Chunaav Daayari Daada, Deedi Ya Modi

Breaking »

Chunaav Daayari  Daada, Deedi Ya Modi

Akhilesh sharma, pashchim Bengal se lautakar: bhari dopahar, sir par chadhe sooraj ka kahar. Koi chhaata liye, to koi sir par kapda daale hue. Umas bhari garmi se nijaat paane ke liye har koi apne hisaab se taiyaari kar aaya hai. Bairakapur mein BJP adhyaksh Rajnath Singh ki sabha mein jute logon mein sirf Modi ke naam par utsaah hai. BJP ka jhanda faharaata dikh raha hai. Deevaaron par hindi mein lage chunaavi ishtahaar ishaara kar rahe hain ki is ilaake mein hindi-urdoo bhaashiyon ka jor hai. Kareeb 40 feesadi matadaata muslim hain. Badi sankhya mein Bihar-Jharkhand se aae log bhi base hain. logon mein BJP ke prati ek utsukata hai. Modi ke naam ka aakarshan unhein is chilchilaati dhoop mein bhi Rajnath Singh ki sabhaaon mein kheench raha hai. Lekin kya BJP ko seatein mileingi? Is savaal par kareeb-kareeb sabhi ka ek jaisa hi javaab hai- ikka-dukka seatein jeetne ki sthiti mein hi hai BJP. Haalaanki khud BJP netaaon ka daava hai ki daarjeeling ke alaava BJP is baar star ummeedavaaron ke boote kuchh anya chunaav kshetron mein bhi baaji maar sakti hai. Khaastaur se baabul supriyo, bappi laahiri aur George bekar par party ki ummeedein tiki hain. BJP ko lagta hai Modi ka naam aur in sitaaron ki chamak shaayad use faayda pahunchaaega. lekin Bengal mein mamata ka jaadoo chal raha hai. Parivartan ke naam par left paartiyon ko daravaaja dikhaakar sarkaar banaane waali mamata ke teen saal ke kaam kaaj par chaahe alag-alag baatein ho rahi hon. Par abhi yeh saboot naheen milte ki mamata se logon ka moh bhang hona shuroo hua ho. Mamata Bengal ke vikaas ke naam par chunaav lad rahi hain. Modi ko 'Gujarat ka kasaai' bolakar unki party ne khud ko BJP ke saamane khada kar liya hai. Baanglaadeshi ghuspaithiyon ko khadedne ke Narendra Modi ke bayaan ko mamata Bannerjee ki party ne uchhaal diya hai. Rajnath Singh apne bhaashanon mein Modi ke bayaan par safaai dete hain. Kehte hain unka matlab avaidh roop se ghus aae baanglaadeshiyon ke baare mein tha. BJP aur Trinamool ke beech hui bayaanon ki garmi par bhi Rajnath paani daalne ki koshish karte hain. Unka kehna hai ki agar Delhi mein Modi sarkaar I, to pashchim Bengal ko vishesh package dene ke liye kaam shuroo kiya jaaega. Yeh mamata Bannerjee ki mahatvapoorn maang hai. Lekin raajya ke vikaas ke liye kadam na uthaane ke liye Rajnath mamata par bhi nishaana saadhate hain. mamata ko lekar BJP ki ek duvidha bhi hai. Isse pehle mamata Bannerjee atal bihaari Vajpayee ki sarkaar mein mantri bhi rah chuki hain. Us sarkaar ke apna kaaryakaal poora karne mein mamata ki badi bhoomika bhi rahi thi. 16 May ke nateejon mein agar NDA bahumat se door rahata hai, to use jayalalita, mamata aur naveen patanaayak se samarthan ki zaroorat pad sakti hai. 2016 mein pashchim Bengal mein vidhaanasabha ke chunaav hone hain aur aise mein yeh sambhaavana kam hi hai ki mamata khulkar Modi ke saath aaen. Lekin vishesh package ke naam par unase sharton ke aadhaar par samarthan lene ka vikalp khula rakha ja sakta hai. vaise to Bengal mein chaar paartiyon mein mukaabala hai. Trinamool aur left paramparaagat virodhi hain. Congress aur BJP bhi apni or se dam maarate rahe hain. Lekin Modi ke abhiyaan aur BJP par Trinamool ke lagaataar hamlon se aisa aabhaas diya ja raha hai ki jaise mukaabala BJP aur Trinamool ke beech hi ho raha hai. Jabki hakeekat mein aisa naheen hai. Yeh zaroor hai ki 2011 ki haar se left frant abhi tak ubar naheen paaya hai. Na hi logon mein is Loksabha chunaav mein use vote dene ke liye koi utkantha hai. lekin is chunaav ko Trinamool banaam BJP ka mukaabala banaana donon hi paartiyon ke liye anukool hai. BJP ko lagta hai ki pichhle teen saal mein mamata ke khilaaf jo log hue hain, ve bajaae left ke use vote de sakte hain. Iseeliye Narendra Modi ke bhaashanon mein bhi left ke bajaae mamata par hi teekha nishaana hai. ek BJP neta to badh-chadh kar yahaan tak kehte hain ki Bengal mein jo sthiti left ki thi, vah aaj mamata ki hai. Aur jo mamata ki thi, vah BJP ki hai. Jabki Modi aur BJP par hamla karne se mamata ko apne muslim matadaataaon ko saath lene mein madad milti hai. Left ke saath-saath vah Congress aur BJP par bhi hamla kar ye sandesh deti hain ki vah use jyaada gambheerta se naheen le raheen. Left paartiyon ke neta ise BJP aur Trinamool ke beech noora-kushti bataate hain. vaise is baat par kai log sahamat hain ki BJP is chunaav mein pashchim Bengal mein zyaada seatein chaahe na jeet paae, lekin uske vote pratishat mein Modi ke naam par jbardast ijaafa hoga. Ram janmabhoomi aandolan ke vakt BJP ko raajya mein 12 feesadi vote mile the. Is baar yeh aankada nishchit roop se paar hoga. raajya mein BJP ka sangathan kamzor hai. Yahaan ke maaravaadi-gujaraati tabake mein party ko samarthan hai. Is baar anya raajyon se aae logon mein bhi Modi ka jaadoo chalta dikh raha hai. BJP neta Bengal ke logon ko yaad dilaate hain ki janasangh ki sthaapana Bengal ke hi shyaama prasaad mukharji ne ki thi. Iske baavajood Bengal mein daada aur deedi ka vikalp banane ke liye Modi ko lamba safar tay karna hai.

Chunaav Daayari Daada, Deedi Ya Modi http://www.angrejinews.com/pic/49434