Chunaav Daayari Baasi Kadhi Mein Aaya Ubaal

Breaking »

Chunaav Daayari  Baasi Kadhi Mein Aaya Ubaal

File photo File photo Nai Delhi: Loksabha chunaav mein abhi teen daur ka matadaan baaki hai. Maton ki ginti 16 May ko hogi. Soniya Gandhi, Rahul Gandhi aur pradhaanamantri Manmohan Singh UPA ki sarkaar fir banane ka daava kar rahe hain. Lekin Congress ke bheetar se hi aavaajein uthana shuroo ho gayi hain ki left frant ko saath lekar sarkaar banaai jaani chaahiye. isi ke saath teesare morche, vaikalpik morche ya 'Secular' sarkaar banaane ke liye khichdi pakaane ki sugabugaahat shuroo ho gayi hai. Aisi koi bhi sarkaar bina Congress ya BJP ke samarthan ke naheen ban sakti. jahaan tak BJP ka prashn hai, usaki rananeeti spasht hai - agar use sarkaar banaani hai, to Narendra Modi ke hi netrutv mein banaani hai, varana naheen banaani hai. Jabki Narendra Modi ko rokane ke liye Congress kisi bhi had tak jaane ke liye taiyaar dikh rahi hai. Varana koi kaaran naheen ki ain chunaavon ke beech Congress ke varishth neta teesare morche ya secular sarkaar ke geet gaane lage. pehla bayaan Maharashtra ke mukhyamantri pruthveeraaj chavhaan ka aaya. Unhonne kaha ki Congress agali sarkaar banaane ke liye teesare morche ke saath haath milaaegi. Fir bayaan aaya videsh mantri Salman khursheed ka. Unhonne kaha ki Congress sarkaar banaane ke liye ya to teesare morche ka samarthan le sakti hai ya fir use samarthan de sakti hai. shanivaar ko hi CPM mahaasachiv prakaash karaat ne milti-julati baat kahi. Unhonne yeh ishaara tak de diya ki unki party aisi kisi sarkaar mein shaamil bhi ho sakti hai. Jis teesare morche ki baat baar-baar kahi ja rahi hai usamein mulaayam Singh Yadav, neeteesh Kumar, M Karunanidhi, left frant, jaganamohan Reddy, KC chandrashekhar Rao, sharad Pawar jaison ke naam liye jaate hain. jayalalita, mamata Bannerjee, naveen patanaayak ka kshetreeya frant ya vaikalpik morcha bhi beech-beech mein jor maarta dikhta hai. Jabki maayaavati ke baare kuchh bhi nishchit taur par naheen kaha ja sakta. jaahir hai jab tak Loksabha chunaav ke parinaam naheen aate, ye sab baatein sirf kaalpanik hi hain. Lekin abhi tak ke janamat sarvekshan agar sach hote hain, to aise mein teesare morche ki ya teesare morche ki madad se Congress ki sarkaar banane ki sambhaavana bahut kam dikhaai deti hai. NDA aur UPA ki seaton mein kareeb sau seaton ke antar ki sambhaavana vyakt ki ja rahi hai aur NDA ko 272 ke jaadui aankade ke najdeek pahunchata dikhaaya ja raha hai. Aise mein UPA ke liye teesare morche ki paartiyon ko saath lekar bhi sarkaar banaane ki baat door ki kaudi lagti hai. iski badi vajah yeh hai ki aisi koi sarkaar banane ki sambhaavana kam hai, jismein mamata Bannerjee aur left frant ya jayalalita-Karunanidhi ek saath hon. Isi tarah laaloo-neeteesh ya mulaayam-maayaavati ka saath aana raajaneetik roop se asambhav hi lagta hai. yeh jaroor hai ki mulaayam aur maayaavati donon hi UPA-2 ko baahar se samarthan de rahe hain. Lekin usaki vajah yeh hai ki donon hi ek-doosare ko sarkaar se baahar rakhana chaahate hain. Yeh maanana ki jis sarkaar mein unamein se koi ek shaamil ho, use doosra samarthan dega, vaastavikta se pare hai. mahatvapoorn baat yeh hai ki teesare ya vaikalpik morche ki sambhaavit paartiyon mein sirf jayalalita, mamata Bannerjee aur naveen patanaayak ke hi achhe pradarshan ki sambhaavana vyakt ki ja rahi hai. Jabki mulaayam Singh Yadav aur maayaavati donon hi uttar pradesh mein BJP se peechhe bataae ja rahe hain. Har chunaav mein teesare morche ki sarkaar ki baat karne vaale aur usaki dhuri banane vaale left frant ki apni haalat patali hai. Aise mein savaal yeh hai ki UPA ka saath lekar bhi ye morcha bahumat ke aankade tak kis tarah pahunch paaega? jis CPM ne Bhaarat-America parmaanu samjhaute ko lekar UPA ek sarkaar se samarthan vaapas liya tha, vah na sirf Congress ke saath sarkaar banaane ke liye ichhuk dikh rahi hai, balki sarkaar mein shaamil hone ka sanket bhi de rahi hai. isi tarah, Congress ke varishth netaaon ko chunaav ke baad banane waali tasveer daraane lagi hai aur vah chunaavon ke beech hi teesare morche ki baat karne lage hain. Ismein shak naheen hai ki Narendra Modi ko pradhaanamantri banane se rokane ke liye kai aisi paartiyaan saath aa sakti hain, jo ek-doosare ke khilaaf hi chunaav lad rahi hain. Aisi kisi bhi sarkaar ke sthaayitv ko lekar sirf andaaja hi lagaaya ja sakta hai. par yeh bhi tay hai ki agar NDA bahumat se door rahakar mamata, jayalalita, maayaavati ya naveen patanaayak ke samarthan ka mohataaj rahata hai, to usaki sarkaar ki umr paanch saal hogi ya naheen, yeh kah paana mushkil hoga. Vaise is chunaav mein matadaan ka badha pratishat shaayad yeh gavaahi de raha hai ki janta sthaayi sarkaar ke paksh mein hi hai.

Chunaav Daayari Baasi Kadhi Mein Aaya Ubaal http://www.angrejinews.com/pic/48752