Niryaat Mein Paanch Maheene Ki Sarvaadhik Vruddhi

Breaking »

Niryaat Mein Paanch Maheene Ki Sarvaadhik Vruddhi

Nai Delhi: engineering, samudri vastuon tatha chamade ke saamaan niryaat mein achhi vruddhi ke chalte April mein 5.26 pratishat ki niryaat vruddhi darj ki gayi, jo ki pichhle paanch maheene mein sabse adhik rahi. Doosari taraf svarn aayaat ghatne se vyaapaar ghaata kam hokar 10 arab dollar rah gaya. ek saal pehle April, 2013 mein vyaapaar ghaata 17.6 arab dollar raha tha. Chaaloo vittavarsh ke pehle maheene mein niryaat 25.63 arab dollar raha, jabki aayaat 15 pratishat ghatkar 35.7 arab dollar raha. April mein tel evam gair-tel aayaat kramash: 0.6 pratishat tatha 21.5 pratishat ghatkar 12.97 arab dollar tatha 22.74 arab dollar raha. engineering, samudri utpaad tatha chamada utpaadon ke niryaat mein pichhle maheene kramash: 21.25 pratishat, 42.18 pratishat tatha 30.42 pratishat ki vruddhi hui. Lauh ayask ka niryaat bhi 23.43 pratishat badhkar 15.2 karod dollar raha. Haalaanki, ratn evam aabhooshan niryaat 8 pratishat ghatkar 3.27 arab dollar raha. udyog visheshagyon ke anusaar sone ke aayaat par pratibandh se ratn evam aabhooshan niryaat mein kami I hai. Svarn aayaat pichhle maheene 74.13 pratishat ghatkar 1.75 arab dollar raha, jo April, 2013 mein 6.78 arab dollar tha. Niryaatakon ke sheersh sangathan fiyo ne kaha ki is saal desh ke niryaat ki vruddhi dar dohare ank mein rahane ki ummeed hai aur isse vyaapaar ghaata prabandhan seema ke daayare mein hoga. fiyo ne kaha, nai videsh vyaapaar neeti ka lakshya 2019 tak niryaat badhaakar 750 arab karne ka hona chaahiye. Iske liye jaroori hai ki saalaana sanchayi vruddhi 19 pratishat ho aur iske liye vinirmaan kshetr par vishesh dhyaan dene ki jaroorat hogi. Isse pehle, November mein niryaat mein 5.86 pratishat ki vruddhi hui thi. vittavarsh 2013-14 mein niryaat 312.35 arab dollar ka raha, jo lakshya se 13 arab dollar kam tha. Haalaanki, vyaapaar ghaata ghatkar teen saal ke nimn star 138.59 arab dollar par raha.

Niryaat Mein Paanch Maheene Ki Sarvaadhik Vruddhi http://www.angrejinews.com/pic/50155