Vidhaayakon Ne Karavaai Chunban Pratiyogita, Vivaad

Breaking »

Vidhaayakon Ne Karavaai Chunban Pratiyogita, Vivaad

Ranchi Jharkhand ke paakud jile mein paramparaagat graameen mele ke dauraan aadivaasi danpatiyon ke liye chunban pratiyogita aayojit kar Jharkhand mukti morcha ke do vidhaayakon ne vivaad paida kar diya. Raajya mein sattaadhaari BJP ne maang ki ki donon vidhaayakon ko nilambit kiya jaae, kyonki unhonne sthaaneeya sanskruti ka apamaan kiya hai. Baharahaal, pratiyogita ke aayojak JMM vidhaayak Simon maraandi ne kaha ki aadivaasi samaaj mein talaak ki badhti sankhya par lagaam lagaane ke liye chunban pratiyogita aayojit ki gayi. Simon santhaal paragana ke litteepaara se vidhaayak hain. Party ke vidhaayak Stefan maraandi bhi is mele mein maujood the . Jharkhand ki rajdhani Ranchi se kareeb 400 kilometer door santhaal paragana ke jhumariya gaanv mein mele ke dauraan kal raat karaai gayi chunban pratiyogita ka vidiyo aaj social media par vaayaral ho gaya. Video mein aadivaasi danpatiyon ko chunban lete dekha ja raha hai jabki vahaan maujood bheed taaliyaan baja rahi hai. BJP ki Jharkhand ikaai ke upaadhyaksh hemalaal murmoo ne is mudde par Simon aur Stefan ko vidhaanasabha se nilambit karne ki maang ki . Pradesh BJP upaadhyaksh hemalaal ne Ranchi mein patrakaaron ko bataaya, jeemaem ke vidhaayak Simon maraandi aur Stefan maraandi ne hul mela ke naam par santhaal paragana ki sanskruti ka apamaan kiya hai aur chubann pratiyogita ka aayojan kiya hai. Ham maang karte hain ki sadan se unhein nilambit kiya jaae aur unhein kal se shuroo ho rahe sheetakaaleen satr mein sadan ki kaaryavaahi mein hissa naheen lene diya jaae. Hemalaal ne kaha ki santhaal paragana ki sanskruti aisi kabhi naheen rahi aur yeh mahila shakti ka apamaan hai. BJP neta ne kaha ki donon vidhaayak gram pradhaanon se maafi maangein. Unhonne kaha ki santhaal paragana mein ek ladka aur ek ladki haath bhi naheen milaate . Pratiyogita ke baare mein poochhe jaane par Simon ne bataaya ki shaadeeshuda jodon ke beech bandhan ko majaboot karne ke maksad se 20 danpatiyon mein yeh pratiyogita karaai gayi . Unhonne kaha ki santhaal samaaj ko samajhne ki koshish koi naheen kar raha. Unhonne kaha ki talaak ke badhte maamalon par rok ke liye is pratiyogita ka aayojan kiya gaya . Jeemaem neta Simon ne kaha ki Stefan pratiyogita sampann hone ke baad vahaan pahunche the . Jharkhand ke graameen vikaas mantri aur BJP neta neel kanth Singh munda ne dumaka mein kaha ki yeh aadivaasi samaaj ka apamaan hai. Mantri ne vijetaaon ko puraskaar dene ko lekar Simon ki aalochna bhi ki.

Vidhaayakon Ne Karavaai Chunban Pratiyogita, Vivaad http://www.angrejinews.com/pic/183599