Senioron Par Giregi Gaaj Pujaara Ko Mauka Milna Tay

Cricket »

Senioron Par Giregi Gaaj Pujaara Ko Mauka Milna Tay

Nai Delhi: Anubhavi salaami ballebaajon Gautam gambhir aur Virendra Sehwag ki lagaataar vifalta ne England ke khilaaf ekadivseeya shrunkhala ke liye in donon ke chayan par savaaliya nishaan laga diya hai, kyonki haal mein lagaataar shikast ke baad chayanakartaaon par kharaab pradarshan karne vaale khilaadiyon ko baahar karne ka dabaav hai. Chayanakarta ravivaar ko jab team chunane ke liye baithak kareinge, to pratibhaavaan cheteshvar pujaara ko 11 January se Rajkot mein England ke khilaaf shuroo ho rahi paanch maichon ki one-day shrunkhala ke liye team mein jagah mil sakti hai. Chayan samiti ke sootron ke mutaabik is baat ki adhik sambhaavana hai ki gambhir aur Sehwag mein se ek ko baahar kar diya jaae. Balle se Mahendra Singh Dhoni ke achhe pradarshan ke baad filhaal unki kaptaani ko lekar chal rahi atkalon par viraam lag gaya hai. Pujaara ko team mein jagah milna lagbhag tay hai. Unhonne Rajkot mein madhya pradesh ke khilaaf dohara shatak jada aur is dauraan 150 se 200 run ka safar sirf 17 geind mein poora kiya. Itna hi naheen pehla match Rajkot mein hona hai, jahaan pujaara ne apne lagbhag 90 pratishat run banaae hain. Gambhir ne apne pichhle 10 one-day mein do shatak aur do ardhashatak ki madad se 38.80 ki ausat ke saath 388 run banaae hain, jabki Sehwag ke naam pichhle 10 one-day mein 23.80 ki ausat se sirf 238 run darj hain. Sehwag aur gambhir Bhaarat ko achhi shuruaat dilaane mein vifal rahe hain, jiska khaamiyaaja team ko bhugatna pada hai. Chayanakarta Pakistan aur Bhaarat ke beech teesare aur antim ekadivseeya ke baad Ferozshah Kotla maidaan par baithak kareinge aur kuchh khilaadiyon ke paas is match mein achha pradarshan karke apni jagah bachaane ka mauka hoga. Sandeep Patil ki aguvaai waali chayan samiti chaahati hai ki yuva ajinkya rahaane ko mauka mile, jo 50 over ke praaroop mein pichhle ek saal se adhikaansh samay bench par rahe hain. Chayanakarta haalaanki anubhav ko dekhte hue Sehwag aur gambhir mein se ek ko team mein shaamil rakhana chaaheinge. Chayan samiti ki najarein murali vijay aur Abhinav mukund par bhi hongi, jo isi din Palam maidaan par Bhaarat A ki or se England ke khilaaf kheleinge. Lagaataar vifal rahe rohit sharma ko bhi team se baahar kiya ja sakta hai. Bhaarat A ki or se lagaataar achha pradarshan karne vaale madhya pradesh ke all-rounder jalaj Saxena par chayanakartaaon ki najarein hongi. Bhaarat A ke match ke saath chayanakartaaon ko tej geindabaaj shreesant ki fitness ko parakhane ka mauka bhi milega.

Senioron Par Giregi Gaaj Pujaara Ko Mauka Milna Tay http://www.angrejinews.com/pic/42