Mohali Ekadivseeya Bhaarat Ne Match Ke Saath Shrunkhala Bhi Jeeti

Cricket »

Mohali Ekadivseeya  Bhaarat Ne Match Ke Saath Shrunkhala Bhi Jeeti

Mohali: Bhaarat ne apne ballebaajon ke dam par Budhvaar ko Punjab cricket sangh (PCA) stadium mein khele gaye chauthe ekadivseeya match mein England ko paanch wicket se paraajit kar diya. Is tarah Bhaarat ne na sirf yeh match jeeta balki shrunkhala bhi apne naam kar li. England ne pehle ballebaaji karte hue nirdhaarit 50 overon mein saat wicket par 257 run banaae the. Iske javaab mein ballebaaji karne utari bhaarateeya team ne 47.3 overon mein paanch wicket ke nuksaan par lakshya haasil kar liya. Bhaarat ki jeet mein suresh raina, rohit sharma aur Ravindra jadeja ne mahatvapoorn bhoomika nibhaai. Raina ne naabaad 89, rohit sharma ne 83, viraat Kohli ne 26, Ravindra jadeja ne 21 aur Mahendra Singh Dhoni ne 19 ranon ki paari kheli. Raina ko unki shaanadaar paari ke liye main of the match ghoshit kiya gaya. Lakshya ka peechha karne utari bhaarateeya team ko pehla jhatka 20 run ke kul yog par laga. Is score par Gautam gambheer 10 run banaakar pavilion laute. Gambheer ko tim bresnan ne out kiya. Gambheer ne 16 geindon par do chauke lagaae. Viraat Kohli 26 run banaakar tradewell ki geind par unheen ke haathon catch hue. Unhonne 33 geindon par teen chauke lagaae. Chandigarh ke hero Yuvraj Singh ne apne ghareloo maidaan par niraash kiya aur teen run banaakar 90 ke kul yog par pavilion laute. Iske baad rohit aur raina ne chauthe wicket ke liye 68 ranon ki saajhedaari ki. Sharma ke roop mein 32vein over mein Bhaarat ko chautha jhatka laga. Vah fin ki geind par pagbaadha karaar diye gaye. Ajinkya rahaane ke sthaan par paari ki shuruaat karne aae sharma ne 93 geindon ka saamana karte hue 11 chauke va ek chhakka lagaaya. Sharma ki jagah lene aae Dhoni ne raina ke saath milkar bhaarateeya paari ko aage badhaaya aur donon ne paanchavein wicket ke liye 55 ranon ki saajhedaari ki. Z darnabaak ne is jodi ko tod ek baar fir England kheme mein ummeed jagaai lekin dhauni ki jagah lene aae jadeja ne koi galati naheen ki aur raina ke saath milkar unhonne bhaarateeya team ko jeet dilaai. England ki or se James tradewell ne do safalta haasil ki jabki fin, darnabaak aur bresnan ko ek-ek safalta mili. Isse pehle, toss haarne ke baad ballebaaji karte hue England team ne nirdhaarit 50 overon ki samaapti tak saat wicket par 257 run banaae the. Ismein cook aur kevin Peterson ke 76-76 run tatha root joy ko naabaad 57 run shaamil rahe. Bhaarat ki or Ravindra jadeja ne sabse adhik teen wicket liye jabki Ishaant sharma aur Ravichandran Ashwin ko do-do safalta mili. England ki shuruaat achhi naheen rahi thi. Usane 37 run ke kul yog par hi apne salaami ballebaaj Ian bail (10) ka wicket ganva diya tha lekin iske baad kaptaan cook aur Peterson ne doosare wicket ke liye 95 run jodkar sthiti sambhaalane ka kaam kiya. Cook ka wicket 132 ranon ke kul yog par gira. Cook ko Ashwin ne out kiya. Bail ka wicket Ishaant ne liya tha. Cook ne apni 106 geindon ki paari mein 13 chauke lagaae. Iske baad 138 ranon ke kul yog par Ashwin ne eon morgan (3) ko out karke english team ko ek aur bada jhatka diya. Morgan ka catch Yuvraj Singh ne liya. Morgan ke out hone ke baad samit Patel wicket par aae lekin Ravindra jadeja ne unhein ek run ke niji yog par out karke english team ko chautha jhatka diya. Jadeja ne Patel ko apni hi geind par lapka. Patel ki jagah haalaanki wicket par root ne Peterson ko niraash naheen kiya, jo apne saamane lagaataar teen wicket girne ke baad team ko mushkil se ghirte dekh chintit najar aa rahe the. Peterson aur root ne paanchavein wicket ke liye 9.2 geindon par 78 ranon ki saajhedaari ki. Peterson ka wicket 220 ranon ke kul yog par gira. Peterson ko Ishaant ne out kiya. Unhonne 93 geindon ki paari mein saat chauke aur ek chhakka lagaaya. Iske baad root ne paari ko sambhaalane ka abhiyaan shuroo kiya. Jos butler (14) ke saath unhein safalta milti dikh rahi thi lekin jadeja ne 241 ranon ke kul yog par butler aur tim bresnan (0) ko out karke english team ke is abhiyaan par paani fer diya. Do lagaataar wicket girne se ghabaraae root ne aakraman ki kamaan apne haath mein li aur 45 geindon par aath chaukon aur ek chhakke ki madad se 57 run banaakar naabaad laute. James tradewell ne naabaad chhah run banaae. Paanch maichon ki shrunkhala mein Bhaarat ab 3-1 se aage ho gayi hai. Pehle kochchi aur fir Ranchi mein mili shaanadaar jeet ne bhaarateeya team mein nai jaan daal di hai.

Mohali Ekadivseeya Bhaarat Ne Match Ke Saath Shrunkhala Bhi Jeeti http://www.angrejinews.com/pic/394