Mallya Ne Kingfisher Ke Karmachaariyon Ko Patra Likhkar Bharosa Dilaaya

Business »

Mallya Ne Kingfisher Ke Karmachaariyon Ko Patra Likhkar Bharosa Dilaaya

Mumbai: Kingfisher airlines ke Chairman vijay Mallya ne apni chuppi todte hue karmachaariyon ko ek patra likhkar kaha hai ki company ko chalaane ke liye harsambhav prayaas kiye ja rahe hain. Maheenon se vetan na milne ke kaaran naaraaj Kingfisher karmiyon ne airline ko band karaane ke liye court ka darvaaja khatkhataane ki dhamaki di hai. Mallya ka ka patra usi sandarbh mein dekha ja raha hai. Saath hi Mallya ne karmachaariyon se media ke saath baatcheet mein satark rahane ko kaha hai. Unhonne media par company ke khilaaf anargal khabarein dene ka aarop lagaaya hai. Kingfisher airlines ke karmachaariyon ne chetaavani dete hue kaha tha ki agar prabandhan company ko patari par laane ki yojana ko unke saath saajha naheen karta hai to ve company kaanoon ke tahat vimaanan ikaai ko band karne ki yaachika adaalat mein daayar kareinge. Karmachaariyon ko pichhle aath maheene se vetan naheen mila hai. Mallya ne patra mein apne karmachaariyon se kaha hai, humne DGCA ko company fir se shuroo karne ke baare mein vistrut yojana di hai, jo do bhaagon mein hai. Pehle hisse mein seemit sankhya mein saat vimaanon ko parichaalan shuroo karne ki yojana ka jikr hai, jise chaar maheene mein badhaakar 21 tak kiya jaaega. Doosare bhaag mein vimaanan company ko poori tarah se parichaalan mein laane ki yojana hai. Iske tahat punarpoonjeekaran ke 12 maheene ke bheetar vimaanon ke parichaalan ki sankhya badhaakar 57 kiya jaaega. Patra mein haalaanki karmachaariyon ka bakaaya vetan dene ke baare mein koi jikr naheen hain. Lekin ismein kaha gaya hai ki donon yojanaaon mein vittaposhan samet karmachaariyon ka bakaaya vetan ke bhugataan samet vistrut jaankaari di gayi hai. Kingfisher apne karmachaariyon ko pichhle saal May se bhugataan naheen kiya hai.

Mallya Ne Kingfisher Ke Karmachaariyon Ko Patra Likhkar Bharosa Dilaaya http://www.angrejinews.com/pic/272