Posco Pariyojana Ke Liye Bhoomi Adhigrahan, Police-pradarshanakaari Bhide

Business »

Posco Pariyojana Ke Liye Bhoomi Adhigrahan, Police-pradarshanakaari Bhide

Paaraadeep: Orissa mein Posco ki bahu-prachaarit ispaat pariyojana ke liye bhoomi adhigrahan ka kaam prashaasan ki ek saal se adhik samay tak ki chuppi ke baad police tatha pradarshanakaariyon ke beech jhadap ke beech fir shuroo ho gaya. Dakshin Korea ki ispaat company Posco ki Orissa ke jagatasinhapur mein 52,000 karod rupaye ki laagat se ispaat pariyojana lagaana chaahati hai. Iske liye jameen adhigrahan ka kaam ek saal se bhi adhik samay se thap tha. Adhigrahan kadi suraksha vyavastha ke beech shuroo huaa, lekin is dauraan hinsa ko lekar daave va pratidaave kiye gaye hain. Aarop hai ki police ne pariyojana ka virodh kar rahe logon par laathiyaan chalaain, jismein kuchh gaanv vaale ghaayal ho gaye. Jila collector SK malik ne kaha, paaraadeep ke nikat Gobindpur mein bhoomi adhigrahan ki prakriya shuroo hui. Paan ki kheti karne vaale, jo kisaan jameen dena chaahate hain, unki jameen ke hastaantaran tak yah kaam chalta rahega. Atirikt jila magistrate surajeet das ne kaha, jin logon ne pehle hi sahamati day di hai, unki bhoomi ka adhigrahan kiya ja raha hai. Sootron ka kehna hai ki Posco pariyojana ka virodh kar rahe pradarshanakaariyon ne patharaav kiya, jismein police prashaasan ke paanch vaahan kshatigrast ho gaye. Unhonne kaha ki police ne Gobindpur ko jaane vaale sabhi raaste band kar diye hain. Police ne Gobindpur-dhinkiya sadak ko bhi band kar diya. Padosi irasaama, kujaang tatha jagatasinhapur ke log aage ki kaarravaai ke liye ikatthe ho rahe hain. Pariyojana ke khilaaf 2005 se aandolan chala rahi Posco pratirodh sangraam samiti ke netaaon ka aarop hai ki police ne un logon ke khilaaf kaarravaai ki, jo adhigrahan team ke Gobindpur mein pravesh ka virodh karne ki koshish kar rahe the. Laatheechaarj mein mahilaaon sahit chhah log ghaayal hue hain, jabki das ne police bal ke istemaal ke aarop ka khandan kiya hai. Das ne kaha ki kaam shaantipoorn dhang se chala aur daava kiya ki ghatna mein kisi ko chot naheen pahunche. Baaleetikira, Gobindpur mein Posco pariyojana ke virodhi beete 20 din se dharane par baithe hain. Us ilaake mein lagbhag 400 policekarmi tainaat hain. Bhoomi adhigrahan ke samay Orissa audyogik dhaancha nigam tatha Posco India ke adhikaari maujood the.

Posco Pariyojana Ke Liye Bhoomi Adhigrahan, Police-pradarshanakaari Bhide http://www.angrejinews.com/pic/1045