Yashavant Sinha Ne Kaha- Modi Hain Secular, Neeteesh Dein Saath

India »

Yashavant Sinha Ne Kaha- Modi Hain Secular, Neeteesh Dein Saath

Nai Delhi: Varsh 2014 mein hone vaale Loksabha chunaav ke liye raashtreeya janataantrik gathabandhan (NDA) ki or se pradhaanamantri pad ke ummeedavaar ke roop mein Gujarat ke mukhyamantri Narendra Modi ke naam ka ailaan kiye jaane ki baat kehkar bhaarateeya janta party (BJP) ke varishth neta yashavant sinha ne somvaar ko us bahas ko fir se hava de di, jo kaafi lambe arase se party aur gathabandhan mein chal rahi hai. NDTV India ke Akhilesh sharma se khaas baatcheet mein bhi yashavant sinha ne saaf-saaf kaha ki na sirf Narendra Modi is samay sabse zyaada lokapriya neta hain, balki vah poori tarah dharmanirpeksh (secular) bhi hain. Unhonne pradhaanamantri pad ke liye Narendra Modi ki daavedaari ka virodh kar rahe gathabandhan ke pramukh ghatak janta dal (United) ke neta aur Bihar ke mukhyamantri neeteesh Kumar ko bhi salaah di ki unhein Modi ka saath dena chaahiye. Yashavant sinha ne daava kiya hai ki Gujarat mein hue dange nishchit roop se durbhaagyapoorn the, parantu unke liye (Narendra) Modi ko doshi thaharaana aur badnaam karna galat hai. Unhonne kaha ki dange hamaare desh mein pehle bhi hote rahe hain, aur us samay va un raajyon mein bhi hue hain, jab Congress ya sapa pramukh mulaayam Singh Yadav shaasan kar rahe the. Unhonne varsh 1984 mein bhootapoorv pradhaanamantri shreemati indira Gandhi ki hatya ke baad hue sikh-virodhi dangon ka zikr karte hue kaha ki Rajiv Gandhi bhi to tamaam aaropon ke baavajood pradhaanamantri bane the. Yashavant sinha ke mutaabik Narendra Modi ko pradhaanamantri pad ka ummeedavaar ghoshit kar dene ki sthiti mein voton ka dhruveekaran ho jaane ki atkalein bhi niraadhaar hain. Unka daava hai ki aisa karne se BJP ko pichhli baar se bhi zyaada seatein haasil hongi. Unhonne yahaan tak kaha ki ab Loksabha chunaav mein zyaada vakt naheen bacha hai, aur Narendra Modi ki ummeedavaari ka ailaan jald hi ho jaana chaahiye. Yashavant sinha ne raashtreeya swayamsevak sangh (RSS) par bhi hamla bola, aur kaha ki RSS ko BJP ka micro management band karna chaahiye. Unhonne party ke anya varishth neta aur poorv up-pradhaanamantri Lal Krishna Advani ki is baat se poorn sahamati jataai ki RSS ko BJP ke rojamarra ke kaamkaaj mein dakhalaandaaji naheen karni chaahiye. BJP ke nivartamaan adhyaksh nitin gadkari ke khilaaf party adhyaksh pad ka chunaav ladne ke liye unke (yashavant sinha ke) dvaara naamaankan patra mangavaae jaane par savaal ke javaab mein unhonne kaha ki gadkari par lage bhrashtaachaar ke aaropon se party ki chhavi ko nuksaan ho raha tha, isliye vah chunaav ladne ke liye taiyaar the, aur yadi gadkari ne isteefa na dekar parcha bhara hota, to vah bhi naamaankan patra bhar dete.

Yashavant Sinha Ne Kaha- Modi Hain Secular, Neeteesh Dein Saath http://www.angrejinews.com/pic/584