Pak Ke Khilaaf Pratishtha Bachaane Ke Liye Bhaarat Ki Nigaah Ballebaajon Par

Cricket »

Pak Ke Khilaaf Pratishtha Bachaane Ke Liye Bhaarat Ki Nigaah Ballebaajon Par

Nai Delhi: Lagaataar do maichon mein sharmanaak haar jhelne ke baad cleansweep ka dansh jhelne ke kagaar par khadi bhaarateeya team ravivaar ko teesare aur aakhiri ekadivseeya antararaashtreeya cricket match mein pratishtha bachaane aur Pakistan ki 3-0 se shrunkhala jeetne ki ummeedon par paani ferane ke liye Ferozshah Kotla maidaan par utaregi. Chennai mein aath wicket aur Kolkata mein 85 run se haar jhelne vaale Bhaarat ko yadi apni sarjami par kisi dwipaksheeya shrunkhala ke sabhi match ganvaane ki lajja se bachana hai, to uske ballebaajon ko achha pradarshan karna hoga. Bhaarat ke naami ballebaajon ne pichhle do maichon mein lachar khel dikhaakar kaptaan Mahendra Singh Dhoni sahit desh ke karodon cricket premiyon ko bhi niraash kiya. Bhaarat ko isse pehle 1983 mein apni dharati par West Indies se 0-5 se shikast jhelni padi thi. Pakistan ke bhi kuchh ballebaaj visheshakar naasir Jamshed lagaataar achha pradarshan kar paae hain, lekin usaki tej geindabaaji ki tikdi junaid Khan, mohammad Irfan aur umar gul ne antar paida kiya hai. In teenon ne ab tak bhaarateeya sheersh kram ko jhakjhorne mein aham bhoomika nibhaai hai. Pakistani aakraman ke saamane kaptaan Dhoni ko chhodkar koi bhi bhaarateeya ballebaaj crease par jyaada der tak naheen tik paaya. Delhi ke choti ke teen ballebaajon Virendra Sehwag, Gautam gambhir aur viraat Kohli ne ab tak do maichon mein kramash: 35, 19 aur chhah run banaae hain. In teenon se team hi naheen bhaarateeya cricket premiyon ko bhi apne ghareloo maidaan par achhe pradarshan ki ummeed rahegi. Dhoni ne bhi maana hai ki sheersh kram ke in teenon ballebaajon mein kam se kam kisi ek ko madhyakram ke ballebaajon ka saath dena hoga.

Pak Ke Khilaaf Pratishtha Bachaane Ke Liye Bhaarat Ki Nigaah Ballebaajon Par http://www.angrejinews.com/pic/41