Vyaalaar Ne Maangi Maafi, Sarkaar Ne Di Safaai

Breaking »

Vyaalaar Ne Maangi Maafi, Sarkaar Ne Di Safaai

Nai Delhi: Sooryanelli yaun prataadna maamale ko lekar poochhe gaye savaal ke javaab mein pravaasi maamalon ke mantri vyaalaar ravi ki tippani ne kendra ki sanyukt pragatisheel gathabandhan sarkaar ko asahaj sthiti mein la khada kiya. Baad mein ravi ne us bayaan ke liye Kerala ki mahila samvaadadaata se maafi maangi aur apna bayaan vaapas liya. Ravi ne kaha, "Main apne bayaan ke liye maafi maangata hoon. Main us TV channel ko apni tippani ke liye khed jata chuka hoon jiske liye samvaadadaata kaam karti hain. " Udhar, raashtreeya mahila aayog ki adhyaksh mamata sharma ne kaha hai ki aayog is maamale ki jaanch karega. Saamaajik kaaryakarta ranjana kumaari ne kaha, "Satta ke shikhar aur paripkvata se lais hote hue bhi is prakaar ki ashobhaneeya tippani karna atyant nindaneeya hai. " unhonne kaha ki is mudde ko sansad mein uthaaya jaana chaahiye kyonki yah raajaneetik varg ki rojamarra ki aadat mein shaamil hota ja raha hai. Is beech maamale par beechabachaav karte hue keindreeya soochana evam prasaaran mantri maneesh tivaari ne kaha ki choonki unke saathi aur pravaasi bhaarateeya maamalon ke mantri vyaalaar ravi ne apni tippani ke liye maafi maang li hai isliye ab maamale ko vaheen jas ka tas rahane diya jaae. Tivaari ne kaha ki saarvajanik falak par kaam karne vaale kisi bhi vyakti se ashobhaneeya tippani ki ummeed naheen ki jaati, lekin ravi ne maafi maang li hai aur apni tippani vaapas bhi le li hai to maamale par parda daal diya jaae. Ullekhaneeya hai ki Kerala ki ek mahila patrakaar ne ravi se sooryanelli yaun prataadna maamale mein raajya sabha ke up sabhaapati PJ kuriyan ko lekar unka rukh jaanane ka prayaas kiya tha. Iske javaab mein vyaayalar ravi ne patrakaar par niji savaal daag diya. Ravi ne samvaadadaata se poochha, "Kya aapko kuriyan se koi niji dushmani hai? Main aashvast hoon aap karein. Kya aapke aur unke beech bhi pehle kuchh huaa hai? " ravi ki yah tippani camere mein rikaard ho gayi. Sooryanelli yaun prataadna maamala ka naamakaran Kerala ke idukki jile ke sthaan par huaa hai. Is maamale ki peedita isi jagah ki rahane waali hai. January 1996 mein 16 varsh ki ek kishori ka apaharan ek bas conductor ne kar liya aur use 45 dinon tak jagah-jagah le jaakar 42 logon ne dushkarm kiya. Yah maamala fir tab prakaash mein aaya jab isi varsh 31 January ko sarvochch nyaayaalaya ne maamale mein 2005 mein Kerala uchch nyaayaalaya ke faisale ko khaarij karte hue dobaara sunavaai ke aadesh diye. Uchch nyaayaalaya ne 35 aaropiyon mein se ek ko chhod baaki sabhi ko riha kar diya tha. Peedita ab 32 varsh ki mahila hai aur raajya sarkaar ki karmachaari hai. Uske parivaar ne lagaataar yah maang ki hai ki PJ kuriyan ko kathaghare mein khada kiya jaana chaahiye kyonki unhonne bhi peedita ka shoshan kiya tha. Parivaar ka aarop hai ki kuriyan ko unki raajaneetik rasookh ke kaaran kaanoon se bachaaya gaya hai.

Vyaalaar Ne Maangi Maafi, Sarkaar Ne Di Safaai http://www.angrejinews.com/pic/1903