Teesara Ekadivseeya 'Sammaan Ki Jang Mein Aakhirkaar Mili Fatah

Cricket »

Teesara Ekadivseeya  'Sammaan Ki Jang Mein Aakhirkaar Mili Fatah

Nai Delhi: Pakistan ke khilaaf pehle hi shrunkhala ganva chuki bhaarateeya team ne ravivaar ko Ferozshah Kotla maidaan mein khele aae aakhiri ekadivseeya va apne 'Sammaan ki jang' mein 10 run se jeet haasil ki. Behad romaanchak raha yeh lo scoring mukaabala aakhiri overon tak saanse thaamane wala bhi tha. 49vein over mein Ishaant sharma ki paanchaveen geind par Yuvraj Singh ne Pakistani ballebaaj mohammad hafeej ka jab catch pakada tabhi logon ne raahat ki saans li. Yeh jeet England ke khilaaf hone vaale ekadivseeya mukaabale se pehle bhaarateeya team ko oorja de gayi. Bhaarateeya kaptaan Mahendra Singh Dhoni ko unki shaanadaar kaptaani aur Bhaarat ki or se sarvaadhik 36 ranon ki paari ke liye main of the match ke puraskaar se navaaja gaya jabki shrunkhala mein do shatak lagaane vaale Pakistani salaami ballebaaj naasir Jamshed ko main of the series ka puraskaar diya gaya. Jeet ke baad kaptaan Dhoni ne iska shreya geindabaajon aur kshetrarakshakon ko diya. Unhonne kaha, "168 ka score kaafi naheen hai lekin hamein mukaabala karna chaahiye. Spinron ne aaj shaanadaar khel dikhaaya lekin mera main of the match hamaare kshetrarakshak hain. " Pakistani kaptaan misbaah ul hak ne kaha, "Bhaarateeya khilaadiyon ne bahut achhi geindabaaji ki aur unka kshetrarakshan to laajavaab raha. Hamaar koshish thi ki ham nai geind ka theek se saamana kare aur usase ubarein lekin puraani hone par bhi geind spin aur swing kar rahi thi. Run banaana aasaan naheen tha. " Is mukaabale mein bhaarateeya ballebaajon ne ek baar fir niraash kiya lekin geindabaajon va kamaal ke kshetrarakshan ne team ki laaj rakh li. Ishaant sharma (36/3) ke netrutv mein apne geindabaajon ke saahasik pradarshan aur kshetrarakshakon ki athak mehnat ki badaulat Bhaarat ne Pakistan ko 10 run se haraakar series cleansweep karne ke Pakistan ke armaanon par paani fer diya. Pakistan ne yeh shrunkhala 2-1 se jaroor jeet li. Is jeet ne bhaarateeya team ko nae saal mein muskuraane ka mauka diya hai kyonki 2012 ke antim match (twenty-20) mein Pakistan ne use haraaya tha. Iske baad nae saal 2013 ke pehle match (ekadivseeya) mein Pakistan ne Bhaarat ko Kolkata mein paraajit kiya. Bhaarat ne Pakistan ke saamane 168 ranon ka lakshya rakha tha. Yeh lakshya aisa naheen tha, jise lekar Pakistan ko chinta karne ki jaroorat thi kyonki uske ballebaaj shaanadaar firm mein the lekin bhaarateeya geindabaajon ne Pakistan ke liye kathin haalaat paida kiye aur match usase chheen liya. Pakistani team lakshya ka peechha karte hue 48.5 overon mein 157 run hi bana saki. Bhaarat ki or se Ishaant ne teen wicket liye jabki Ravichandran Ashwin aur bhuvaneshvar Kumar ne do-do wicket liye. Apna pehla match khel rahe shami Ahmad ne behad prabhaavit kiya aur nau overon mein chaar maiden ke saath 23 run kharch karte hue ek wicket liya. Ravindra jadeja ko bhi ek safalta mili. Bhaarat ne 14 run ke kul yog par Pakistan ke do wicket jhatakakar achhi shuruaat ki thi lekin naasir Jamshed, misbaah ul hak aur umar Akmal ke beech hui upayogi saajhedaariyon ne bhaarateeya darshakon ke liye match ko neeras bana diya tha lekin in sabke baavajood geindabaajon ne aas naheen chhodi aur lagaataar prayaas karte rahe. Geindabaajon ka hi jordaar prayaas tha ki Pakistan ka bhi koi ballebaaj arddhashatak naheen laga saka. Misbaah ne sabse adhik 39 run banaae jabki naasir ne 34 run jode. Umar Akmal ne 25 ranon ka paari kheli. Chot ke kaaran paari ki shuruaat se maharoom rahe mohammad hafeej ne antim samay mein Ishaant ki geindon par do chauke lagaakar Pakistan ko lakshya tak pahunchaane ka prayaas kiya lekin 49vein over ki paanchaveen geind par vah mid-wicket mein Yuvraj ke haathon lapke gaye. Naasir, misbaah aur umar ke prayaason ke kaaran aisa lag raha tha ki Bhaarat ko 1983-84 ke baad apne ghar mein kisi ekadivseeya shrunkhala ke sabhi maichon mein haar milegi lekin geindabaajon ne is sambhaavana ko sach mein tabdeel hone se bacha liya. Isse pehle, haad kanpa dene waali sardi ke beech bhaarateeya team ne toss jeetkar pehle ballebaaji karte hue 43.4 overon ka saamana kiya. Bhaarat ki or se kaptaan Mahendra Singh Dhoni ne ek baar fir sabse adhik 36 run banaae. Dhoni ne 55 gaindo par ek chauke aur teen chhakke lagaae. Suresh raina ne 31 ranon ka yogadaan diya. Ravindra jadeja ne 27 run banaae. Jadeja ke roop mein Bhaarat ka antim wicket gira. Is match mein toss aham maana ja raha tha kyonki mausam mein nami thi. Jeetne waali team agar geindabaaji karti to use faayda hota lekin bhaarateeya kaptaan ne pehle ballebaaji ka faisala kiya. Bhaarat ki shuruaat kharaab rahi. Delhi ke ab tak ke sabse safal cricket star Virendra Sehwag ke sthaan par antim ekaadash mein shaamil kiye gaye Ajinkya rahaane is mauke ko bhuna naheen sake aur 19 ke kul yog par mohammad Irfan ki geind par out hue. Rahaane chaar run bana sake. Yeh run rahaane ne apne hisse mein aae ekamaatr chauke ki madad se banaae. Sehwag ke saath-saath Gautam gambheer ke sthaan par bhi talavaar latak rahi thi. Gambheer se achhi paari ki ummeed thi lekin vah bhi 15 run banaakar out ho gaye. Gambheer ko Irfan ne umar Akmal ke haathon catch karaaya. Gambheer ne 27 geindon par ek chauka lagaaya. Is shrrunkhala mein ek baar fir bhaarateeya salaami jodi naakaam rahi. Is kaaran ab madhya kram par paari ko sudhaarane ki jimmedaari aa gayi. Yeh jimmedaari uthaani thi Delhi ke vandarabvaaya viraat Kohli aur Yuvraj Singh ko, lekin donon hi naakaam rahe. Kohli ko junaid Khan ne saat run ke niji yog par Younis Khan ke haathon slip mein catch karaaya. Kohli ka wicket 37 run ke kul yog par gira. Iske baad Yuvraj ne suresh raina ke saath chauthe wicket ke liye 26 run jode. Yeh saajhedaari achhi shakl le rahi thi ki hafeej ne apni ek shaanadaar geind par Yuvraj ko bold kar diya. Yuvraj bhaunchak rah gaye aur bhaarateeya darshak hairaan. Yuvraj ka wicket 63 ranon ke kul yog par gira. Yuvvi ne 23 geindon par chaar chauke lagaae. Iske baad kaptaan Mahendra Singh Dhoni ke saath raina ne 48 ranon ki saajhedaari ki. Yeh saajhedaari dheemi lekin jaroori thi. Dhoni aur raina ne 12.5 overon mein 3.74 ke ausat se run jutaae. Raina 111 run ke kul yog par Saeed Ajmal ki geind par out hue. 70 minute ballebaaji karne vaale raina ko pagbaadha out diya gaya. Iske baad agali hi geind par Ajmal ne Ravichandran Ashwin (0) ko pagbaadha out kar chalta kiya. Ashwin ka sthaan lene aae Ravindra jadeja ne Ajmal ko hattrick poori naheen karne di. Jadeja aur Dhoni ke beech badi saajhedaari ki ummeed thi kyonki haal ke dinon mein jadeja ne ek bhi achhi paari naheen kheli hai. Donon ne sambhalakar khelna shuroo kiya lekin 35 geindon ki saajhedaari ke baad donon 20 run ki saajhedaari karke vida hue. Is baar kaptaan ne saath chhoda. Kaptaan ka wicket 131 ranon ke kul yog par gira. Bhaarateeya kaptaan ko umar gul ne umar Akmal ke haathon catch karaaya. Kul yog mein abhi 10 run hi jude the ki Ajmal ne apne doosare spell mein bhuvaneshvar Kumar ko out karke Bhaarat ko aathavaan jhatka diya. Kumar ne do run banaae. Yeh Ajmal ki teesari safalta thi. Ajmal ne apne nauvein over mein chauthi safalta haasil karte hue ishaant sharma ko 160 ke kul yog par out kiya. Ishaant ne paanch run banaae. Vah Ajmal ki geind par unheen ke haathon out hue. Ishaant ne 15 gaindo ka saamana kiya aur jadeja ke saath nauvein wicket ke liye 19 run jode. Pakistan ki or se Ajmal ne 24 run dekar paanch wicket liye jabki Irfan ko do safalta mili. Junaid, gul aur hafeej ne ek-ek wicket paaya. Pakistan ne chennai mein khela gaya pehla match paanch wicket se jeeta tha jabki Kolkata mein use 85 ranon se jeet naseeb hui thi. Kotla mein Pakistan aur Bhaarat ke beech yeh doosra match tha. Donon ne ek-ek match jeeta hai.

Teesara Ekadivseeya 'Sammaan Ki Jang Mein Aakhirkaar Mili Fatah http://www.angrejinews.com/pic/38