Juvenile Act Ki Vaidhata Par Vichaar Karega Supreme Court

Breaking »

Juvenile Act Ki Vaidhata Par Vichaar Karega Supreme Court

Nai Delhi: Uchchatam nyaayaalaya (Supreme court) ne kishor nyaaya kaanoon mein kishor ko paribhaashit karne vaale us praavadhaan ki samvaidhaanikta par vichaar karne ka somvaar ko nishchaya kiya jismein 18 varsh ki aayu tak vyakti ko naabaalig maana gaya hai. Nyaayamoorti KS Radhakrishnan aur nyaayamoorti deepak mishra ki khandapeeth ne kishor nyaaya (bachche ki dekhbhaal aur sanrakshan) kaanoon mein kishor ki paribhaasha nirast karne ke liye vakeel kamal Kumar Pande aur sukumaar ki janahit yaachika par vichaar karne ka nishchaya kiya. Nyaayaadheeshon ne iske saath hi attorney general gulaam vaahanavati se is maamale mein nyaayaalaya ki madad karne ka anurodh kiya hai. Donon vakeelon ne is yaachika mein tark diya hai is kaanoon ki dhaara 2(ke), 10 aur dhaara 17 tarkaheen aur samvidhaan ke praavadhaanon ke khilaaf hai. Yaachikaakartaaon ke vakeel ne kaha ki is kaanoon mein pradatt kishor ki paribhaasha kaanoon ke pratikool hai. Vakeel ne kaha ki bhaarateeya dand sanhita ki dhaara 82 aur 83 mein kishor ki paribhaasha mein adhik behtar vargeekaran hai. Dhaara 82 ke anusaar saat saal se kam aayu ke kisi baalak dvaara kiya gaya krutya aparaadh naheen hai jabki dhaara 83 ke anusaar saat saal se adhik aur 12 saal se kam aayu ke aise bachche dvaara kiya gaya koi bhi krutya aparaadh naheen hai jo kisi krutya ko samajhne ya apne aacharan ke svaroop tatha parinaam samajhne ke liye paripakva naheen huaa hai. Delhi mein pichhle saal 16 December ko 23 saal ki ladki se saamoohik balaatkaar ki ghatna mein shaamil chhah aaropiyon mein se ek ke naabaalig hone ki baat saamane aane ke baad se kishor nyaaya kaanoon ke tahat kishor ki aayu ka maamala charcha mein hai. Is ghrunit vaaradaat ki shikaar ladki ki baad mein Singapore ke aspataal mein mrutyu ho gayi thi. Nyaayaadheeshon ne janahit yaachika par 3 April ko sunavaai karne ka nishchaya karte hue attorney general ko halafnaama aur is mudde se judi report daakhil karne ka nirdesh diya hai. Nyaayaadheeshon ne kaha, ''Ham is masale par vichaar kareinge. Yah masala aayu nirdhaaran se sambandhit hai aur yah kaanoon se juda savaal hai. '' Attorney general ne kaha ki nyaayamoorti JS varma samiti ki report mein sabhi muddon par vichaar kiya hai aur kendra is maamale me nyaayaalaya ki madad karega. Gulaam vaahanavati ne kaha ki raajya sarkaaron se bhi is maamale mein sahayog ka aagrah kiya ja sakta hai. Kai gairsarkaari sangathan bhi is maamale mein sakriya hain. Lekin, nyaayaadheeshon ne kaha, ''Raajyon ki ismein koi bhoomika naheen hain aur ham gairsarkaari sangathanon ki baat par kaan naheen deinge. ''

Juvenile Act Ki Vaidhata Par Vichaar Karega Supreme Court http://www.angrejinews.com/pic/1053