Bhaarat Naitik Shiksha Aur Moolyon Par Badhe To Cheen Bhi Peechhe Chalega Dalaai Laama

Breaking »

Bhaarat Naitik Shiksha Aur Moolyon Par Badhe To Cheen Bhi Peechhe Chalega Dalaai Laama

Nai Delhi Bhale hi maujooda samay mein raajaneetik roop se Tibet par cheen ka kabja hai lekin ek din Tibet cheen par raaj karega. Yeh bhavishyavaani hai Tibet ke dharmaguru dalaai laama ki. Dalaai laama ne haal hi mein kaha tha ki cheen se Tibet ki aajaadi naheen vikaas ki ummeed rakhate hain lekin hamaare sahayogi akhbaar 'Times of India' ko diye interview mein unhonne cheen par raaj karne ki bhavishyavaani ki hai. Interview mein unhonne yuddh aur hathiyaaron ko gair-jaroori bataate hue karuna aur shiksha par jor diya. Unhonne kaha, 'Agar Bhaarat apne moolya aadhaarit naitik shiksha par adhik jor de to cheen bhi uske kadamon par chalega. ' Unhonne kaha ki yuddh se samasyaaon ke samaadhaan ki ummeed ab bemaani hai aur yeh puraana tareeka hai. Karuna aur shiksha ke prasaar se hi yeh duniya ek behtar jagah ban sakti hai. Bhaarat aur Pakistan ke haalaaton ki tulana karte hue unhonne kaha, 'Shiksha aaj ke samay mein mahatvapoorn hai aur Bhaarat ke liye yeh koi nai baat naheen hai. Bhaarat mein ahinsa ka vichaar 1000 saal se bhi puraana hai. ' Bhaarat aur Pakistan ke haalaat ki tulana karte hue unhonne kaha, 'Mujhe aisa lagta hai ki aadhunik Bhaarat bahut shaantipoorn hai. Pakistan ki tulana mein Bhaarat mein haalaat kaafi achhe hain. Pakistan ek muslim desh hai aur Bhaarat mein Pakistan ki tulana mein adhik muslim rahate hain. Donon hi mulkon ke muslim ek hi Quraan padhte hain, lekin Bhaarat mein muslim jyaada shaantipriya hain. Iski vajah hai ki Bhaarat mein sadiyon puraani ahinsa ki parampara aaj bhi jinda hai. ' Bhaarateeya paranparaaon se prabhaavit hone ki baat karte hue dalaai laama ne kaha ki yuddh aur hathiyaaron ke istemaal se duniya mein chhoti ladaai jeeti ja sakti hai. Hathiyaaron ke dam par satta tak jaroor pahuncha ja sakta hai, lekin lambe race mein yeh kaam naheen aata hai. Unhonne kaha, 'Bhaarat ki praacheen shiksha pranaali se mujhe drudh ichhaashakti mili. Bhaarateeya sanskruti mein samaadhi aur maun ki prathaaen 3000 saal se bhi pehle se hain. Bhaarateeya sanskruti bhaavanaaon par niyantran aur maanasik star par lagaataar sudhaar ki baat karti hai. ' Duniya ko adhik behtar jagah banaane aur sarkaaron ke beech hathiyaaron ki ladaai khatm karne ke savaal par bhi dalaai laama ne bhaarateeya sanskruti ka havaala diya. Unhonne kaha, 'Bauddh dharm ahinsa ka dharm hai aur ismein hinsa, yuddh ke liye koi sthaan naheen hai. Mera drudh vishvaas hai ki bhaarateeya paranparaaon aur shiksha ke vistaar se vishv bhar mein jyaada shaantipoorn maahaul banaaya ja sakta hai. ' Is khabar ko angreji mein padhein.

Bhaarat Naitik Shiksha Aur Moolyon Par Badhe To Cheen Bhi Peechhe Chalega Dalaai Laama http://www.angrejinews.com/pic/182920