Kya Ho Kishor Ki Umr, Gruh Mantraalaya Ne Shuroo Ki Charcha

Breaking »

Kya Ho Kishor Ki Umr, Gruh Mantraalaya Ne Shuroo Ki Charcha

Nai Delhi: Delhi saamoohik balaatkaar kaand mein kishor dvaara sabse adhik barbarata karne ke pariprekshya mein kishoron ki sanjnyaa mein aane vaalon ki aayu 18 se ghataakar 16 saal karne ki maang ke beech gruh mantraalaya ne is mudde par sambaddh pakshon se charcha shuroo kar di hai. Kishor nyaaya kaanoon ke sabhi praavadhaanon par vichaar kiya ja raha hai. Gruh mantraalaya ne kaanoon mantraalaya, mahila evam baal vikaas mantraalaya aur raashtreeya baal adhikaar sanrakshan aayog se pichhle kuchh dinon mein salaah mashavira kar kishoron ki aayuseema kam karne ko lekar unke sujhaav maange. . Kendreeya gruh mantraalaya ke ek adhikaari ne bataaya ki abhi praarambhik charcha chal rahi hai. Is samvedansheel mudde par koi bhi antim najariya taiyaar karne se pehle aane vaale hafton mein aur vichaar-vimarsh kiya jaaega. Delhi mein 16 December ko chalti bas mein chhaatra ke saath balaatkaar ki ghatna mein shaamil chhah aaropiyon mein se ek kishor hai aur ummeed hai ki vah kade dand se bach jaaega kyonki us par kishor nyaaya kaanoon ke tahat mukadama chalega. Ullekhaneeya hai ki kai baal adhikaar samooh aur gair sarkaari sangathan kishoron ki aayu kam karne ke khilaaf hain. Adhikaari ne kaha ki kishoron ki aayu kam karne ke faisale ke choonki dooragaami parinaam honge isliye poori satarkata se is mudde par vichaar kiya ja raha hai.

Kya Ho Kishor Ki Umr, Gruh Mantraalaya Ne Shuroo Ki Charcha http://www.angrejinews.com/pic/1245