Gujarat Muslim Bahul Nikaaya Ki Sabhi 27 Seaton Par Jeeti BJP

India »

Gujarat  Muslim Bahul Nikaaya Ki Sabhi 27 Seaton Par Jeeti BJP

Ahmedabad: Varsh 2014 mein hone vaale Loksabha chunaav ke liye pradhaanamantri pad ke prabal daavedaar bataae ja rahe Gujarat ke mukhyamantri Narendra Modi ka jaadoo ek baar fir chal gaya hai, aur vah bhi is tarah ki vipaksh poori tarah saaf ho gaya. Daraasal, Gujarat ke sthaaneeya nikaaya chunaavon ke dauraan Saurashtra ke jaamanagar mein salaaya myoonisipailiti ki sabhi 27 seaton par BJP ke ummeedavaar jeete hain, aur yeh jeet isliye behad mahatvapoorn hai, kyonki salaaya ki 90 feesadi aabaadi muslim hai. Iske itar bhi raajya ke kul 75 mein se 47 nikaayon par BJP ne kabja kar liya hai, jabki Congress ko sirf 19 nikaayon mein jeet mili. Chunaav ke nateeje mangalvaar ko ghoshit kiye gaye. Salaaya myoonisipailiti ki chaar seaton par BJP pratyaashi nirvirodh jeet gaye the, lekin shesh 23 seaton par ravivaar ko matadaan hua tha. Ullekhaneeya hai ki bhaajapa ne anusoochit jaati ke ummeedavaaron ke liye aarakshit teen seaton ko chhodkar sabhi 24 seaton par muslim ummeedavaar khade kiye the, aur sabhi jeete hain. Gaurtalab hai ki aajaadi ke baad se ab tak is myooniseepailiti par lagaataar Congress party ka hi kabja raha hai, lekin is baar Congress ka na sirf soopada poori tarah saaf ho gaya hai, balki uske teen pratyaashiyon ki to jamaanat tak jabt ho gayi hai. Is chunaav mein jeet ke baad BJP ne fir kaha hai ki yeh jeet mukhyamantri Narendra Modi ki vikaas ki neeti ko aam logon ka samarthan hai. Bhaajapa pravakta jagadeesh bhavasaar ne kaha ki salaaya ke logon ne sushaasan ke liye vote kiya hai. Is ilaake mein Modi ki neetiyon ke chalte tamaam companiyon ne nivesh kiya hai.

Gujarat Muslim Bahul Nikaaya Ki Sabhi 27 Seaton Par Jeeti BJP http://www.angrejinews.com/pic/1825