Chunaav Daayari Dhruveekaran Ke Dhurandhar

Breaking »

Chunaav Daayari  Dhruveekaran Ke Dhurandhar

Nai Delhi: musalmaan ek taraf jaaega to uske khilaaf hindu doosari taraf jaaega. Isse milta-julata vishleshan aap TV par khoob sunate honge. Matadaan ki aati tasveeron ke saath TV studio mein baithe jaankaar kis aadhaar par yeh baat kah rahe hote hain, samajhna mushkil hai. Hamaari raajaneeti mein dhaarmik aadhaar par dhruveekaran ek tathya hai, magar yeh mithk bhi hai. Dhruveekaran satahi aur saamaanya vyaakhya ka aisa aujaar ho gaya hai, jiske sahaare jaankaar ek matadaata ko saampradaayik rang se peint kar dete hain. Isi ke saath ek aur mithk ki rachana karne lagte hain - 'Taiktikl voting' ka mithk. ek side musalmaan to doosari side hindu. Aisa lagta hai ki studio mein baithe jaankaar ek khaas samudaaya ki taraf ishaara kar rahe hain ki musalmaan ekajut ho rahe hain. Bhaajapa ke khilaaf ekajut ho rahe hain, lihaaja svaabhaavik roop se hinduon ko bhi bhaajapa ke paksh mein ekajut ho jaana chaahiye. Akhbaaron mein bhi aisi baatein khoob likhi ja rahi hain. Kai baar lagta hai ki ek rananeeti ke tahat aisa kiya ja raha hai. Matadaan prakriya ka ek adana-sa eksapart bhi jaan sakta hai ki kuchhek apavaadon ko chhod saamaanya roop se yeh baat sahi naheen hai. Kai baar lagta hai ki chunaav ke samay aise vishleshanon ke sahaare samaaj mein saampradaayikta ko bhadkaane ka kaam kiya jaata hai. kya hindu hamesha yeh dekhkar vote deta hai ki musalmaan kis taraf vote de raha hai ya musalmaan yeh dekhkar vote deta hai ki hindu kis taraf deta hai. Iska vaigyaanik aadhaar kya hai. Har chunaav mein muslim matadaata ko brand karne ka khel khela jaata hai. Jaise usaki apni koi aakaanksha naheen hai aur vah sirf musalmaan bankar vote karta hai. Agar aisa hota to yeh baat sahi hoti ki ek aam muslim matadaata imaam bukhaari jaise dharmaguruon ke kehne par hi vote kar deta. Kisi bhi chunaav ka aankada dekheinge to yeh galat saabit hota hai. Aam muslim matadaata bade aaraam se matadaan ke faisale mein mulla-maulaviyon ki dakhalaandaaji ko pasand naheen karta. Khulkar bolata bhi hai, lekin media aise dharmaguruon ke bahaane muslim matadaataaon ka sanpradaayeekaran karta rahata hai. isi sandarbh mein ek aur baat kehna chaahata hoon. Baba raamadev jaise kai yogaguru aur dharmaguru bhi to kisi party ke liye vote maangate hain. Imaam bukhaari ka appeal karna saampradaayik aur Baba raamadev ya shankaraachaarya ka appeal karna raashtrabhakti. Kaise? Main donon ki tulana naheen kar raha, lekin mool baat yeh hai ki sabhi prakaar ke majhabi neta chunaav ke vakt sakriya hote hain. Koi aasheervaad ke naam par inke paas jaata hai to koi apne bhaashanon mein devi-devataaon ke prateekon ka istamaal karke dharm ka istamaal karta hai. Khud ko ishvar ka doot bataana kya hai. aam matadaata ko isse sachet hone ki zaroorat hai. Yeh bhi dhyaan mein rakhane ki baat hai ki hamaare tamaam dharmon ke guruon ka samaaj se gahra naata hota hai. Jhat se unke kisi raajaneetik aacharan ko saampradaayik kraar dene se pehle dekhna chaahiye ki ve kyon aisa kar rahe hain. Unka aadhaar saampradaayik hai, dhaarmik hai ya raajaneetik. Agar virodh karna hai to ek saath deron, mathon, masjidon ki raajaneetik dakhalaandaaji ka virodh keejiye. main fir se lautata hoon, apni mool baat par. Tamaam adhyayan bataate hain ki muslim matadaata apni pasand ke hisaab se alag-alag raajyon mein alag-alag party aur neta ko vote karta hai. Musalmaan ek naheen, kai dalon ko vote karne ke saath-saath BJP ko bhi vote karta hai. Madhya pradesh, Rajasthan aur Gujarat mein bhi karta hai. Ho sakta hai ki pratishat ke lihaaj se kam ho, lekin aap yeh bhi to dekhiye ki BJP ne in raajyon mein Loksabha ke chunaavi maidaan mein kitne muslim ummeedavaar utaare hain. Uttar pradesh mein kitne utaare hain. Pichhle Loksabha chunaav mein BJP ko 25-26 pratishat mat mile the, shesh aur 75 feesadi mat anya dalon ko. Agar hindu vote jaisa kuchh hota to BJP ko 75 feesadi vote milte. Hamaare ye jaankaar hindu matadaataaon ke vivek ke saath bhi anyaaya karte hain. Matadaataaon ka ati hindookaran kar saampradaayik rang dete hain. chaliye, is baat ko ek aur tareeke se dekhte hain. Har samudaaya ya jaati ke log apne ummeedavaaron ko vote dete hain. Isi aadhaar par Congress, BJP sab apne ummeedavaar tay karte hain. Tab bhi BJP ko haraane ke liye musalmaan kisi musalmaan ummeedavaar ko vote naheen karta hai. Vah usi dal ya ummeedavaar ko vote karega, jiske paas paryaapt vote hon. Yeh vote kahaan se aata hai. Kathit roop se hindu samaaj se hi na, to yeh baat kaise uchit thaharaai ja sakti hai ki hindu ek taraf jaate hain aur muslim doosari taraf. Kaayade se to ek-doosare ki party ko haraane ke liye donon mil-julakar ek-doosare ke khilaaf golaband hote hain. Iske baad bhi saare musalmaan kisi ek vyakti ya dal ko vote naheen kareinge. musalmaanon ko kathit roop se BJP ke khilaaf pesh kiye jaane ke baad bhi jaankaar jaante hain ki ve kaheen bhi ekamusht voting naheen karte. Yeh sambhav bhi naheen hai. Aisa hone laga to samajhiye ki muslim samaaj ke bheetar aapasi takaraav hi samaapt ho jaaen. Aap bhi jaante hain ki musalmaanon ke beech agade-pichhde aur dalit musalmaanon ke hak ko lekar zabardast takaraav hai. Pichhle dinon kai raajyon - jaise uttar pradesh, Kerala aur asam, mein muslim dalon ka udaya hua hai, aur kya ye sabhi BJP ke khilaaf ubhare hain? Naheen. Inse chunauti Congress, sapa, basapa, left ko bhi milti hai. iseeliye jaankaaron ko dhruveekaran ki behad satahi aur khatarnaak vyaakhya se bachana chaahiye. Banaaras mein Narendra Modi jab apne naamaankan ke liye ja rahe the to us bheed mein bhi camere musalmaan dhoondh rahe the. Unka kloj ap dikha rahe the. Mujhe is baat se aapatti hai. Kya camere us bheed mein shaamil anya logon ko bhi usi nigaah se dekh rahe the. Agar naheen to fir ek ya do musalmaan ki talaash kyon ho rahi thi. Tab bhi, jab Narendra Modi ke saath mukhtaar Abbas nakavi nazar aa rahe the. BJP bhale hindutv ya sangh ke kehne par chale, par use milne vaala har vote iske liye naheen milta. BJP ke kaaryakarta chaahein jitna hindutv ke rang-roop mein dhalakar aakraamak ho jaaen, unki party ko milne vaala har vote hindu vote naheen hai. Jyaadaatar dalit matadaataaon ko khud ko is pehchaan se jodkar dekhe jaane se aapatti ho sakti hai, jabki ho sakta hai ki ve vote BJP ko dein. hamein janamat ka sanpradaayeekaran naheen karna chaahiye. Saanpradaayikta aur dhruveekaran hamaari raajaneeti ki khtaranaak sachchaai hai, lekin aisa har jagah kisi ek faarmoole ke tahat naheen hota ki musalmaan idhar gaye to hindu udhar chale jaaenge. Kai baar lagta hai ki jaankaar muslim matadaataaon ka majhabi charitra chitran karte hue gair-muslim matadaataaon ko ishaara kar rahe hote hain ki unhein vote kahaan dena chaahiye.

Chunaav Daayari Dhruveekaran Ke Dhurandhar http://www.angrejinews.com/pic/48575