko pradhaanamantri Dr Manmohan Singh khat likhkar jald kaarravaai ka aashvaasan diya hai. Dr Manmohan Singh ne khat mein is baat ke liye Justice varma ki prashansa bhi ki hai ki unhonne itne samvedansheel mudde par sirf 30 din mein apni report saunp di, aur kaha ki sarkaar unki sifaarishon par jald se jald kaaryavaahi karegi. Gaurtalab hai ki Bhaarat ke poorv pradhaan nyaayaadheesh nyaayamoorti JS varma ne mahila suraksha ke liye sarkaar se kai kadam uthaane ki sifaarish ki hai. Inmein vibhinn kism ke yaun utpeedn aur hinsa se nipatne aur peediton ko teji se nyaaya dilaane ke liye naya kaanoon banaana shaamil hai. Delhi mein 23 saal ki chhaatra ke saath saamoohik balaatkaar ke saptaah bhar baad 23 December ko teen-sadasyeeya samiti ka gathan keindreeya gruh mantraalaya ne kiya tha. Samiti mein Himachal pradesh ki poorv mukhya nyaayaadheesh leela seth aur poorv solicitor general gopaal subrahmanyam bhi shaamil the. Varma ne kaha tha ki samiti ka kaarya Bhaarat mein mahilaaon ko surakshit aur sammaanapoorn maahaul muhaiya karaane mein sarkaar ki vifalta ka samaadhaan pesh karna tha. Varma ne kaha ki samiti ke kuchh prastaav desh ki aparaadh sanhita mein sanshodhan ke liye sansad mein lambit vidheyak mein shaamil kiye ja sakte hain. Kareeb maheene bhar kaam karne waali varma samiti ko 80 hajaar sujhaav mile. Inmein mahila kaaryakarta, vakeel, shikshaavid aur videsh ke kai professor aur vidvaan shaamil the. Delhi gang-rape ke baad keindreeya gruh sachiv RK Singh dvaara Delhi ke police aayukt neeraj Kumar ki taareef karna varma ko raas naheen aaya. Unhonne kaha ki jab maafi maange jaane ki ummeed thi, us samay yah (police commissioner ki peeth thapathapaana) sunakar kaafi hairat hui. Saamoohik balaatkaar ke baad deshbhar mein hue pradarshanon par varma ne yuvaaon ki paripakva pratikriya ke liye unki taareef ki. Pradarshan ke dauraan police kaarravaai ko lekar varma naakhush the. Unhonne kaha ki shaantipoorvak pradarshan kar rahe logon par laatheechaarj ne bhaarateeya lokatantr ko daagadaar kiya hai.


Bhaarat Mein Parichaalan Aur Karmachaariyon Ki Sankhya Badhaaenge Dale

Bhaarat Mein Parichaalan Aur Karmachaariyon Ki Sankhya Badhaaenge Dale

Breaking »

Davos: Bhaarat ke vikaas ki kahaani ko shaanadaar bataate hue vaishvik computer company Dale ne kaha hai ki vah vahaan apna parichaalan aur karmachaariyon ki sankhya aur badhaaegi. Ek dashak mein Bhaarat mein Dale ke karmachaariyon ki sankhya e27,000 tak pahunch gayi hai. Dale ke vaishvik pramukh Michael Dale ne kaha, Dale ke liye Bhaarat vikaas ki ek shaanadaar kahaani hai. Vahaan hamaari achhi khaasi upasthiti hai. Niji roop se kai baar main Bhaarat gaya hoon. Vahaan hamaare karmachaariyon ki sankhya 27,000 hai. Dale yahaan vishv aarthik manch ki baithak mein shaamil hone aae the. Unhonne kaha ki company ka chennai sanyantr, parichaalan tatha karmachaariyon ki sankhya kaarobaar ke aakaar ke hisaab se badhaai jaaegi. Unhonne kaha ki jis samay Dale ne Bhaarat mein parichaalan shuroo kiya tha us samay usaka ek karmachaari tha. Baad mein yah sankhya badhkar ek hajaar ho gayi, jo ab 27,000 par pahunch gayi hai. Haalaanki, unhonne Bhaarat mein niyukti aur anya vistaar yojanaaon ke baare mein jyaada jaankaari naheen di. Dale ne kaha, company ne kabhi koi anumaan naheen diya hai. Iske baavajood yah ek se 27,000 karmachaariyon par pahunch gayi.


Pakistan Adhikaari Ki Beti Ko Utaarane Ke Liye Pak Vimaan Ne Badla Raasta

Pakistan Adhikaari Ki Beti Ko Utaarane Ke Liye Pak Vimaan Ne Badla Raasta

Breaking »

Islamabad: Karachi se Islamabad ja rahe Pakistan international airlines ke ek vimaan ka raasta badalkar use Lahore ki or le jaaya gaya taaki airline ke karmachaari ki beti vahaan utar sake. Media mein aain khabaron mein vimaan ka raasta badalne ka daava kiya gaya hai. Is sarkaari vimaanaseva ki or se PK-562 par savaar yaatriyon ko Lahore mein vimaan utaarane ke liye kai kaaran bataae gaye. Shuruaat mein unhein bataaya gaya ki vimaan ko takaneeki kaaranon ki vajah se utaara ja raha hai. Jab yaatriyon ne virodh karna shuroo kiya to unhein bataaya gaya ki Islamabad mein indhan na hone ki vajah se vimaan ko indhan bharne ke liye vahaan utaara gaya hai. Haalaanki vimaan mein savaar yaatriyon ne jiyo news channel ko bataaya ki vimaan ko Lahore mein isliye utaara gaya taaki Pakistan international airlines ke captain taarik jaaved ki beti isse utar sake. Unhonne kaha ki unhonne ladki ko vimaan se utarate hue dekha tha. Yaatriyon dvaara virodh kiye jaane par vimaan apni yaatra par vaapas nikla. Ghaate mein chal rahi Pakistan international airlines ko udaanon mein deri aur udaanein radd hone ki vajah se pichhle kai saalon se janta aur kaanoon nirmaataaon ki aalochna ka saamana karna pada hai.


IOB Ko Teesari Timaahi Mein 116.50 Karod Ka Shuddh Laabh

IOB Ko Teesari Timaahi Mein 116.50 Karod Ka Shuddh Laabh

Breaking »

Nai Delhi: Saarvajanik kshetr ke Indian overseas bank ko 31 December 2012 mein samaapt timaahi ke dauraan 116.50 karod rupaye ka shuddh laabh huaa hai, jo isse pichhle saal ki isi timaahi se 7.60 feesadi adhik hai. Isse pichhle vittavarsh ki teesari timaahi mein bank ne 108.27 karod rupaye ka munaafa kamaaya tha. Aalochya timaahi mein bank ki kul aay bhi badhkar 5,846.98 karod rupaye par pahunch gayi, jo isse pichhle saal ki samaan timaahi mein 5,015.33 karod rupaye thi. December mein samaapt teesari timaahi ke dauraan bank ki byaaj se hone waali aay bhi 16 feesadi badhkar 5333.14 karod rupaye par pahunch gayi, jo pichhle saal ki isi timaahi mein 4,604.26 karod rupaye thi. Chaaloo vittavarsh ki teesari timaahi mein bank ki gair-nishpaadit astiyaan (NPA) bhi 2.33 feesadi badh gaya, jabki isse pichhle saal ki isi timaahi mein bank ka NPA 1.23 feesadi tha.


Kaanda Ki Company Ka Casino Vaala Jahaaj Hoga Neelaam

Kaanda Ki Company Ka Casino Vaala Jahaaj Hoga Neelaam

Breaking »

Panaji: Haryana ke poorv mantri gopaal kaanda ki company ke casino (juaaghar) vaale jahaaj ko agar jaldi hi mandovi nadi se sthaanaantarit naheen kiya gaya to Goa sarkaar use neelaam kar degi. Is jahaaj ke license ki avadhi khatm ho chuki hai. Goa ke mukhyamantri manohar parrikar ne aaj vidhaanasabha ko yah jaankaari di. Sadan ko bataaya gaya ki golden globe hotels private limited ke svaamitv vaale jahaaj M vi leela ko raajya sarkaar ek laavaaris jahaaj maankar apne adhikaar mein le legi. Parrikar ne kaha, ham paryatan kaanoon ke tahat is jahaaj ko apne adhikaar mein leinge air ise neelaam kar deinge, kyonki iske license ki avadhi khatm ho chuki hai. Bhaajapa ke netrutv waali sarkaar pehle hi is jahaaj ko ek company se doosari company ko sthaanaantarit karne ka adhikaar haasil kar chuki hai. Unhonne kaha, agar yah jahaaj kisi doosari company ko bech bhi diya jaata hai to bhi raajya sarkaar ise juaaghar chalaane ka license naheen degi. Mukhyamantri ne kaha ki raajya ke kul chhah juaagharon mein se do (kaanda ka ek juaaghar bhi shaamil) juaaghar band ho chuke hain, kyonki unhonne shulk ka bhugataan naheen kiya. Unhonne kaha, ham in donon juaagharon ke badle kisi aur juaaghar ko chalaane ki anumati naheen day rahe hain. Iska matlab yah hai ki ab raajya mein sirf chaar hi juaaghar honge.


Kamal Quraan Ke Shabd Hataane Ko Taiyaar, Court Ne Barkaraar Rakha Ban

Kamal Quraan Ke Shabd Hataane Ko Taiyaar, Court Ne Barkaraar Rakha Ban

Breaking »

Chennai: Nirdeshak-abhineta kamal Hassan apni mega bajat film 'Vishvaroopam' mein se Quraan shareef se jude kuchh vivaadaaspad shabdon ko hataane par sahamat ho gaye hain, lekin Madras High Court ki badi bench ne film par Tamil Nadu sarkaar dvaara lagaae gaye pratibandh ko barkaraar rakhane ka faisala suna diya hai. High Court ke faisale ke khilaaf kamal Hassan guruvaar ko Supreme court mein appeal daayar kar sakte hain. Dopahar baad kamal Hassan ne kaha, mere muslim bhaaiyon ne mujhse baat ki, aur humne maamala shaantipoorvak nipta liya hai. Ab mere aur muslim bhaaiyon ke beech koi matabhed naheen rah gaye hain. Unhonne yah bhi kaha ki ab yah raajya sarkaar ki jimmedaari hai ki vah sunishchit kare ki kisi ka bhi nusasaan na ho. Lekin iske baavajood 'Vishvaroopam' Tamil Nadu mein release naheen ki jaaegi, kyonki Madras High Court ki singal-judge bench dvaara mangalvaar ko diye gaye pratibandh hata dene ke faisale ko raajya sarkaar ki appeal par badi bench ne palat diya hai. Gaurtalab hai ki film par vivaad se aahat kamal Hassan ne din mein kaha tha ki agar unhein insaaf naheen mila to vah desh tak chhod sakte hain.


Obama Ne Pesh Kiye Aavrajan Sudhaar, Sansad Ki Manjoori Ka Intajaar

Obama Ne Pesh Kiye Aavrajan Sudhaar, Sansad Ki Manjoori Ka Intajaar

Breaking »

Washington: Ameriki raashtrapati Barack Obama ne lambe samay se prateekshit aavrajan sudhaar pesh kiye hain. Isse 1.1 karod bina dastaavejon vaale aavrajakon ko kaanooni darja mil sakega. In sudhaaron mein rojagaar shreni mein kisi desh ki saalaana seema ko samaapt kiye jaane ka bhi praavadhaan hai. Isse badi sankhya mein Bhaarat ke praudyogiki kshetr se jude logon aur peshevaron ko faayda hoga. Loss Vegas mein neetiyon par ek vruhad sambodhan mein Obama ne sansad se aagrah kiya ki vah unke prastaavon par kaaryavaahi kare. Obama ne kaha, ''Isse hamaara kaaryabal yuva rahega, hamaara desh takaneeki morche par aage rahega aur duniya mein sabse behtar aarthik engine ke roop mein aage aa sakega. Aakhir aavrajakon ne hi Google aur Yahoo jaise kaarobaar shuroo kiye hain. Unhonne ek naya udyog taiyaar kiya jisse rojagaar ka srujan huaa aur hamaare naagrikon ko nai samruddhi mili. '' Vruhad sudhaar yojana ke anya prastaavon mein vigyaan, praudyogiki, engineering aur ganit (stem) ke diploma, ameriki vishvavidyaalayon se Ph. D. Aur master ki degree haasil logon ko natthi green card pradaan karna hai. Raashtrapati ne iske saath hi rojagaar srujan karne vaale udyamiyon ke liye shuruaati visa dene ka bhi prastaav kiya hai. In prastaavon se ameriki niveshakon aur graahakon se vitt aur raajasv aakarshit karne vaale videshi udyamiyon ko America mein kaarobaar shuroo karne aur pragati karne ki anumati mil sakegi. Yadi unki companiyaan aur aage badh jaati hain to unhein yahaan sthaayi taur par rahane ki anumati milegi. Isse ameriki logon ke liye rojagaar ke avsar upalabdh honge aur arthavyavastha ko raftaar milegi. White house ke bayaan mein kaha gaya hai ki puraane pad chuke kaanooni aavrajan kaaryakram mein sudhaar kiya ja raha hai jisse vibhinn shreniyon mein saalaana visa seema mein chhoot dekar maujooda aur bhavishya ki maang poori ki ja sake. Obama ne iske saath hi parivaar praayojit aavrajan pranaali mein lambit maamalon ko khatm karne ka prastaav kiya hai. Iske tahat bina istemaal vaale visa vaapas liye jaaenge aur asthaayi taur par saalaana visa sankhya badhaai jaaegi. Parivaar praayojit aavrajan pranaali mein vibhinn deshon ki maujooda seema ko 7 se badhaakar 15 feesad kiye jaane ka bhi prastaav hai. Obama ne kaha, ''Haal ke barso mein chaar high-tech shuruaati companiyon ki sthaapana America mein doosare desh ke naagrikon dvaara ki gayi. Chaar nae chhote kaarobaar ke maalikon mein se ek aavrajak hai. '' Ameriki raashtrapati ne kaha ki sabhi jaante hain ki aaj jo aavrajak pranaali hai vah puraani ho chuki hai. Yah pranaali hamaari arthavyavastha ko aage badhne mein madad karne ke bajaay ise rok rahi hai. Anya baaton ke alaava Obama ke prastaavon mein rojagaar srujan karne vaale udyamiyon ke liye shuruaati visa, niveshak visa mein avsaron ke vistaar, sangheeya raashtreeya suraksha vigyaan aur takaneeki prayogashaala kshetr ke liye nai visa shreni banaana shaamil hai. Bina dastaavejon par 1.1 karod aavrajakon ka ullekh karte hue Obama ne kaha ki unhonne haalaanki niyam tode hain lekin unhein vaapas bhej paana asambhav hai. Inmein se 2,40,000 se adhik bhaarateeya hain. Obama ne kaha, ''Ye 1.1 karod purush aur mahilaaen yahaan hain. Inmein se kaafi log barso se yahaan hain. Ye log hamaare liye samasya naheen hain, balki samudaaya mein yogadaan kar rahe hain. '' ameriki raashtrapati ne kaha ki desh ke madhyam varg ko majaboot karne aur rojagaar ke avsaron ke srujan ke liye pranaali mein badlaav jaroori hain.


Sarkaar Sthir Hai, Aur Isteefon Ki Aashanka Naheen Shettaar

Sarkaar Sthir Hai, Aur Isteefon Ki Aashanka Naheen Shettaar

Breaking »

Bengaluru: Poorv mukhyamantri BS yediyurappa samarthak aur mantriyon evam vidhaayakon ke isteefe dene ke khatre ke beech Karnataka ke mukhyamantri jagadeesh shettaar ne Budhvaar ko kaha ki unki sarkaar sthir hai tatha unhein aur isteefon ki aashanka naheen hai. Shettaar ne yahaan kaha,''Main sabhi bhaajapa vidhaayakon ke sampark mein hoon. Ve vidhaanasabha ki sadasyata se isteefa naheen dene ja rahe. '' udhar, apni raajaneetik daavapeinch se bhaajapa sarkaar ke liye sankat khadi karne vaale yediyurappa ne shettaar ko chunauti di yadi 'Unke paas bahumat hai to ve bajat pesh karein. ' Bijapur jile ke Indy mein samvaadadaataaon se baatcheet mein yediyurappa ne kaha, ''Kuchh aur mantriyon evam vidhaayakon ke isteefe ka intajaar keejiye. Main kisi par isteefe ke liye dabaav naheen daal raha. '' haalaanki kal 12 vidhaayakon ke isteefe ke baad bilkul maamooli bahumat se apni sarkaar chalaane vaale shettaar ne mangalvaar ko aarop lagaaya tha ki in vidhaayakon ne dabaav mein isteefa diya. Unhonne kaha,''Sarkaar sthir hai aur main (8 February ko) bajat pesh karoonga. '' unhonne is aarop ka khandan kiya ki vidhaanasabhaadhyaksh ke ji bopaiya ne vidhaayakon ke tyaagapatr sveekaarane mein deri kar raajaneeti ki hai. Upamukhyamantri evam pradesh bhaajapa adhyaksh ke S ishvarappa ne kaha ki yadi Congress avishvaas prastaav laati hai to sarkaar usaka mukaabala karne ko taiyaar hai. Ishvarappa ne 4 February se shuroo ho rahe bajat satr se pehle is sankat aur usase nibatne ke taur tareekon par shettaar, bhaajapa mahaasachiv anant Kumar evam raashtreeya swayamsevak sangh ke neta santosh samet sheersh netaaon ke saath baatcheet ki hai. Kal 13 asantusht bhaajapa vidhaayak raajya sachivaalaya mein vidhaanasabhaadhyaksh se unke kaaryaalaya mein mile the aur unhonne vidhaanasabha ki sadasyata se apna isteefa unhein saunpa tha. Kai ghante baad isteefe manjoor kiye gaye the. Ek vidhaayak vittaala katakadonda ka isteefa takaneeki kaaranon se asveekaar kar diya gaya. Baarah asantusht vidhaayakon ke isteefe ke baad vidhaanasabha mein bhaajapa ke paas 105 sadasya, Congress ke paas 71 tatha janta dal secular ke paas 26 sadasya hain jabki saat nirdaleeya vidhaayak evam vidhaanasabhaadhyaksh hain. Ek nirdaleeya vidhaayak sarkaar ka samarthan kar rahe hain.


Vishvaroopam Par Bole Shinde, Ham Pata Lagaaenge Ki Kya Huaa Hai

Vishvaroopam Par Bole Shinde, Ham Pata Lagaaenge Ki Kya Huaa Hai

Breaking »

Nai Delhi: Bhaari bharakam bajat ki film 'Vishvaroopam' ke release ko lekar dikkaton ka saamana kar rahe filmstar kamal Hassan ke samarthan mein aate hue kendra ne Budhvaar ko kaha ki desh mein har kisi ko abhivyakti ki svatantrata hai aur kalaakaaron ko apni pasand ka kaam karne ki poori aajaadi hai. Kendreeya gruhamantri susheel Kumar shinde ne kaha, '' hamaara svatantr samaaj hai jahaan abhivyakti ki aajaadi hai. Kalaakaaron ko aajaadi hai. Hamaara apna ek samvidhaan hai. '' unase kamal Hassan ke us bayaan par savaal kiya gaya tha ki Tamil Nadu sarkaar naheen chaahati ki vah raajya mein rahein aur vah raajya chhodkar ja sakte hain aur desh ya videsh mein koi dharmanirpeksh jagah talaashakar vahaan raheinge. Vishvaroopam ke release ki raah mein aa rahi dikkaton ke baare mein poochhane par shinde ne kaha ki kuchh raajyon mein kuchh dikkatein hain aur vah ise dekheinge (ki kya dikkat hai). ''Ham dekheinge. Ham pata lagaaenge ki kya huaa hai. ''