Uchchatam Nyaayaalaya Ne Sahaara Ki Yaachika Khaarij Ki

Business »

Uchchatam Nyaayaalaya Ne Sahaara Ki Yaachika Khaarij Ki

Nai Delhi: Uchchatam nyaayaalaya ne niveshakon ko 24 hajaar karod rupae lautaane ke faisale par sahaara samooh ki punarvichaar yaachika khaarij ki. Nyaayamoorti KS Radhakrishnan aur nyaayamoorti JS khehad ki khandapeeth ne sahaara samooh ki or se daayar punarvichaar yaachika par Budhvaar ko chamber mein vichaar karne ke baad use khaarij kar diya. Isi peeth ne gat 31 August ko sahaara samooh ko niveshakon ka dhan vaapas karne ka aadesh diya tha. Nyaayaadheeshon ne apne aadesh mein kaha, ''Hamaare saamane pesh saare record par saavadhaani se gaur kiya gaya hai. In punarvichaar yaachikaaon par vichaar naheen kiya ja raha hai aur isliye inhein khaarij kiya ja raha hai. '' nyaayaalaya ne kaha ki companiyon dvaara pesh sabhi daleelon par pehle faisale ke samay hi vichaar kiya ja chuka tha. In par fir se gaur karne ki koi aavashyakta naheen hai. Nyaayaadheeshon ne kaha, ''Is maamale mein ham donon dvaara vyakt rai mein kisi prakaar ka vichlan naheen hai. Iske vipreet, aavedak dvaara kaanooni aur tathyaatmak rup se prastut sabhi daleelon par har sambhav pahaloo aur drushtikon se gaur kiya gaya, aur unka nistaaran kiya gaya aur javaab diya gaya. '' sahaara ki punarvichaar yaachika khaarij kiya jaana isliye mahatvapoorn ho gaya hai kyonki in companiyon ne niveshakon ka paisa lautaane ke liye aur samay diye jaane ki ek nai arji bhi pesh kar rakhi hai. Nyaayamoorti Radhakrishnan aur nyaayamoorti khehad ki khandapeeth ne 31 August ko faisala sunaaya tha lekin 5 December ko pradhaan nyaayaadheesh altamas kabeer ki adhyakshata waali peeth ne is faisale mein sudhaar karte hue sahaara samooh ki companiyon ko niveshakon ka dhan lautaane ke liye nau saptaah ka aur samay de diya tha. Nyaayamoorti kabeer ki adhyakshata waali peeth ne SEBI aur niveshakon ke sangathan ke virodh ke baavajood sahaara samooh ko yeh mohlat de di thi. SEBI ne iska virodh karte hue kaha tha ki kisi anya peeth ke nirnaya mein is tarah se sudhaar karna uchit naheen hai aur sahaara samooh ki arji par nyaayamoorti Radhakrishnan aur nyaayamoorti khehad ki peeth ko hi vichaar karna chaahiye. Sahaara samooh ne mangalvaar ko bhi pradhaan nyaayaadheesh ke samaksh is maamale ka ullekh kiya tha. Nyaayamoorti Radhakrishnan aur nyaayamoorti khehad ki khandapeeth ne 31 August ke nirnaya mein sahaara samooh ki in companiyon dvaara niveshakon se dhan jutaane ke liye niyam kaanoonon ka ullanghan karne ke kaaran uske khilaaf teekhi tippaniyaan ki theen. Nyaayaalaya ne kaha tha ki is tarah ke aarthik aparaadhon se sakhti se nibatna chaahiye. Nyaayaalaya ne kaha tha ki yadi sahaara India real estate corporation aur sahaara housing investment corporation niveshakon ka dhan lautaane mein vifal rahi hai to SEBI usaki sampattiyon ko kurk karne ke saath hi bank khaate bhi jabt kar sakti hai. Nyaayaalaya ne SEBI ki kaarravaai ki nigraani ke liye sheersh adaalat ke sevaanivrutt nyaayaadheesh BN Agrawal ko niyukt kiya tha. Sahaara India real estate kaaparereshan ne 8 March 2008 tak 19,400.87 karod aur sahaara housing investment kaaparereshan 6380.50 karod rupae jutaae the lekin 31 August tak is mad mein 24,029.73 karod rupaye kul raashi thi. Sahaara samooh ko ab 24,029.73 karod mool dhan aur kareeb 14 hajaar karod rupaye ke byaaj ki rakam ke saath kareeb 38 hajaar karod rupaye ka bhugataan karna pad sakta hai.

Uchchatam Nyaayaalaya Ne Sahaara Ki Yaachika Khaarij Ki http://www.angrejinews.com/pic/276