Maruti Ka Chauthi Timaahi Ka Shuddh Laabh 35 Feesadi Ghatkar 800 Karod Rupaye Par

Breaking »

Maruti Ka Chauthi Timaahi Ka Shuddh Laabh 35 Feesadi Ghatkar 800 Karod Rupaye Par

Nai Delhi: desh ki sabse badi car company Maruti Suzuki India ka chauthi timaahi ka shuddh laabh ek saal pehle ki tulana mein 35.46 feesadi ghatkar 800.05 karod rupaye raha. company ne isse pichhle vitt varsh ki samaan timaahi mein 1,239.62 karod rupaye ka shuddh laabh kamaaya tha. Maruti Suzuki India ne bayaan mein kaha ki timaahi ke dauraan company ki bikri 9.48 pratishat ghatkar 11,818.13 karod rupaye rah gayi, jo isse pichhle vitt varsh ki samaan timaahi mein 13,056.26 karod rupaye rahi thi. chauthi timaahi mein company ki bikri 5.48 feesadi ghatkar 3,24,870 vaahan rah gayi, jo isse pichhle saal ki samaan avadhi mein 3,43,709 ikaai thi. Haalaanki, 31 March ko samaapt vitt varsh mein company ka ekeekrut shuddh laabh 15.53 pratishat badhkar 2,852.92 karod rupaye par pahunch gaya, jo isse pichhle saal ki samaan avadhi mein 2,469.28 karod rupaye tha. vitt varsh ke dauraan company ki bikri 43,271.78 karod rupaye par sthir rahi. Isse pichhle vitt varsh ki samaan timaahi mein company ki bikri 43,215.83 karod rupaye rahi thi. Vitt varsh ke dauraan company ki vaahan bikri 1.4 pratishat ghatkar 11,55,041 ikaai rah gayi, jo isse pichhle saal ki samaan avadhi mein 11,71,434 ikaai rahi thi. Company ke nideshak mandal ne 2013-14 ke liye 5 rupaye ke ankit moolya ke share par 12 rupaye prati share ya 240 feesad ke laabhaansh ki ghoshana ki hai.

Maruti Ka Chauthi Timaahi Ka Shuddh Laabh 35 Feesadi Ghatkar 800 Karod Rupaye Par http://www.angrejinews.com/pic/48578