Lokpal Ke Liye Aavedan Dene Vaalon Ka Byora Dene Se Sarkaar Ka Inkaar

Breaking »

Lokpal Ke Liye Aavedan Dene Vaalon Ka Byora Dene Se Sarkaar Ka Inkaar

Nai Delhi: bhrashtaachaar nirodhak nikaaya Lokpal ke adhyaksh aur sadasya padon ke liye aavedan karne vaalon ka byora dene se kendra ne inkaar kar diya aur ise 'Niji' prakruti ka bataate hue kaha hai ki iska khulaasa naheen kiya ja sakta. soochana ka adhikaar kaanoon ke tahat poochhe gaye ek savaal ke javaab mein kaarmik evam prashikshan mantraalaya ne Lokpal sarch committee ke sadasya banane ki sarkaar ki peshakash sveekaar karne ya khaarij karne tatha is baare mein hue samvaad ki pratiyaan bhi muhaiya karaane se inkaar karte hue kaha ki file aasaani se upalabdh naheen hai. mantraalaya ne kaha ki Lokpal ke adhyaksh aur sadasyon ke pad par niyukti ke liye chayan prakriya Lokpal evam lokaayukt kaanoon ke anusaar, sambaddh praadhikaariyon ke vichaaraadheen hai. savaal ke javaab mein mantraalaya ne kaha, maangi gayi soochana ko RTI kaanoon 2005 ki dhaara 8 (1) (J) ke tahat chhoot praapt hai, isliye patra mein jin vyaktiyon ka sandarbh diya gaya hai, unke naamon ka khulaasa naheen kiya ja sakta. yeh dhaara aisi soochana ke prakaashan se chhoot pradaan karti hai jo niji soochana se sambandhit hai aur jiske khulaase ka kisi saarvajanik gatividhi ya hit se koi sambandh naheen hai ya jo kisi vyakti ki nijta ka avaanchhit ullanghan karti hai.

Lokpal Ke Liye Aavedan Dene Vaalon Ka Byora Dene Se Sarkaar Ka Inkaar http://www.angrejinews.com/pic/48757