Chunaav Daayari Congress Ko Mila Priyanka Ka Sahaara

Breaking »

Chunaav Daayari  Congress Ko Mila Priyanka Ka Sahaara

Nai Delhi: pichhle ek hafte se Priyanka vaadra ne Loksabha chunaav mein Congress ke prachaar ka jimma sanbhaal liya hai. Media ki surkhiyon mein soniya Gandhi-Rahul Gandhi peechhe chale gaye hain, jabki Priyanka Narendra Modi se do-do haath karti dikh rahi hain. Unhonne abhi khud ko apne bhaai aur maan ke chunaav kshetr amethi-raayabareli mein hi seemit rakha hua hai. Modi par Priyanka ke hamlon mein Rahul ki tulana mein zyaada painaapan hai aur unke hamle Narendra Modi aur BJP ko zyaada chubh rahe hain. Narendra Modi ne Priyanka ke hamlon ka apne andaaj mein javaab diya hai. To vaheen BJP ne unke pati Robert vaadra ke kathit jameen ghotaalon ko lekar pehli baar aupachaarik roop se press conference kar hamla kiya hai. Nehru-Gandhi parivaar par BJP ke itne teekhe hamle isse pehle shaayad hi kabhi hue hon. Congress aur BJP mein ek tarah ka aghoshit samjhauta raha hai, jismein netaaon ke vyaktigat maamalon aur parivaar ke sadasyon par chheenta-kashi naheen ki jaati hai. Sabse pehle jab Robert vaadra ke jameen saudon aur unhein deeelaef se mile faayde ke baare mein khabarein aain to inhein sansad mein uthaane ko lekar BJP mein ek rai naheen ban saki. Party ke bade netaaon mein ise lekar matabhed the. Yeh daleel di gayi ki Congress Vajpayee ke dattak daamaad ranjan Bhattacharya ka mudda utha sakti hai. Ek bade neta jo is maamale ko sansad mein uthaana chaahate the, unhein jab aisa karne se rok gaya to unhonne apne pad se isteefa dene ki dhamaki bhi di thi. Iske baavajood BJP ne vaadra ke maamalon par chuppi saadhe rakhi. lekin ab ye chuppi toot gayi hai. Iske peechhe badi vajah Congressi netaaon dvaara Narendra Modi ke vyaktigat maamalon ko chunaav mein uchhaalana ho sakta hai. Khud Rahul Gandhi ne Modi ki vaivaahik sthiti ka savaal chunaav mein uthaaya hai. Kaanoon mantri Kapil sibbal ise lekar chunaav aayog bhi pahunch gaye. Rahul aur Priyanka baar-baar apni chunaavi sabhaaon mein kathit mahila jaasoosi kaand ko uthaakar mahila suraksha ke baare mein Modi ke daavon par savaal uthaate hain. Modi samarthak neta maanate hain ki pichhle baarah saal mein Congress ne jis tarah se unhein gherane ki koshish ki hai, uske baad se unase Nehru-Gandhi parivaar par hamla na karne ki apeksha karna bemaani hoga. Chunaav prachaar mein Narendra Modi lagaataar 'Jeejaaji' ki baat kah kar vaadra par nishaana saadhate rahe hain. BJP ka kehna hai ki ye vyaktigat hamle naheen hain balki bhrashtaachaar ke mudde hain. iseeliye Priyanka vaadra ka palatavaar behad dilchaspi se dekha ja raha hai. Yeh koi chhipi baat naheen hai ki Congress ke aam kaaryakartaaon mein Rahul ki tulana mein Priyanka ke prati adhik aakarshan hai. Priyanka mein unhein indira Gandhi ki chhavi dikhti hai. Unka aakraamak andaaj bhi indira Gandhi se milta-julata hai. Chunaav abhiyaan ki shuruaat se pehle aisi khabarein bhi aain theen ki Priyanka adhik sakriya hokar amethi-raayabareli ke baahar bhi Congress ke liye prachaar kareingi. Lekin aisa naheen hua. Priyanka ne Varanasi mein prachaar karne ki atkalon ko bhi khaarij kar diya hai. Kaaryakartaaon ki maang ke baavajood Priyanka ko aupachaarik roop se party mein koi jimmedaari naheen di gayi hai. Maana jaata hai ki agar aisa hota hai to focus Rahul se hatkar Priyanka par aa jaaega jabki soniya Gandhi aisa naheen chaahati hain. Priyanka ne bhi apne-aap ko sakriya raajaneeti se door rakha hai. Vo parde ke peechhe rah kar hi apne bhaai aur maan ki madad karti hain. Chunaavon ke vakt vo zaroor apne bhaai aur maan ke sansadeeya kshetron mein prachaar karti hain. Apne pati Robert vaadra ke jameen saudon ko lekar uthe vivaad par isse pehle unhonne kabhi chuppi naheen todi thi. Yahaan tak ki apne upanaam ko lekar bhi vah behad satark rahati hain. Vah naheen chaahati hain ki unke naam ke saath Gandhi joda jaae. 2007 ke vidhaanasabha chunaavon mein sultaanapur mein patrakaaron se baatcheet mein unhonne kaha bhi tha ki unhein Priyanka vaadra kaha jaae na ki Priyanka Gandhi. chunaav mein abhi matadaan ke teen daur baaki hain, lekin kai varishth Congressi netaaon ne teesare morche ki sarkaar banaane ki baat kehkar ek tarah se hathiyaar daalne shuroo kar diye hain. Aisa lag raha hai ki Narendra Modi ka mukaabala karne mein Rahul Gandhi prabhaavi saabit naheen hue hain. Aise mein Congress ne apne sabse asaradaar hathiyaar ke roop mein Priyanka ko aage kiya hai, lekin lagta hai ki ismein bhi bahut deri ho chuki hai. Apne pati par lage aaropon ka unhonne bhaavanaatmak dhang se javaab dene ki koshish ki hai. Kuchh-kuchh vaise hi jaise indira Gandhi chunaavon mein bhaavanaatmak muddon ko utha diya karti theen. Par BJP jis andaaj mein vaadra mudde par aakraamak hui hai usase Priyanka ko bhi hamlaavar hona pada hai. Yahaan tak ki vaadra ke maamale ko ek naagrik ka niji mudda bata kar khaarij karne waali Congress ko bhi safaai deni padi hai. Jaahir hai Robert vaadra ke mudde par aakhiri shabd kaha jaana abhi baaki hai.

Chunaav Daayari Congress Ko Mila Priyanka Ka Sahaara http://www.angrejinews.com/pic/48859