'Vishvaroopam Release Par Hua Samjhauta, Saat Dialogue Hateinge

India »

'Vishvaroopam Release Par Hua Samjhauta, Saat Dialogue Hateinge

Chennai: Takareeban haftebhar chale suspense aur draame ka khaatma karte hue kamal Hassan ki vivaadit tamil film 'Vishvaroopam' kuchh scene hataae jaane ke baad raajya mein release ke liye taiyaar hai. Daraasal, Tamil Nadu sarkaar ki madhyasthata mein Hassan aur film ka virodh kar rahe muslim sangathanon ke beech shanivaar ko baatcheet hui jismein donon pakshon ke beech sulah ho gayi. Sachivaalaya mein gruh sachiv aar Rajgopal ki maujoodagi mein chhah ghante tak chali baatcheet ke baad baahar aae Hassan ne kaha ki ve kuchh audio hisse hataane ko raaji ho gaye hain. Unhonne ummeed jataai ki ab jald hi film par lagi paabandi hata li jaaegi. Gaurtalab hai ki is film ka virodh karne vaale kuchh muslim sangathanon ka aarop tha ki ismein kuchh aise drushya hain jinse unki dhaarmik bhaavanaaen aahat hoti hain. Kareeb 100 karod rupaye ki laagat se banaai gayi is film ke abhineta Hassan ne samvaadadaataaon se kaha, ''Vichaar-vimarsh ke turant baad ham release ki taareekh ghoshit kar deinge. Ham apni takaneeki team se bhi vichaar-vimarsh kareinge. '' Hassan ne kaha ki vah Madras uchch nyaayaalaya mein daayar us yaachika ko vaapas le leinge jismein film ki release par lagaai gayi do hafte ki paabandi ko chunauti di gayi thi. Unhonne ummeed jataai ki sarkaar film se paabandi hata legi. Tamil Nadu muslim munetr kadgam ke pratinidhi aur vidhaayak MH javaahirulla ne kaha ki Hassan film ke kuchh aise drushya kaatne par raaji hue hain jin par muslimon ko aapatti hai. Mukhyamantri jayalalita ki or se film ki release ka raasta saaf karaane ke vaade ke baad hui tripksheeya baithak sampann hone par javaahirulla ne kaha, ''Baithak ka nateeja achha raha. '' bahubhaashi film vishvaroopam 11 January ko hi release hone waali thi. Yeh Kerala sahit anya raajyon mein release ho chuki hai. Shukravaar ko uttar Bhaarat ke cinemagharon mein yeh film release hui. Hassan ke mutaabik, jahaan-jahaan yeh film release hui vahaan ise darshakon ki behtar pratikriya mili.

'Vishvaroopam Release Par Hua Samjhauta, Saat Dialogue Hateinge http://www.angrejinews.com/pic/936