Mahakumbh 2013 Teesare Shaahi Snaan Par Umada Janasailaab, Chaar Karod Ne Lagaai Dubaki

India »

Mahakumbh 2013  Teesare Shaahi Snaan Par Umada Janasailaab, Chaar Karod Ne Lagaai Dubaki

Allahabad: Teertharaaj prayaag mein chal rahe Mahakumbh mele mein ravivaar ko mauni amaavasya ke shaahi snaan par sangam tat par janasamudr dekha gaya. Maano duniya ke saare raaste Mahakumbh mele ki taraf ho gaye the. Naaga saadhuon ke netrutv mein shuroo hue is sabse bade shaahi snaan mein shirkat karne ke liye desh videsh ke shraddhaaluon ke saath Bollywood hastiyaan sangam pahunche. Mela prashaasan ke mutaabik chaar karod shraddhaaluon ne snaan kiya. Ganga, yamuna aur adrushya sarasvati nadiyon ke sangam par lage Mahakumbh mele ke teesare aur sabse bade shaahi snaan ke liye 22 ghaat banaae gaye the. 18 hajaar feet kshetr mein bane ghaaton par tadke se hi shraddhaaluon ke snaan ka silsila shuroo ho gaya. Chaaron taraf jaya maan gange, har-har gange ke udghosh gunjaayamaan ho rahe the. Mahakumbh mele ki shaan kahe jaane vaale naaga saadhuon ki tadke se jab peshavai nikli to sangam ka drushya dekhte hi ban raha tha. Dhol-manjeera bajaate aur apne shastron ko laharaate naaga saadhu snaan ke liye apne akhaadon ke saath nikal rahe the. Log naaga saadhuon ke mahila naaga saadhuon ko badi utsukata aur utsaah se dekh rahe the. Is vishesh snaan par sabhi terah akhaadon ke naagaaon ne dubaki lagaai. Jahaan sabse pehle mahaanivaarni akhaade ne snaan kiya to sabse baad mein nirmal akhaade ne dubaki lagaai. Naagaaon ke saath lagbhag sabhi dhamaarchaaryon aur chaaron peethon ke shankaraachaaryon ne bhi sangam mein snaan kiya. Mela prashaasan ke adhikaariyon ke mutaabik shaam 7 baje tak kareeb chaar karod shraddhaaluon ne dubaki lagaai. Melaadhikaari mani prasaad mishra ne samvaadadaataaon se kaha ki shraddhaaluon ke snaan ka silsila abhi bhi jaari hai, jo der raat tak chalega. Snaanaarthiyon ki sankhya chaar karod ko paar kar jaaegi. Mela prashaasan ne teen karod shraddhaaluon ke snaan ki ummeed jataai thi. Sangam snaan karne aae sangeetajnya pandit jasaraaj ne kaha ki mujhe apne jeevan mein itna aanand kabhi naheen aaya, jitna aaj mujhe triveni sangam mein snaan karke mahasoos ho raha hai. Adbhud anubhav hai. Chaaron taraf adbhud najaara hai. Aahvaan akhaade ki taraf se aamantrit mahaamandaleshvar ke roop mein peshavai mein hissa lekar snaan karne pahunche vishv hindu parishad ke kaaryakaari adhyaksh praveen togadiya ne kaha ki mainne Hindustan ke sau karod hinduon ke kalyaan ke liye ganga maan se praarthana ki hai. Mele mein british pradhaanamantri David Cameron ke sasur William estar bhi shirkat karne pahunche. Unhonne Mahakumbh ko adviteeya bataate hue kaha ki main ek jagah par itni bheed dekhkar hairaan hoon. Yeh ekdam alaukik hai. Bollywood abhinetri preeti jinta, abhineta Imran Hashmi, kuraishi aur film evam TV seeriyl nimaarta ekta Kapoor bhi Mahakumbh pahunchi. Ekta Kapoor ne sangam mein dubaki bhi lagaai. Mauni amaavasya ke shaahi snaan ke liye prashaasan ne suraksha ke kade intajaam kiye the. Uttar pradesh ke upper police mahaanideshak (kaanoon vyavastha) Arun Kumar swayam mele mein dera daalkar suraksha intajaamon ki nigraani kar rahe the. Unhonne bataaya ki mele mein suraksha ke abhootapoorv intajaam kiye gaye the. Raajya police, homeguard aur ardhasainik balon ke kareeb 40 hajaar javaan mele ke kone-kone mein tainaat the. Saath hi jal police ke javaan bhi ghaaton par the. CCTV kaimaron se mele ke kone-kone ki nigraani ki ja rahi thi. Tamaam intajaamon ke beech mukti maarg par palatoon pul ki reling tootane se ek mahila ki maut ho gayi. Allahabad ke mandalaayukt devesh chatuverdi ne bataaya ki bheed ke dabaav ke chalte ghatna hui. Unhonne bataaya ki ek vyakti ki maut ki baat saamane I hai. Ek ghaayal ka aspataal mein ilaaj chal raha hai. Makar sankraanti se shuroo hua Mahakumbh mela aagaami 10 March tak chalega. Allahabad mein Mahakumbh mela 12 saal baad laga hai. Isse pehle yahaan varsh 2000 mein Mahakumbh mela laga tha.

Mahakumbh 2013 Teesare Shaahi Snaan Par Umada Janasailaab, Chaar Karod Ne Lagaai Dubaki http://www.angrejinews.com/pic/1559