Mahakumbh 2013 Vasant Panchami Par Shaahi Snaan, 70 Lakh Ne Lagaai Dubaki

India »

Mahakumbh 2013  Vasant Panchami Par Shaahi Snaan, 70 Lakh Ne Lagaai Dubaki

Lucknow: Teertharaaj prayaag mein chal rahe duniya ke sabse bade samaagam 'Mahakumbh mele' mein shukravaar ko vasant panchami ke paavan avsar par shaahi snaan ke liye sangam tat par aastha ka sailaab umad pada. Saadhu-santon, naaga aur dharmaachaaryon sahit desh-videsh ke kareeb 70 lakh shraddhaaluon ne dubaki lagaai. Mela prashaasan ne haalaanki ek karod se jyaada shraddhaaluon ke snaan ki ummeed jataai thi. Tadke se hi ganga, yamuna aur adrushya sarasvati (triveni) ke sangam mein snaan ke liye banaae gaye 22 ghaaton par janasailaab umada. Kareeb 18 hajaar feet mein banaae gaye ghaaton par shraddhaalu 'Jaya ganga maiya' aur 'Har-har mahaadev' ke jayakaare ke saath dubaki lagaai aur pooja-archana ki. Bihar ke aara jile se I roopavati devi ne kaha ki pauraanik maanyata hai ki Mahakumbh ke dauraan vasant panchami par sangam snaan karne se sukh aur samruddhi ki praapti hoti hai aur moksh milta hai. Shraddhaalu snaan karne ke saath gangaajal ko prasaad ke roop mein apne saath le gaye. Shaahi snaan ka netrutv naaga saadhuon ne kiya. Sabse pehle mahaanirvaani akhaade ke saadhuon ne snaan kiya, uske baad atal, joona, agni sahit sabhi 13 akhaadon ke saadhuon aur naagaaon ne dubaki lagaai. Mela prashaasan ke nirdeshon ke mutaabik, sabse pehle saat sannyaasi, uske baad teen vairaagi aur fir teen udaaseen akhaade ke saadhuon ko snaan karna tha. Har akhaade ko snaan ke liye kareeb 40 minute ka samay diya gaya. Mauni amaavasya ke din Allahabad railway station par hue haadase aur guruvaar der raat sangam kshetr mein aag lagne se ek saadhu ki maut ke kaaran akhaadon ki peshavai mein saadagi barati gayi. Peshavai mein band jaane aur dhol-nagaadon se parahej kiya gaya. Aamtaur par dhol-manjeera bajaakar aur apne shastr laharaate hue naaga saadhu snaan ke liye akhaadon se nikalte hain. Uttar pradesh ke police mahaanireekshak (kaanoon evam vyavastha) beepi Singh ne samvaadadaataaon ko bataaya ki kareeb 70 lakh shraddhaaluon ne aaj teesare sabse bade shaahi snaan par pavitra snaan kiya. Saari vyavastha sudrudh rahi. Kaheen se kisi apriya ghatna ki khabar naheen I. Mela prashaasan ne dinbhar mein ek karod se adhik shraddhaaluon ke snaan karne ki ummeed jataai thi. Maana ja raha hai ki Allahabad railway station par mauni amaavasya ke shaahi snaan ke din machi bhagadad mein kai logon ki jaan jaane ka gam aur kharaab mausam ke kaaran shraddhaalu anumaan se kaheen kam aae. Aaj subah se baadal chhaae rahe din mein ruk-ruk baarish ho rahi thi. Shaahi snaan ke liye prashaasan ne suraksha ke kade intajaam kiye the. Uttar pradesh ke upper police mahaanideshak (kaanoon evam vyavastha) Arun Kumar ne kaha ki poore mele mein tainaat keindreeya arddhasainik bal, raajya police, praanteeya shastr bal, homeguard ke javaan chappe-chappe par najar banaae hue the. Saath hi jal police ke javaan bhi ghaaton par tainaat hain. CCTV kaimaron ke saath-saath helicopter se mele ke kone-kone ki nigraani ki ja rahi thi. Bheed ek jagah ekatr na ho, iske liye jila prashaasan ne 10 holding area banaae the. Railway prashaasan dvaara shraddhaaluon ki bheed ko vaapas ghar pahunchaane ke liye kareeb 100 vishesh trainon ka intajaam kiya gaya. Roadways ki or se bhi 2,000 se adhik atirikt basein chalaai gain. Mela kshetr mein laaudaspeekar se bason aur trainon ke samay ke baare mein lagaataar ghoshana ki ja rahi thi, taaki yaatriyon ko sahi jaankaari mil sake aur ve apne nirdhaarit samay se pehle bas ya railway station par na jaaen. Pichhle haadase se sabak lete hue railway, mela aur jila prashaasan ki taraf se banaai gayi aaj ki rananeeti se sab jagah bandobast vyavasthit najar aae. Makar sankraanti se shuroo hua Mahakumbh mela 10 March tak chalega. Allahabad mein Mahakumbh mela 12 saal baad laga hai. Isse pehle yahaan varsh 2000 mein Mahakumbh mela laga tha.

Mahakumbh 2013 Vasant Panchami Par Shaahi Snaan, 70 Lakh Ne Lagaai Dubaki http://www.angrejinews.com/pic/1965