Narendra Modi Ne Dikhaaya Kamal Ka Nishaan, Chunaav Aayog Ne Diya Kaarravaai Ka Aadesh, FIR Darj

India »

Narendra Modi Ne Dikhaaya Kamal Ka Nishaan, Chunaav Aayog Ne Diya Kaarravaai Ka Aadesh, FIR Darj

Matadaan ke baad apni tasveer kheenchate Narendra Modi Matadaan ke baad apni tasveer kheenchate Narendra Modi Ahmedabad: bhaajapa ke pradhaanamantri pad ke ummeedavaar Narendra Modi ko lekar us samay vivaad khada ho gaya, jab unhonne matadaan karne ke baad apni party ka chunaav chinh 'Kamal' dikhaaya aur samvaadadaataaon ko sambodhit kiya. Chunaav aayog ne Modi ke is kadam ko chunaav kaanoon ka ullanghan maanate hue unke khilaaf kaarravaai karne ka aadesh jaari kiya hai. Vaheen, Ahmedabad ki crime branch ne Narendra Modi ke khilaaf FIR darj ki hai. Is FIR mein Modi par voting ke baad press kaanfreeins karne ka aarop lagaaya gaya hai. Gujarat police pramukh ne bataaya ki Narendra Modi ke khilaaf do FIR darj ki gayi hain. chunaav aayog ne sakht kadam uthaate hue Gujarat prashaasan ko nirdesh diya ki vah chunaav kaanoonon ka ullanghan karne ke liye Narendra Modi ke khilaaf shikaayat ya praathamiki darj kare. Chunaav aayog ne apne aadesh mein kaha, aayog ki rai hai ki baithak karke aur use aaj us vakt sambodhit karke jab samooche Gujarat aur desh ke vibhinn hisson mein matadaan chal raha hai, Narendra Modi ne jan pratinidhitv adhiniyam ki dhaara 126 (1) (A) aur 126 (ek) (bi) ka ullanghan kiya hai. aayog ne apne aadesh mein kaha, isliye aayog nirdesh deta hai ki shikaayat, praathamiki jaisa bhi maamala ho Narendra Modi aur un anya logon ke khilaaf darj ki jaae, jo us baithak ko bulaane aur karne mein shaamil the. Aayog ne kaha hai ki Gujarat ke mukhya sachiv aur deejeepi shaam chhah baje tak anupaalan report bhejein. usane yeh bhi kaha ki saare TV channel aur anya electronic media, jisne baithak ki kaaryavaahi aur chunaav maamale ko dikhaaya, unke khilaaf bhi dhaara 126 (1) (bi) ke tahat alag se shikaayat, praathamiki darj ki jaani chaahiye. Jan pratinidhitv adhiniyam ki dhaara 126 (1) (A) aur (bi) ke tahat chunaav sampann karaane ke liye nirdhaarit avadhi ke samaapt hone se pehle ke 48 ghanton ke dauraan janasabha karne par paabandi hai. Congress ke pravakta shakeel Ahmad ne Modi ke baare mein kaha, vah baar-baar chunaav kaanoonon ka ullanghan kar rahe hain, menifesto ilekshan ke din jaari kiya, nomineshan ilekshan ke din kiya aur aaj voting ke din simbal dikhaaya. Chunaav aayog ko ise kathorata se lena chaahiye. Vaheen BJP pravakta meenaakshi lekhi ne kaha, ham chunaav aayog ka sammaan karte hain. . . Modi ji ne aadarsh aachaar sanhita ka ullanghan naheen kiya hai, jo bhi faisala hoga, ham usaka aadar karte hain. Modi ke is kadam ke virodh mein Congress ne nirvaachan aayog se shikaayat kar unke khilaaf praathamiki darj karne ki maang ki thi. Congress aur aam aadmi party ne aarop lagaaya ki Modi ne jo kiya vah aachaar sanhita ka ullanghan hai. Donon dalon ne Gujarat ke mukhyamantri ke khilaaf kaarravaai ki maang ki. shahar ke raneep ilaake mein Modi ne apne mataadhikaar ka upayog kiya. Iske baad unhonne samvaadadaataaon ke savaalon ke javaab diye, jiske dauraan unhein party ke chunaav chinh 'Kamal' ki pratikruti dikhaate dekha gaya. Isse pehle unhein us sthaan par party ke chunaav chinh ki pratikruti ke saath khud ki photo lete hue dekha gaya, jahaan matadaan ke baad vah samvaadadaataaon ko sambodhit kar rahe the. nirvaachan aayog ko bheji shikaayat mein akhil bhaarateeya Congress committee ke kaanooni vibhaag ke sachiv KC mittal ne kaha ki vibhinn channelon par dikhaae gaye samaachaar se yeh pata chala ki Modi Gandhi nagar mein matadaan kendra par vote daalne gaye aur matadaan karke baahar aane ke baad vah bhaajapa tatha khud apne liye prachaar kar rahe the aur bhaajapa ke liye prachaar karne ke andaaj mein bhaashan de rahe the. Vah logon ko party ka chunaav chinh dikha rahe the aur apna vote daalne ka sandesh dene ke liye syaahi ke nishaan waali anguli dikha rahe the. mittal ne kaha ki Modi ka bhaashan aur chunaav chinh ka pradarshan bhi janapratinidhitv kaanoon (aarapeee) ki dhaara 126 ka ullanghan hai aur isliye unke khilaaf praathamiki darj ki jaani chaahiye. Modi par chunaav aachaar sanhita ke ullanghan aur aarapeee ke tahat aparaadh kiye jaane ka aarop lagaate hue Congress ne unke khilaaf tatkaal kaarravaai ki maang ki. unhonne kaha, is tarah khullam khulla ullanghan karne ke kaaran vah ayogya bhi ghoshit kiye ja sakte hain. Modi Gandhinagar mein apna vote daalne ke baad shahar ke raneep ilaake mein samvaadadaataaon se baat kar rahe the. Gandhinagar Loksabha seat se bhaajapa ke varishth neta Lal Krishna Advani chunaav lad rahe hain. Modi ne badi sankhya mein logon se matadaan karne ka aagrah kiya. Unhonne daava kiya ki agali sarkaar bhaajapa aur uske gathabandhan sahayogiyon ki hogi. Aam aadmi party (aap) ki raajya ikaai ke sanyojak sukhadev Patel ne bataaya ki Modi ne jo kiya, uske khilaaf unki party shikaayat karegi. Patel ne kaha, Modi varishth raajaneta hain. Unhein apni seemaaen pata honi chaahiye. Lekin niyamon ko dhata bataana unke svabhaav mein hai aur yeh (unhonne jo kiya) isi baat ka ek udaaharan hai.

Narendra Modi Ne Dikhaaya Kamal Ka Nishaan, Chunaav Aayog Ne Diya Kaarravaai Ka Aadesh, FIR Darj http://www.angrejinews.com/pic/49139