Censor Board Ki Shaktiyon Ki Sameeksha Karegi Samiti

Breaking »

Censor Board Ki Shaktiyon Ki Sameeksha Karegi Samiti

Nai Delhi: Kamal Hassan ki film 'Vishvaroopam' ko lekar hue vivaad ke baad kendra ne censor board ke adhikaaron ki sameeksha aur 'Vartamaan daur mein pramaanan ki jarooraton' ke anuroop ise saksham banaane ke liye upaaya sujhaane ke liye ek samiti ka gathan kiya. Nyaayamoorti (sevaanivrutt) mukul mudagal ki adhyakshata waali aath sadasyeeya samiti filmon ke pradarshan ko manjoori dene mein raajya sarkaaron ke adhikaaron ke pariprekshya mein kendra sarkaar ki bhoomika ki bhi jaanch karegi. Sangh soochi ki 60veen pravishti ke tahat kendra ko pradarshan ke liye filmon ko manjoori dene ka adhikaar hai jabki raajya soochi ki 33veen pravishti ke tahat cinemagharon aur naatak sambandhi kaaryakramon par raajya sarkaaron ko adhikaar mila huaa hai. 'Vishvaroopam' ko lekar chal rahe vivaad ke dauraan kaha gaya tha ki film ko pehle se hi pradarshan ke liye censor board ki manjoori mili hui hai. Tamil Nadu sarkaar ne vidhi-vyavastha ka havaala dete hue iske pradarshan par rok laga di thi. Punjab evam Haryana uchch nyaayaalaya ke sevaanivrutt mukhya nyaayaadheesh mukul mudagal samiti ke adhyaksh hain jabki iske sadasyon mein film pramaanan appeali nyaayaadhikran (FCAT) ke adhyaksh lalit bhaseen, abhinetri sharmila Tagore, geetkaar jaaved Akhtar, keindreeya film pramaanan board (CBFC) ki adhyaksh leela Samson shaamil hain. Film federation of India ke adhyaksh L suresh, vakeel rameeja hakeem aur soochana evam prasaaran mantraalaya ke sanyukt sachiv raaghaveindr Singh samiti ke doosare sadasyon mein shaamil hain. Samiti do maheenon ke andar apni report saunpegi.

Censor Board Ki Shaktiyon Ki Sameeksha Karegi Samiti http://www.angrejinews.com/pic/1088