Shreenivaasan, Anya Ki Jaanch Ke Liye Samiti Ke Gathan Par Court Ne Faisala Surakshit Rakha

India »

Shreenivaasan, Anya Ki Jaanch Ke Liye Samiti Ke Gathan Par Court Ne Faisala Surakshit Rakha

Nai Delhi: Supreme court ne IPL sattebaaji aur spaat fixing prakaran mein N shreenivaasan aur 12 cricketeron ke khilaaf aaropon ki jaanch ke liye samiti ke gathan par apna faisala aaj surakshit rakha. nyaayamoorti AK patanaayak ki adhyakshata waali peeth ne pehle sujhaav diya tha ki nyaayamoorti mudgal samiti hi aage bhi jaanch karein, lekin BCCI aur shreenivaasan ne iska virodh kiya hai. Court ne kaha hai ki is par faisala baad mein sunaaya jaaega. court ne kaha ki jab tak sahi tareeke se gathit jaanch samiti aaropon ki vistaar se tafteesh naheen karti, vah shreenivaasan aur 12 anya ke khilaaf mudgal samiti ki report mein lagaae gaye aaropon par kisi nateeje par naheen pahunch sakta hai. court ne kaha ki aaropon ki gopaneeyata ko barkaraar rakhane ke liye hi usane mudgal samiti se aage ki jaanch karaane ka sujhaav diya tha. Court ne kaha ki yadi nai jaanch samiti ka gathan kiya jaata hai to aaropon ki jaankaari doosaron ko bhi ho jaaegi. isse pehle, sheersh adaalat ne samiti se poochha tha ki kya vah N shreenivaasan aur 12 anya ke khilaaf aage ki jaanch ki ichhuk hai. Court ne yeh bhi kaha tha ki ismein jaanch agencyan samiti ki madad kareingi. BCCI ne bhi court ko bataaya tha ki usane maamale ki aage jaanch ke liye teen sadasyeeya samiti gathit karne ka faisala kiya hai, lekin peeth ne kaha ki sabhi pakshon aur mudgal samiti ke javaab ko sunane ke baad hi koi faisala liya jaaega. board ki kaaryasamiti ne 20 April ko apni aapaat baithak mein poorv harfanmaula ravi shaastri, Calcutta uchch nyaayaalaya ke poorv mukhya nyaayaadheesh jeen Patel aur CBI ke poorv nideshak aar ke raaghavan ko jaanch samiti ka sadasya banaaya tha. Nyaayaalaya ne kaha ki jaanch samiti ke aaropon par vah apni aankhein naheen moond sakta aur tasveer saaf karne ke liye jaanch jaroori hai, kyonki seelaband lifaafe mein di gayi report mein kuchh pramukh khilaadiyon ke naam shaamil hai. Isse pehle nyaayamoorti mudgal ne teen sadasyeeya samiti ko seelaband lifaafe mein report di thi.

Shreenivaasan, Anya Ki Jaanch Ke Liye Samiti Ke Gathan Par Court Ne Faisala Surakshit Rakha http://www.angrejinews.com/pic/48998