Chunaav Daayari Modi Par FIR Ke Maayane

Breaking »

Chunaav Daayari  Modi Par FIR Ke Maayane

Ahmedabad: NDA ke pradhaanamantri pad ke ummeedavaar Narendra Modi ke khilaaf chunaav aayog ke aadesh ke baad Gujarat sarkaar ne do FIR darj kar li hain. Chunaav aayog ne kaha hai ki Modi ne janapratinidhitv kaanoon ki do dhaaraaon 126 (1)(a) aur 126 (1) (b) ke ullanghan kiya hai. Isse pehle Congress ne chunaav aayog ko shikaayat ki thi ki Narendra Modi ne Gandhinagar mein apna vote daalne ke baad jis tarah se press conference ki hai, vah aadarsh aachaar sanhita ka ullanghan hai. Lihaaja unke khilaaf FIR darj ki jaae. Chunaav aayog ne is shikaayat par turant kaarravaai ki. Saath hi Gujarat sarkaar ko yeh nirdesh bhi diya tha ki vah shaam 6 baje tak soochit kare ki kya kaarravaai ki gayi hai. Chunaav aayog ne Modi ki press conference ko dikhaane vaale TV channelon ke khilaaf bhi FIR darj karne ko kaha. Narendra Modi ne is par teekhi pratikriya di hai. Unhonne kaha hai ki jeevan mein pehli baar unke khilaaf koi FIR hui hai aur vah is din ko kabhi naheen bhooleinge. Modi ne kaha ki agar koi chaakoo, pistaul ya bandook se dhamakaae to uske khilaaf FIR samajh mein aati hai, lekin unke khilaaf FIR isliye darj hui, kyonki unhonne logon ko kamal ka fool dikhaaya. Iske liye unhonne Congress par hamla kiya hai. Modi ne tirupati mein ek chunaavi rally mein kaha ki Congress chai bechne vaale dar gayi hai. Modi ne ek baar bhi chunaav aayog ka naam naheen liya aur FIR ke liye seedhe Congress ko hi jimmedaar thaharaaya hai. BJP ne Congress dvaara kiye gaye samvaidhaanik sansthaaon ke kathit apamaan ko is chunaav mein ek bada mudda banaaya hai. UPA sarkaar ke khilaaf apni chargesheet mein bhi BJP ne Congress par CVC, seeeji aur chunaav aayog jaisi sansthaaon ke saath chhedchhaad karne ka aarop lagaaya hai. Yahi vajah hai ki Modi apne khilaaf FIR ko lekar chunaav aayog ke saamane khade hote naheen dikhna chaahate hain. Haalaanki Gujarat mein apne shuruaati daur mein vah chunaav aayog se do-do haath kar chuke hain. Raajya mein 2002 mein chunaavon mein deri ke liye unhonne tatkaaleen mukhya chunaav aayukt jeem lingadoh par nishaane saadhe the. lekin BJP neta chunaav aayog ki kaarravaai aur usaki raftaar par jaroor savaal utha rahe hain. Haalaanki vah khulkar is baare mein zyaada kuchh kehne ko taiyaar naheen hai. Party netaaon ke mutaabik, Narendra Modi ne aadarsh aachaar sanhita ka koi ullanghan naheen kiya hai. BJP ka daava hai ki Modi ne patrakaaron se baatcheet poling booth se do sau meter door ki thi. Jahaan tak press conference ka savaal hai, yeh ek aam baat hai ki vote daalne ke baad tamaam neta patrakaaron se baatcheet karte hain. Suraksha ke lihaaj se Modi ke liye alag se intajaam kiya gaya tha, jise press kaunfeins ka naam dena theek naheen hoga. Modi ne raajaneetik masalon par apni baat tabhi kahi jab unase is baare mein patrakaaron ne savaal poochhe. BJP neta yeh bhi kehte hain ki chunaav chinh kamal ko kurte par lagaana aachaar sanhita ka ullanghan naheen hai. Unki daleel hai ki jab tak chunaav chinh ke saath us par vote dene ki appeal na ki jaae, yeh sanhita ka ullanghan naheen maana ja sakta hai. Poling booth par raajaneetik dalon ke agent chunaav chinh laga kar baith sakte hain. Aam aadmi party ke kaaryakarta aur neta jhaadoo ke chunaav chinh waali topiyaan lagaakar vote dene jaate hain, jabki soniya Gandhi aur Manmohan Singh vote daalne ke baad haath hilaate hain, jo unki party ka chunaav chinh hai. BJP janapratinidhitv kaanoon ki un dhaaraaon mein ullekhit 'Chunaav saamagri' shabd ki vyaakhya par bhi savaal utha rahi hai. Party ka kehna hai ki uske ghoshanaapatr jaari karne ke vakt bhi isi shabd ke tahat savaal uthaae gaye the aur media ko teleekaast karne se rokane ki baat kahi gayi thi, jabki koi bhi raajaneetik dal kisi bhi vakt apna ghoshanaapatr jaari kar sakta hai. haalaanki kaanoon ke jaankaar BJP ke aitaraaj ko khaarij kar rahe hain. Unke mutaabik, chunaav aayog ne 9 April ko ek aadesh mein kaha tha ki kisi raajaneetik dal ke chunaav chinh waali topi, shaal ya kapadon mein koi poling booth par naheen ja sakta. Modi ne vote daalne ke baad raajaneetik bayaan diye jinhein TV par dikhaaya aur isse matadaata prabhaavit ho sakte hain. Modi apne haath mein poore vakt BJP ka chunaav chinh kamal liye hue the aur laharaate rahe, jo ek tarah se party ka prachaar karna hi kaha jaaega. vaise to janapratinidhitv kaanoon ki in dhaaraaon ke ullanghan par do saal ki saja tak ka praavadhaan hai. Par aise maamale durlabh hain, jinmein yeh saja hui ho. Isliye yeh dekhna dilchasp hoga ki is maamale mein aage ja kar Modi ke khilaaf kya kaarravaai hoti hai. Yeh zaroor hai ki is vivaad se Modi ko ek tarah se faayda hi hua hai, kyonki kal matadaan ke din vah TV par chhaae rahe aur vah bhi apna chunaav chinh kamal laharaate hue.

Chunaav Daayari Modi Par FIR Ke Maayane http://www.angrejinews.com/pic/49196